Bo Por Ta un Maestro!
1 Un di e aspektonan di e ministerio ku ta duna mas satisfakshon ta esun di siña un hende e bèrdat. No tin nada mas balioso ku mira e bon reakshon di un hende na e mensahe di Reino i hasi esfuerso pa yud’é hala serka e Soberano di universo. (Sant. 4:8) Tur publikadó di Reino mester tin e meta pa siña hende ku tin hamber pa e bèrdat i mira kon e persona ei ta kuminsá hasi kambionan signifikativo den su personalidat, kondukta i manera di pensa.—Mat. 28:19, 20.
2 Konfia den Yehova: Den pasado, tabatin sirbidónan fiel ku a sinti ku nan no por hasi e trabou ku Yehova a asigná na nan. Konfiansa den Yehova Dios a yuda Moisés, Jeremias, Amos i otro hende komun pa vense duda òf insiguridat ku nan tabatin tokante nan mes i kumpli ku un gran trabou. (Eks. 4:10-12; Jer. 1:6, 7; Amos 7:14, 15) Apòstel Pablo tambe a ‘haña kurashi.’ Kon el a logra esaki? El a revelá ku tabata pa medio di konfiansa “den nos Dios.” (1 Tes. 2:2) Sí, nos tur por konfia den Yehova pa nos haña e yudansa, sabiduria i forsa nesesario pa kondusí estudionan di Beibel produktivo.—Isa. 41:10; 1 Kor. 1:26, 27; 1 Ped. 4:11.
3 Aseptá Entrenamentu: Nos Gran Instruktor, Yehova Dios, ta duna entrenamentu mediante un programa regular di edukashon basá riba Beibel pa nos por ta kompletamente ekipá komo maestronan. (Isa. 54:13; 2 Tim. 3:16, 17) Aseptá e entrenamentu akí dor di probechá di tur oportunidat pa oumentá bo komprondementu bíbliko i mehorá bo abilidat di siña hende bèrdatnan bíbliko. Esaki ta e propósito prinsipal di e Skol di Ministerio Teokrátiko i e Reunion di Sirbishi. Ademas di e reunionnan akí, tur e otro reunionnan di kongregashon ta entrená nos pa siña hende for di e Palabra di Dios.
4 Buska maneranan simpel pa siña hende bèrdatnan spiritual profundo. E buki Skol di Ministerio, na página 227, ta splika: “Pa otro hende por komprondé bo tema, abo mes mester komprond’é bon.” Ora nos ta duna komentario na reunion, esei por yuda nos kòrda puntonan prinsipal ku nos tin mester di dje den futuro. Pues prepará bon, i lo bo haña mas konfiansa den bo abilidat di siña hende.
5 For di prinsipio, predikadónan kristian a siña for di otro den e trabou di hasi disipel. (Luk. 10:1) Si ta posibel, bai estudio di Beibel ku publikadónan ku eksperensia, inkluso pionero-, ansiano- i superintendentenan biahero. Tuma nota kon nan ta usa komparashonnan fásil i otro medionan di enseñansa ku tin den nos publikashonnan di estudio pa splika bèrdatnan bíbliko. Pidi nan sugerensia pa yuda bo bira un mihó maestro. (Pro. 1:5; 27:17) Sea gradisidu pa e entrenamentu akí, pasobra en realidat e ta bini di Dios.—2 Kor. 3:5.
6 Konfia den Yehova, i benefisiá di e entrenamentu ku e ta duna. Hasi orashon na Yehova pa e yuda bo progresá. (Sal. 25:4, 5) Abo tambe por haña e goso di yuda un hende bira, meskos ku bo, un maestro di e Palabra di Dios!
[Study Questions]
1. Ki oportunidat úniko tur publikadó di Reino tin?
2. Dikon algun publikadó ta vasilá pa kondusí un estudio di Beibel, i kiko por yuda nan vense e problema akí?
3, 4. Ki entrenamentu ta disponibel pa yuda nos den e trabou di siña hende e Palabra di Dios?
5. Ki entrenamentu adishonal nos tin den kongregashon pa yuda nos progresá komo maestro?
6. Kiko ta esensial pa bira un maestro di e Palabra di Dios?