Nos Tur Por Yuda Hende Nobo Bira Disipel
1 Un disipel nobo no ta resultado di esfuerso di un solo persona. Yehova por usa tur su “kolaboradónan” pa yuda studiantenan di Beibel krese spiritualmente. (1 Kor. 3:6-9) Kada un di nos ta yuda personanan resien interesá no solamente ku nos komentarionan sinsero na reunionnan kristian, pero tambe ku nos bon kondukta ku ta duna evidensia konvinsente ku e spiritu di Dios ta obra den nos bida. (Juan 13:35; Gal. 5:22, 23; Efe. 4:22, 23) Kiko mas nos por hasi pa yuda esnan resien interesá?
2 Komo Kongregashon: Nos tur por mustra interes den hende ku kuminsá asistí na e reunionnan dor di tuma inisiativa pa kumindá nan i kòmbersá ku nan promé i despues di reunion. Un hòmber ku a reflekshoná riba su promé kontakto ku e kongregashon a bisa: “Den ún dia, mi a topa mas hende ku ta manifestá berdadero amor—ounke nan tabata kompletamente straño pa mi—ku mi a yega di topa den e religion ku mi a lanta. Tabata bisto ku mi a haña e bèrdat.” El a batisá shete luna despues ku el a asistí na su promé reunion.
3 Duna elogio sinsero segun ku un studiante di Beibel ta progresá spiritualmente. E ta soportando oposishon? E ta asistí regularmente na e reunionnan? El a tuma kurashi pa duna komentario? El a inskribí su mes den e Skol di Ministerio Teokrátiko òf el a kuminsá sali den sirbishi? Elogi’é pa e progreso ku el a hasi. Esaki lo anim’é i fortales’é.—Pro. 25:11.
4 Komo Konduktor di Estudio di Beibel: Algun publikadó a invitá otro publikadónan pa bai estudio ku nan pa asina yuda nan studiantenan di Beibel sera konosí ku miembronan individual di e kongregashon. Invitá e studiante na reunionnan di kongregashon mas pronto posibel. Ora e kuminsá asistí na e reunionnan, hasi sigur di lag’é sera konosí ku otro rumannan. E ta luchando pa vense un mal kustumber manera humamentu? Un miembro di su famia ta kontra ku e ta studia Beibel? Si e kòmbersá ku un publikadó ku a hañ’é ku un problema similar i a vens’é, esaki lo por yud’é.—1 Ped. 5:9.
5 Personanan resien interesá mester di e apoyo spiritual di e kongregashon. Nos tur por yuda nan progresá dor di demostrá interes personal sinsero den nan.