Revelacion—Su Gran Culminacion Ta Cerca!
1 “Bendishoná ta esun ku lesa i esnan ku tende e palabranan di e profesia, i ku paga atenshon na e kosnan ku ta pará skirbí den dje; pasobra e tempu ta serka.” (Rev. 1:3) E palabranan ei ta resaltá e balor di e buki di Revelashon, spesialmente awor ku nos ta bibando durante e tempu señalá den kua hopi di su profesianan lo kumpli. Ta na su lugá anto pa nos studia e buki Revelacion—su gran culminacion ta cerca! na Estudio di Buki di Kongregashon, kuminsando ku e siman di 8 di yanüari 2007.
2 Desde e último biaha ku nos a studia e buki Revelacion su culminacion na Estudio di Buki di Kongregashon, esena di mundu a kambia hopi. (1 Kor. 7:31) Ademas, hopi persona ku a djòin e fila di predikadónan di Reino nunka no a benefisiá di un konsiderashon versíkulo pa versíkulo di e buki di Revelashon. Studiamentu di e buki Revelacion su culminacion mester yuda nos tur keda vigilá pa loke tin den futuro.—Rev. 16:15.
3 Pone komo meta pa bo ta presente tur siman. Fuera di ku e informashon aki lo yuda nos keda vigilá, e mensahe di Hesus pa e shete kongregashonnan lo yuda nos evitá situashon- i sirkunstansianan ku lo por tin un efekto negativo riba nos spiritualidat i partisipashon den e ministerio.—Rev. 1:11, 19.
4 Prepará Bon: Promé ku kada estudio di buki, lesa e versíkulonan den e buki di Revelashon ku lo ser analisá. Konsiderá e rasonamentu bíbliko ku ta splika nan. Hasi esfuerso pa bo komprondé e puntonan importante pa asina nan motivá bo kurason. (Neh. 8:8, 12) Tuma tempu pa meditá i pa puntra bo mes: ‘Kiko e informashon aki ta siña mi di Yehova i di e kumplimentu di su propósito? Kon mi por aktua na armonia ku su propósito i yuda otro hende?’
5 Ta 92 aña kaba ku “e dia di Señor” a kuminsá na 1914. (Rev. 1:10) Susesonan dramátiko ku e buki di Revelashon a profetisá ta tras di porta. Studiamentu di e buki Revelacion su culminacion lo refreská nos kurason i mente i fortalesé nos fe ku “e guera di e gran dia di Dios Todopoderoso” i e mundu nobo ta serka.—Rev. 16:14; 21:4, 5.