Nos Tur Por Duna Yehova Algu
1 Bo tabata sa ku hende por duna Dios algu? Abel a sakrifiká algun di su mihó bestianan na Yehova, i Noe i Jòb a hasi e mesun tipo di ofrenda. (Gén. 4:4; 8:20; Jòb 1:5) Ta klaru ku di ningun manera ofrendanan asina no a hasi e Kreadó mas riku, pasobra e mes ta doño di tur kos. Pero, e sakrifisionan a mustra bon kla e gran amor ku e sirbidónan fiel ei tabatin pa Dios. Awe, nos por usa nos tempu, energia i rekursonan pa duna Yehova “un sakrifisio di alabansa.”—Heb. 13:15.
2 Tempu: Ta hopi bon si nos por dediká ménos tempu na kosnan ku no ta dje importante ei, i ‘hasi bon uso di nos tempu’ pa partisipá plenamente den e ministerio! (Efe. 5:15, 16) Podisé nos por ahustá nos programa pa nos por traha pionero ousiliar un òf mas luna pa aña. Kisas nos lo por traha mas tantu ku normal den sirbishi. Si tur siman nos traha djis 30 minüt èkstra den sirbishi, nos lo logra por lo ménos dos ora mas pa luna!
3 Energia: Nos por tin sufisiente energia den nos ministerio si nos evitá rekreo i empleo ku ta laga nos keda asina kansá ku nos no por duna Yehova lo mihó. Ademas, nos no mester laga ansiedat molestiá nos asina tantu ku nos kurason lo keda “abatí,” i kita e energia ku nos lo por a usa pa sirbi Dios. (Pro. 12:25) Asta si nos motibu pa preokupá ta válido, lo ta hopi mas mihó si nos ‘tira nos karga riba Yehova’!—Sal. 55:22; Fil. 4:6, 7.
4 Rekursonan: Nos por duna di nos rekursonan material tambe pa apoyá e trabou di prediká. Pablo a animá su kompañeronan kristian pa “pone algu un banda” ku regularidat pa nan por tin algu pa duna na hende den nesesidat. (1 Kor. 16:1, 2) Nos tambe lo por pone algu un banda pa hasi donashon na e kongregashon lokal i pa e obra mundial. Yehova ta apresiá loke nos ta duna di kurason, ounke e ta tiki.—Luk. 21:1-4.
5 Yehova a duna nos masha hopi kos mes. (Sant. 1:17) Pues nos por mustra nos gratitut na dje dor di dun’é generosamente di nos tempu, energia i otro rekursonan. Ora nos duna di e forma ei, nos ta agradá Yehova, “pasobra Dios ta stima esun ku ta duna ku alegria.”—2 Kor. 9:7.