Alabá Yehova Tur Dia
1. Kiko Dios su sirbidónan ta sinti nan motivá pa hasi, i dikon?
1 Rei David a ekspresá su determinashon pa alabá Yehova “tur dia,” te na tempu indefiní. (Sal. 145:2, 7, 21) Nos tambe tin bon motibu pa alabá Yehova tur dia.—Sal. 37:10; 145:14, 18; 2 Ped. 3:13.
2. Kon famianan por alabá Yehova tur dia?
2 Den Nos Kas: Nos tin literatura edifikante ku nos ta usa ora nos ta trata kosnan spiritual. Entre otro, ora nos ta konsiderá e teksto di dia, ora nos ta disfrutá di nos Adorashon Komo Famia i ora nos ta prepará pa reunionnan di kongregashon. Hopi famia ta hasié un kustumber pa kome huntu maske ta ún bes pa dia. Di e manera ei, nan ta haña oportunidat di kòmbersá ku otro den un ambiente relahá i di alabá Yehova. Ora mayornan ta disfrutá di kòmbersashonnan asina ku nan yunan, esei ta yuda nan lanta e yunan den “e disiplina i instrukshon di Señor.”—Efe. 6:4; Deu. 6:5-7.
3. Ki oportunidat nos tin ora nos ta ku nos rumannan?
3 Ora Nos Ta ku Nos Rumannan: Nos tin un ekselente oportunidat pa alabá Yehova huntu ku nos rumannan den fe ora nos ta den sirbishi di vèlt òf na reunionnan di kongregashon. (Pro. 15:30; Fil. 4:8; Heb. 13:15) Ya ku nos tur ta stima Yehova, ta fásil pa inkluí ekspreshonnan sinsero di apresio pa Yehova su bondat den nos kòmbersashonnan ku otro.—Sal. 106:1.
4. Bou di ki sirkunstansianan bo por alabá Yehova?
4 Ora Nos Ta Papia ku Otro Hende: Kisas nos sirkunstansia no ta permití nos pa partisipá den e ministerio públiko tur dia, pero si nos papia tokante Yehova i su propósitonan maske ta un ratu asina ku kolega di trabou, kompañero di skol i otro hende rònt di nos, nos lo por duna speransa na esnan ku ta sinsero. (Sal. 27:14; 1 Ped. 3:15) Un ruman muhé ku tabata na bordo di un avion a logra duna testimonio na un pasahero. Loke e ruman a bis’é a konsol’é i anim’é asina tantu ku el a duna e ruman muhé su adrès i number di telefòn pa nan por keda den kontakto ku otro. Miéntras ku e mundu ta sufri mas i mas debí na problema- i kondishonnan ku ta sigui empeorá, Yehova su pueblo ta sigui hiba “bon nobo di felisidat” pa esnan ku ta dispuesto na skucha. Esaki ta duna otro hende speransa i motivá nan pa alabá Yehova.—Isa. 52:7; Rom. 15:11.
5. Dikon nos ta deseá di alabá Yehova, i kiko esaki lo logra?
5 Esta kontentu Yehova ta sintié ora e tende su sirbidónan alab’é tur dia! Meskos ku den kaso di Yehova su kreashon visibel ku ta rònt di nos, nos tambe por alabá Yehova tur dia den nos kas, den kongregashon i ora nos ta papia ku otro hende ku ainda no a bira alabadó di Yehova.—Sal. 19:1-4.