Bo Ta Prepará pa un Desaster Natural?
1 Tur aña, miónes di hende rònt mundu, inkluso hopi di nos rumannan, ta ser afektá pa temblor, tsunami, áwaseru torensial, horkan, tornado i inundashon. Desasternan natural ta sosodé inesperadamente i por afektá kualke un di nos. Pues, ta sabí pa nos ta prepará.—Pro. 21:5.
2 Di Antemano: Tin biaha outoridatnan ta logra duna spièrtamentu ku tin un desaster na kaminda. Ta importante pa nos presta atenshon na e spièrtamentunan ei. (Pro. 22:3) Den situashonnan asina e ansianonan lo purba tuma kontakto ku tur hende den kongregashon pa yuda nan hasi e preparashonnan nesesario. Despues di un desaster, e ansianonan lo hasi esfuerso tambe pa tuma kontakto ku tur hende ku ta asosiá ku e kongregashon pa wak si nan ta sano i salvo i pa saka afó ki yudansa kisas nan tin mester. Tempu balioso por bai pèrdí si e ansianonan no tin informashon al dia kon pa tuma kontakto ku e publikadónan. P’esei ta bon pa publikadónan informá e sekretario i nan superintendente di estudio di buki di nan adrès i number(nan) di telefòn aktual.
3 Si e kongregashon ta situá den un zona kaminda hopi desaster ta tuma lugá, ansianonan por pidi publikadónan pa duna nòmber i number di telefòn di un famia òf amigu ku no ta biba den bisindario i ku lo mester tuma kontakto kuné den kaso di emergensia. Esaki lo yuda ansianonan lokalisá esnan ku evakuá. E ansianonan lo ke prepará tambe un plan di emergensia pa e kongregashon. E plan ei lo inkluí kosnan manera un lista simpel di artíkulo di emergensia ku e rumannan mester tin na man, areglonan den kaso di evakuashon, i kon lo yuda rumannan ku nesesidat spesial. Ta masha importante pa koperá ku e areglonan amoroso aki.—Heb. 13:17.
4 Despues di Desaster: Kiko bo mester hasi si un desaster mester tuma lugá den bo área? Hasi sigur di atendé e nesesidatnan físiko urgente di bo famia. Segun ku bo por, duna yudansa nesesario na otro hende ku a ser afektá. Hasi esfuerso pa mas pronto posibel bo drenta den kontakto ku bo superintendente di estudio di buki òf un otro ansiano. Bo mester hasi esaki asta si bo ta sano i salvo i no tin mester di yudansa. Si bo tin mester di yudansa, bo por ta sigur ku bo rumannan ta hasiendo tur esfuerso pa yuda bo. (1 Kor. 13:4, 7) Kòrda ku Yehova ta konsiente di bo situashon; akudí na dje pa duna bo sosten. (Sal. 37:39; 62:8) Sea alerta pa oportunidatnan pa duna sosten spiritual i emoshonal na otro hende. (2 Kor. 1:3, 4) Reanudá bo rutina teokrátiko mas pronto posibel.—Mat. 6:33.
5 Ounke e menasa di desaster ta yena e mundu ku hopi ansiedat, nos sí por mira futuro ku konfiansa. Pronto tur desaster lo ta kos di pasado. (Rev. 21:4) Miéntras tantu, nos por dal pasonan rasonabel pa prepará pa tempu di problema i difikultat segun ku nos ta sigui deklará e bon nobo na otro hende ku selo.
[Study Questions]
1. Dikon ta sabí pa nos ta prepará pa desaster?
2. Dikon nos tin ku tene e ansianonan na haltura di nos adrès i number(nan) di telefòn aktual?
3. Kon nos por koperá ku e ansianonan si nos ta biba den un zona kaminda hopi desaster ta tuma lugá?
4. Kiko nos mester hasi si un desaster tuma lugá den nos área?
5. Ki efekto e menasa di desaster tin riba nos komo kristian?