“Sigui den Su Pasonan”
1 Hesus no a haña edukashon na e skolnan rabíniko i tòg e tabata e mihó Minister den historia. Nos por ta gradisidu ku Hesus su ministerio a keda registrá pa nos por benefisiá di dje. Pa nos por ta ministernan efektivo, nos mester “sigui den su pasonan.”—1 Ped. 2:21.
2 Demostrá Amor pa Hende: Hesus su amor a motiv’é pa mustra interes den hende. (Mar. 6:30-34) Hopi hende den nos teritorio ta den situashonnan ku ta kousa ‘doló,’ i nan tin un gran nesesidat di e bèrdat. (Rom. 8:22) Loke por motivá nos pa sigui prediká na hende ta ora nos reflekshoná riba e desesperashon ku nan ta aden i riba Yehova su interes amoroso den nan. (2 Ped. 3:9) Ademas, hende lo reakshoná mas faborabel na nos mensahe si nan nota ku nos ta realmente interesá den nan.
3 Probechá di Tur Oportunidat pa Prediká: Hesus a probechá di tur oportunidat pa kompartí e bon nobo ku otro hende. (Mat. 4:23; 9:9; Juan 4:7-10) Asina tambe, nos ke ta prepará pa papia tokante e bèrdat ora nos ta hasi e kosnan di tur dia. Algun publikadó semper tin un Beibel i literatura na man pa nan por duna testimonio na trabou, na skol, ora nan ta riba kaya pa hasi kualke diligensia, etcetera.
4 Enfoká Riba e Reino: E bon nobo di Reino tabata e tema di Hesus su predikashon. (Luk. 4:43) Maske nos presentashon kisas no ta menshoná e Reino direktamente, kòrda laga e doño di kas mira ku e ta hopi nesesario. Asta ora nos ta referí na e kondishonnan malu den mundu ku ta indiká ku nos ta bibando den e último dianan, nos ta enfoká prinsipalmente riba “notisianan alegre di kosnan bon.”—Rom. 10:15.
5 Konfia Riba e Palabra di Dios: Hesus a konfia riba e Skritura durante henter su ministerio. Ora el a siña hende, e no a hasi esei di su mes. (Juan 7:16, 18) El a alimentá su mes ku e Palabra di Dios i a aplik’é na su mes ora e tabata bou di atake di Satanas. (Mat. 4:1-4) Pa nos por siña otro hende na un manera efektivo, nos mester lesa Beibel tur dia i aplik’é personalmente. (Rom. 2:21) Ora nos ta kontestá pregunta den e ministerio, loke nos ta bisa mester ta basá riba Beibel i nos mester lesa for di dje ki ora ku ta posibel. Nos ke pa e doño di kas mira ku loke nos ta bisa no ta nos opinion personal sino Dios su pensamentunan.
6 Yega na Kurason di Esnan Ku Bo Ta Siña: “Nunka un hende no a papia manera e hòmber aki.” (Juan 7:46) Esei ta loke e ofisialnan a bisa tokante Hesus ora e saserdotenan prinsipal i fariseonan a puntra nan dikon nan no a arestá Hesus. En bes di djis duna informashon, Hesus a siña di tal manera ku el a yega na kurason di esnan ku el a instruí. (Luk. 24:32) Pa duna bida na su palabranan, Hesus a usa komparashon di bida real. (Mat. 13:34) Hesus no a duna su oyentenan demasiado informashon. (Juan 16:12) E no a hala atenshon na su mes sino na Yehova. Meskos ku Hesus, nos por bira bon maestro si nos ‘paga tinu na loke nos ta siña otro hende.’—1 Tim. 4:16, BPK.
7 Perseverá Apesar di Indiferensia i Oposishon: Hesus a hasi milager, i tòg hopi hende no a skuch’é. (Luk. 10:13) Asta Hesus su famianan mes tabata pensa ku “su kabes no ta bon.” (Mar. 3:21) Pero tòg, Hesus a perseverá. El a mantené un aktitut positivo pasobra e tabata totalmente konvensí ku e tabatin e bèrdat ku por a hasi hende liber. (Juan 8:32) Ku Yehova su yudansa, nos tambe ta determiná pa no entregá.—2 Kor. 4:1.
8 Hasi Sakrifisio pa Partisipá Plenamente: Hesus a sakrifiká komodidat material pa e ministerio. (Mat. 8:20) El a prediká inkansablemente, tin bes asta te lat. (Mar. 6:35, 36) Hesus tabata sa ku e tempu pa e kumpli ku su trabou tabata limitá. Ya ku den nos kaso tambe “tempu ta kòrtiku,” nos tin ku sakrifiká nos tempu, energia i rekursonan pa imitá Hesus.—1 Kor. 7:29-31.
9 E kristiannan di promé siglo tabata ministernan efektivo pasobra nan a siña for di Hesus. (Echo. 4:13) Nos tambe por kumpli plenamente ku nos ministerio si nos imitá e mihó Minister den historia.—2 Tim. 4:5.
Study Questions]
1. Kon nos por bira ministernan efektivo?
2. Kiko por yuda nos kultivá e klase di amor ku Kristu tabatin pa hende?
3. Na ki okashon Hesus a prediká na otro hende?
4. Kon nos por hasi e Reino e tema di nos predikashon?
5. Pa nos ministerio ta efektivo, ki ròl Beibel mester hunga?
6. Kiko Hesus a hasi pa yega na kurason di su oyentenan?
7. Dikon Hesus a perseverá den e ministerio?
8, 9. Kon nos por imitá Hesus den hasi sakrifisio pa kousa di e bon nobo?