“Keda den e Amor di Dios”
1. Ku ki propósito a publiká e buki “Keda den e Amor di Dios”?
1 E siman di 5 di novèmber nos lo kuminsá studia e buki “Keda den e Amor di Dios” na e Estudio di Beibel di Kongregashon. Bo ta ansioso pa e dia yega? E karta ku e Kuerpo Gobernante a skirbi na tur esnan ku stima Yehova ta bisa na final: “Nos ta spera sinseramente ku e buki akí lo yuda bo sigui apliká e bèrdat den bo bida i asina ‘keda den e amor di Dios . . . ku bida eterno na bista.’—Hudas 21.”
2. Den ki aspekto di bida e buki akí lo yuda nos?
2 Kiko Nos Por Spera: Kon nos por apliká prinsipionan bíbliko den asuntunan manera asosiashon, entretenimentu, rèspèt pa outoridat, kustumbernan personal, matrimonio, abla i tradishon? E publikashon akí lo yuda nos moldia nos konsenshi di akuerdo ku e normanan haltu di hustisia ku nos por haña den e Palabra di Dios. (Sal. 19:7, 8) Segun ku nos ta haña un mihó komprondementu di Yehova su manera di pensa, nos deseo pa agrad’é lo motivá nos pa obedes’é den tur aspekto di nos bida.—Pro. 27:11; 1 Huan 5:3.
3. Dikon nos tin ku hasi esfuerso pa komentá tur siman na e estudio?
3 No Keda sin Partisipá: Prepará ku e meta pa alabá Dios meimei di su pueblo kongregá. (Heb. 13:15) Henter e kongregashon lo studia i konsiderá e publikashon akí huntu. E echo ku lo no abarká hopi material lo duna nos chèns pa ta mihó prepará pa asina nos por kompartí ku konfiansa loke nos a siña. Nos komentarionan bon prepará i al kaso lo stimulá otro pa mustra amor i hasi bon obra, i lo kontribuí pa e estudio ta animante i benefisioso. (Heb. 10:24) Ademas, ora nos komentá tokante nos fe, nos ta sinti nos felis.
4. Dikon ta asina importante pa nos kumpli ku e mandamentunan di Yehova?
4 Riba e último anochi promé ku Hesus a muri, el a mustra e relashon ku tin entre kumpli ku e mandamentunan di Yehova i keda den e amor di Dios. (Huan 15:10) E buki “Amor di Dios” lo yuda nos pa ta mas determiná ku nunka pa apliká prinsipionan bíbliko den nos bida diario i pa “keda den e amor di Dios.”—Hudas 21.