Nos Ta Kontentu di Por Traha Duru den Sirbishi di Yehova!
1 Apòstel Pablo tabata kontentu ku e por a ‘duna su mes’ kompletamente pa kumpli ku su ministerio kristian. (2 Kor. 12:15) Di mes manera awe, hopi kristian ta traha diligentemente komo pionero. Otronan, ounke nan tin responsabilidatnan pisá di famia, ta saka tempu di nan programa drùk pa bai den sirbishi tur siman. Algun publikadó ku tin problema serio di salú ta usa e poko energia ku nan tin pa promové interesnan di Reino. Ta un animashon pa mira kon Yehova su pueblo, sin importá nan edat òf sirkunstansia, ta usa nan tempu i energia den sirbishi di Yehova!
2 Amor pa Próhimo: Ora nos ta hasi tur loke nos por pa sirbi Yehova, demostrando amor pa Dios i pa próhimo, nos ta haña un konsenshi limpi. Pablo a traha ku alma i kurpa den predikashon di e bon nobo; p’esei, ku gran satisfakshon e por a bisa: “Mi ta testifiká na boso riba e dia aki, ku mi ta inosente di e sanger di tur hende.” (Echo. 20:24, 26; 1 Tes. 2:8) Si nos ta partisipá den e ministerio te kaminda nos sirkunstansia ta permití, esei lo evitá ku nos ta bira kulpabel di sanger.—Eze. 3:18-21.
3 Ora nos ta traha duru pa yuda otro hende, esei ta hasi nos felis. (Echo. 20:35) Un ruman hòmber a bisa: “Ora anochi sera i mi yega kas despues di un dia den sirbishi di Yehova, ta bèrdat ku mi ta kansá. Pero mi ta sinti mi felis, i mi ta gradisí Yehova ku el a duna mi un goso ku niun hende no por kita fo’i mi.”
4 Amor pa Dios: E motibu di mas importante pakiko nos ta traha duru den sirbishi di Yehova ta pasobra esaki ta hasi nos Tata selestial kontentu. Amor pa Dios ta motivá nos pa kumpli ku su mandamentunan ku ta enserá efektuá e trabou di prediká i hasi disipel. (1 Juan 5:3) Asta ora e hendenan ta indiferente òf kontra, nos ta sigui traha duru ku goso pa Yehova.
5 Aworakí no ta tempu pa baha man. Nos ta bibando den e tempu di kosecha. (Mat. 9:37) Generalmente un kunukero ta traha oranan largu den dianan di kosecha pasobra e tempu ku e tin pa rekohé su produktonan promé ku nan kuminsá daña, ta limitá. E tempu ku nos tin pa rekohé e kosecha spiritual tambe ta limitá. Laga nos sigui kòrda ta den ki tempu nos ta bibando i sigui traha duru den e ministerio.—Luk. 13:24; 1 Kor. 7:29-31.