Kambionan Interesante pa E Toren di Vigilansia!
1 Na prinsipio di e aña aki kongregashonnan a risibí un anunsio emoshonante: Kuminsando na yanüari 2008, na hopi idioma E Toren di Vigilansia lo ser publiká den dos diferente edishon, un ta pa e públiko i e otro ta pa nos hermandat kristian. Siendo ku temporalmente nos lo publiká un solo edishon mensual di E Toren di Vigilansia na papiamentu, no ta tur e kambionan aki lo ser apliká den nos revista. Sin embargo, relashoná ku e idiomanan manera hulandes, ingles i spañó, kisas bo a puntra bo mes: ‘Den ki sentido e dos revistanan lo ta diferente? Kiko ta e bentahanan di tin dos edishon diferente? Tin rasgonan nobo ku nos mester spera ku anhelo?’
2 E Diferensianan: E edishon ku tin e fecha di promé di luna lo ta konosí komo e Edishon pa Públiko. Tur e artíkulonan den e edishon aki lo ta prepará ku e públiko na mente. E edishon di 15 di luna lo ta konosí komo e Edishon di Estudio i lo no ser ofresé den sirbishi di vèlt. Lo e kontené tur e artíkulonan di estudio nesesario pa un luna i tambe artíkulonan sekundario ku ta di interes partikularmente pa kristiannan dediká. E Edishon pa Públiko lo ta atraktivo no solamente pa Testigunan sino lo atraé spesialmente hende ku no ta Testigu ku kisas ta respetá Beibel. Di otro banda, e ¡Despertad! lo sigui enfoká riba un públiko lektor mas amplio, inkluso personanan sképtiko i esnan ku ta pertenesé na un religion ku no ta kristian. E edishon mensual di E Toren di Vigilansia na papiamentu lo kontené un kombinashon di artíkulo di tantu e Edishon pa Públiko komo di e Edishon di Estudio.
3 E Bentahanan: Den e Edishon di Estudio, lo no ta nesesario mas pa splika sierto términonan manera “pionero” pa asina hende ku no ta Testigu por komprondé. E edishon aki lo por kontené tambe informashon spesífiko prepará spesialmente pa Testigunan di Yehova i studiantenan di Beibel ku ta progresando spiritualmente. Kiko di e Edishon pa Públiko? Siendo ku e tópikonan i e estilo di skirbi lo ta dirigí na e públiko, un persona ku no ta Testigu lo por lesa i disfrutá di e revista di kaft pa kaft. Klaru ku tin benefisio tambe pa tur Testigu di Yehova ora nan lesa kada edishon. Dor ku nos lo ofresé solamente un Toren di Vigilansia i un ¡Despertad! den sirbishi di vèlt kada luna, nos lo tin henter un luna pa desaroyá presentashonnan efikas.
4 Rasgonan Nobo: Tin algun rasgonan nobo i interesante planiá pa e Edishon pa Públiko di E Toren di Vigilansia. Un di nan lo konsiderá siñansanan bíbliko básiko den un estilo masha simpel. Un otro lo mustra kon Beibel por yuda famianan. Lo tin proyektonan di estudio di Beibel pa hóbennan. Kada edishon lo tin un artíkulo ku ta resaltá pasashinan spesífiko di Beibel ku ta siña nos tokante Yehova su personalidat. Te kaminda ta posibel nos lo inkluí e rasgonan nobo aki den nos edishon mensual di E Toren di Vigilansia na papiamentu.
5 Nos ta resa pidi Yehova bendishoná e areglo nobo aki pa E Toren di Vigilansia. Ta nos deseo sinsero pa e revista ei huntu ku ¡Despertad! alkansá hopi mas tantu hende ku ta meresedor òf digno, ku e bon nobo.—Mat. 10:11.