Hasi Esfuerso pa Hasi Mas den Nos Ministerio
1 Apòstel Pablo a konsehá kristiannan pa nan kana den e kaminda di Dios i “sobresalí mas i mas.” (1 Tes. 4:1) Kiko esaki ta nifiká pa nos? Un kos ta sigur, kontinuamente nos tin ku buska maneranan pa oumentá nos aktividat spiritual. Pues, semper nos mester hasi esfuerso pa ‘kumpli ku nos ministerio plenamente.’—2 Tim. 4:5.
2 Nos Motivashon: Nos deseo pa sirbi nos Kreadó mas plenamente ta motivá nos pa hasi esfuerso pa hasi mas den nos ministerio. Nos ke krese spiritualmente i ta buska maneranan pa mehorá nos sirbishi. Un bon programa huntu ku e motivashon korekto lo yuda nos alkansá metanan teokrátiko.—Sal. 1:1, 2; Fil. 4:6; Heb. 10:24, 25.
3 Si nos ke ekspandé nos ministerio, nos tin ku kultivá e aktitut di ta kla pa duna i pa sakrifiká nos mes. Anto pa por kultivá e aktitut ei nos tin ku hasi orashon i meditá riba e ekselente ehèmpel di Hesus. (Mat. 20:28) Durante henter Hesus su ministerio el a sirbi hende i esei a dun’é masha goso. (Echo. 20:35) Nos por imitá Hesus dor di mustra interes personal den hende i keda alerta pa tur oportunidat ku presentá pa hasi mas den nos ministerio.—Isa. 6:8.
4 Papel di Mayornan: Mayornan por inkulká den nan yunan for di chikitu un deseo pa sirbi otro hende i pa ekspandé nan ministerio. Hóbennan lo ripará ora otro miembronan di famia ta diligente i ta partisipá aktivamente den ekspanshon di nan ministerio. Un ruman hòmber a ser motivá pa hasi mas ora e tabata mucha debí ku e tabata traha huntu ku su welo den aktividatnan di kongregashon. E por a mira su welo su diligensia i goso; i eseinan a motiv’é pa buska oportunidat pa sirbi su rumannan. Awor e ta un sirbidó ministerial.
5 Tin Mester di Ruman Hòmber: “Si un hòmber ta aspirá [ òf, hasi esfuerso] . . . , ta un bon trabou e ta deseá di hasi.” (1 Tim. 3:1) E palabranan aki ta animá ruman hòmbernan pa hasi esfuerso pa kualifiká pa mas privilegio di sirbishi den e organisashon di Yehova. Pa nan hasi esei nan no tin mester di abilidatnan natural eksepshonal. Un ruman hòmber ku ta hasi esfuerso pa hasi mas lo buska promé e Reino i partisipá ku entusiasmo den e ministerio. (Mat. 6:33; 2 Tim. 4:5) Lo e hasi esfuerso pa ta un bon ehèmpel pa otronan.
6 Rònt Mundu: Yehova ta aselerando e rekohementu di hende. (Isa. 60:22) Ta masha urgente pa tur esnan ku ta imitá Hesus su ehèmpel kumpli ku nan ministerio mas plenamente. E rapòrt mundial pa e aña di sirbishi 2006 ta mustra ku 248.327 persona a batisá. Esei ta representá un promedio di 680 persona nobo kada dia! Laga nos tur sigui buska maneranan pa kumpli ku nos ministerio mas plenamente.