Siña Otro Hende Stima Yehova
1 Bo ta kòrda e promé biaha ku bo a tende di Yehova? Kiko ta loke a atraé bo na dje? Hopi hende sinsero lo bisa ku loke a yuda nan hala serka nos Kreador ta ora nan a siña konosé su kualidatnan inkomparabel, spesialmente su kompashon i amor.—1 Juan 4:8.
2 “Esaki Ta Nos Dios”: E buki Beibel Ta Siña ta enfatisá Yehova su amor i e importansia di tin un relashon personal kuné. Kon nos por usa e publikashon akí pa yuda hende haña mas amor pa Dios? Ora nos ta bai enfoká riba un punto nobo, hasi preguntanan ku ta pone e studiante pensa. Lo bo por puntra entre otro: “Kiko e bèrdat akí ta revelá tokante Yehova?” òf “Den ki manera e punto akí ta duna prueba ku Yehova ta e mihó Tata ku un hende por deseá?” E método akí di siña hende por yuda e studiante kuminsá un relashon duradero ku Yehova.
3 Ora nos yuda studiantenan di Beibel mira ku ta un gran privilegio pa gana konosementu di e úniko Dios bibu i berdadero, nan lo rekonosé, loke e palabranan di Isaias ta bisa, “esaki ta nos Dios.” (Isa. 25:9) Ora nos ta splika e Palabra di Dios, nos mester enfatisá kon humanidat lo ser bendishoná ora Yehova kumpli ku su propósito bou di e reinado di Kristu Hesus.—Isa. 9:6, 7.
4 Prueba di Nos Amor pa Yehova: Nos sa ku stima Yehova ku henter nos kurason, alma i mente ta enserá mas ku solamente loke nos ta sinti pa Dios. Nos mester ahustá nos manera di pensa na su manera di pensa i pega na esei. (Sal. 97:10) Nos por duna prueba di nos amor pa Dios dor di obedesé tur su mandamentunan i dor di sigui partisipá den “kondukta santu i deboto,” asta ora nos haña nos ku prueba i oposishon.—2 Ped. 3:11; 2 Juan 6.
5 Pa un hende ku stima Dios ta un plaser pa hasi su boluntat. (Sal. 40:8) E studiante di Beibel mester realisá ku tur Dios su mandamentunan ta pa e bienestar eterno di Su sirbidónan. (Deu. 10:12, 13) Ora un hende sigui Yehova su guia, e ta demostrá apresio profundo pa tur Su obranan maravioso. Nos tin ku yuda e studiante komprondé ku hende ku ta kana den Yehova su kamindanan hustu lo evitá hopi problema i tristesa.
6 Bendishon pa Esnan Ku Ta Stima Dios: Yehova ta stima esnan ku stim’é profundamente, i e ta revelá ‘e kosnan profundo di dje’ na nan. (1 Kor. 2:9, 10) Ku e konosementu ei di Yehova su propósito, nan tin un mihó bista di futuro i un speransa sigur. (Jer. 29:11) Esnan ku ta stima Yehova lo risibí su bondat ekstraordinario. (Eks. 20:6, NW ) Nan ta balorá e speransa di bida eterno ku ta prueba di e gran amor ku Dios tin pa nan.—Juan 3:16.
7 Mas nos siña konosé nos Tata selestial, mas nos tin pa kompartí ku otro hende. (Mat. 13:52) Ta un gran privilegio pa nos siña otro hende stima Yehova, i spesialmente nos yunan! (Deu. 6:5-7) Laga nos, huntu ku nos studiantenan di Beibel, alabá Yehova kontinuamente for di abundansia di nos kurason segun ku nos ta eksperensiá su “gran bondat.”—Sal. 145:7.
[Study Questions]
1. Kiko ta loke ta atraé algun hende na Yehova?
2, 3. Kon nos por usa e buki Beibel Ta Siña pa yuda studiantenan di Beibel haña mas amor pa Yehova?
4, 5. Kiko amor pa Yehova ta enserá?
6. Ki bendishon un hende ku ta stima Yehova por risibí?
7. Kon bo ta sinti ora bo ta siña otro hende stima Yehova?