Nos Tin Ku Mantené Nos Entusiasmo pa e Ministerio
1 Kuminsando na 1992, tur aña, ku entusiasmo Testigunan di Yehova ta dediká mas ku mil mion ora na e trabou mundial di prediká e Reino i di hasi disipel. Nos ta masha kontentu ku nos tambe por kontribuí ku un granito na e logro maravioso ei.—Mat. 28:19, 20.
2 Klaru ku tur gradisimentu i alabansa mester bai pa Yehova, kende ta sostené nos den nos ministerio durante e “tempunan trabahoso” aki. (2 Tim. 3:1) Pero, kiko nos tin ku hasi pa nos por sigui partisipá ku entusiasmo den e trabou importante aki?
3 Base pa Nos Entusiasmo: Amor profundo pa Yehova i pa nos próhimo i tambe un deseo sinsero pa kumpli ku nos dedikashon ta motivá nos den nos sirbishi di Reino. (Mat. 22:37-39; 1 Juan 5:3) Amor ta motivá nos pa hasi sakrifisio pa nos por partisipá plenamente den e trabou di prediká.—Luk. 9:23, NW.
4 Traha pa Mantené Nos Entusiasmo: Nos atversario e Diabel ta hasi tur su esfuerso pa mengua nos entusiasmo pa e ministerio. Indiferensia den nos teritorio, distraishonnan di e mundu aki, preshon di bida diario i preokupashon pa nos propio salú ku ta bayendo atras ta djis algun di e kosnan ku e ta usa den un intento pa desanimá nos.
5 P’esei, nos tin ku traha duru pa nos mantené nos entusiasmo. Ta importante pa nos kultivá nos “promé amor.” Esaki ta enserá ku riba un base regular nos ta lesa i meditá riba Beibel, e Palabra di Dios, i ta hasi bon uso di e perkurashonnan spiritual ku “e esklabo fiel i prudente” ta perkurá.—Rev. 2:4; Mat. 24:45; Sal. 119:97.
6 Manera profesianan di Beibel ta indiká bon kla, Yehova su dia pa destruí e malbadonan ta yegando rápidamente. (2 Ped. 2:3; 3:10) Ku esei bon kla na mente, laga nos traha duru pa mantené nos entusiasmo pa e ministerio dor di partisipá plenamente den e trabou mundial di prediká e Reino i di hasi disipel ku ta tumando lugá awor!