Nos Ta Tumba Kosnan Fuertemente Ankrá
1 Pa siglonan, Satanas a usa siñansa falsu i engaño pa krea barera den mente i kurason di hopi hende. El a propagá entre otro e doktrina di Trinidat, inmortalidat di alma i fièrnu di kandela. E ta fomentá duda tokante eksistensia di un Kreador i si Dios ta e outor di Beibel. Rasismo i nashonalismo ta otro bareranan grandi ku ta stroba hende di aseptá e bèrdat. (2 Kor. 4:4) Kon nos por tumba e kosnan fuertemente ankrá ei?—2 Kor. 10:4, 5, NW.
2 Emoshon Ta Enbolbí: Kreensianan religioso ku un hende tabatin pa hopi tempu, mayoria bes ta enbolbé emoshonnan profundo. Tin hende ta pegá na siñansa robes for di tempu ku nan tabata mucha. Pa yuda hende asina, nos mester mustra rèspèt pa nan punto di bista ora nos ta papia ku nan.—1 Ped. 3:15.
3 Nos por mustra rèspèt pa hende asina dor di permití nan splika kiko nan ta kere i dikon. (Sant. 1:19) Kisas nan ta kere firmemente ku alma ta inmortal debí ku nan a pèrdè sernan kerí den morto i ta anhelá di mira nan bèk. Òf kisas nan ta selebrá dianan di fiesta pasobra nan ta gusta ku nan tin e oportunidat pa ta huntu ku nan famia. Ta bon pa nos skucha nan pa nos por komprondé nan sintimentunan ya ku esei lo yuda nos pa reakshoná na un manera efikas.—Pro. 16:23.
4 Imitá Hesus: Hesus a pone un bon ehèmpel pa nos den e manera ku el a kontestá pregunta di un hòmber vèrsá den e Lei. Hesus no a bis’é kiko pa hasi. Si Hesus a hasi esei, e hòmber probablemente lo no a reakshoná faborabel ya ku e tabata pegá na su kreensianan. En bes di esei, Hesus a referí na e Skritura, a anim’é pa ekspresá su punto di bista i a yud’é rasoná usando un komparashon.—Luk. 10:25-37.
5 E Palabra di Dios por yuda hende kita for di siñansa religioso falsu. (Heb. 4:12) Si nos tene pasenshi pa laga e bèrdat yega na nan kurason, nos lo por yuda nan rechasá tur loke ta falsu i aseptá e bèrdat ku lo hasi nan liber.—Juan 8:32.