Nos Sirbishi Ta un Muestra di Nos Amor pa Dios
1. Kiko amor pa Dios a motivá Hesus pa hasi?
1 Amor a motivá Hesus pa kumpli ku su sirbishi. Tur aspekto di su sirbishi tabata un prueba innegabel di e amor ku e tabatin pa Yehova. Hesus a bisa: “Pa mundu por sa ku mi ta stima e Tata, i manera e Tata a ordená mi, asina mi ta hasi.” (Juan 14:31) Komo siguidó di Hesus, nos tambe tin e privilegio di demostrá nos amor profundo pa Dios pa medio di nos sirbishi.—Mat. 22:37; Efe. 5:1, 2.
2. Ki efekto nos amor pa Yehova tin riba nos sirbishi?
2 “Bo Nòmber Sea Santifiká”: Ora nos ta probechá na un manera entusiasmá di tur oportunidat pa papia ku otro hende tokante Yehova i su Reino, nos ta demostrá nos amor pa Dios i, de echo, ta kontribuí na e santifikashon di su nòmber. (Sal. 83:18, NW; Eze. 36:23, NW; Mat. 6:9) Meskos ku tabata e kaso ku e sirbishi di Hesus, nos sirbishi tambe ta un muestra kontinuo di nos deseo sinsero pa e nòmber di Yehova keda santifiká i pa su boluntat sosodé.—Mat. 26:39.
3. Kon nos amor pa Yehova por yuda nos vense opstákulo?
3 Amor Ta Motivá Nos pa Vense Opstákulo: Amor pa Yehova ta surpasá tur barera. (1 Kor. 13:4, 7) Hesus a hañ’é ku vários sirkunstansia di bida ku lo por a strob’é di kumpli ku su sirbishi. Ma ora el a topa ku opstákulo, su amor profundo pa Yehova i su deseo pa hasi Yehova su boluntat a yud’é vense esakinan. (Mar. 3:21; 1 Ped. 2:18-23) Nos tambe ta haña nos ku hopi difikultat, pero nos amor pa Dios por yuda nos vense nan. Si nos pega na e ehèmpel ku Kristu a laga pa nos, nos por sinti nos hopi sigur, i nos lo no laga nada stroba nos di kumpli ku nos sirbishi. Ounke oposishon di famia, problema ku salú òf aktitut indiferente di e hendenan den teritorio por afektá nos, esei no ta stroba nos di demostrá nos amor pa Yehova dor di kumpli ku nos sirbishi na un manera mas efikas posibel.
4. Ki privilegio nos amor pa Yehova ta duna nos?
4 Amor tin poder, i nos tin e privilegio di por demostrá e amor profundo ku nos ta sinti pa Yehova pa medio di nos sirbishi. (1 Kor. 13:13) Segun ku nos ta aserká rápidamente e tempu pa e nòmber di Yehova keda santifiká ún biaha i pa semper, laga nos ‘amor abundá mas i mas ainda.’—Fil. 1:9; Mat. 22:36-38.