“Bin, Sigui Mi”
1. Ki oportunidat nos ta haña durante e Estudio di Beibel di Kongregashon den e lunanan binidero?
1 E kuater Evangelionan ta duna mas detaye di Hesus su bida. Siendo ku kristiannan tin ku “sigui den su pasonan,” nos lo kier prepará bon i pone bon atenshon segun ku nos ta studia e buki “Bin, Sigui Mi” na e Estudio di Beibel di Kongregashon ku ta kuminsá e siman di 1 di mart. (1 Ped. 2:21; Mar. 10:21) Ta bale la pena pa nos enfoká riba e aspektonan di Hesus su bida ku por yuda nos den nos ministerio.
2. Kon e echo ku Hesus a perseverá por yuda nos?
2 E Ehèmpel Ku Hesus A Pone: Bo a yega di topa hende ku no a reakshoná positivo den e trabou di kas pa kas? Ora hende reakshoná asina, nos ta komprondé pakiko Hesus a bisa: “Si nan a persiguí mi, boso tambe nan lo persiguí.” (Juan 15:20) Ta klaru ku bo no por generalisá i bisa ku tur reakshon negativo ta un forma di persekushon. Den kaso di Hesus, ta e goso poné su dilanti a yud’é wanta tur tipo di prueba. Nos tambe por enfoká riba kon pa gana Yehova su aprobashon i riba e rekompensa ku nos ta haña pa nos fieldat. Esaki lo yuda nos pa “no kansa i pèrdè ánimo.” (Heb. 12:2, 3; Pro. 27:11) Segun ku nos ta perseverá den sirbishi, nos por tin konfiansa ku nos lo tin Kristu Hesus su sosten.—Mat. 28:20.
3. Kon nos por imitá Hesus su punto di bista di sirbishi?
3 “Pa e Propósito Akí Mi A Wòrdu Mandá”: E trabou di prediká e Reino tabata e kos di mas importante den Hesus su bida. (Luk. 4:43) Hesus a duna generosamente di su mes den sirbishi. El a konsiderá su sirbishi komo algu urgente. Semper e tabata buska oportunidat pa papia tokante e Reino. Komo siguidó di Kristu nos ta sigui su ehèmpel. Kiko esaki lo motivá nos pa hasi? Ora nos ta hasi nos kosnan di tur dia, nos lo topa hende ku ken nos por kompartí e bon nobo? Ohalá ku e amor di Kristu ta obligá nos, es desir, konmové nos pa kompartí e bon nobo ku mas tantu hende posibel!—2 Kor. 5:14.
4. Den ki maneranan nos por mehorá e kalidat di nos sirbishi?
4 “Nunka un Hende No A Papia Manera e Hòmber Akí Ta Papia”: Hesus su oyentenan a keda asombrá pa e manera ku e tabata siña hende. (Juan 7:46; Mat. 7:28, 29) Dikon e tabata diferente for di e otro maestronan? Wèl, el a stima e bèrdatnan ku e tabata siña hende, el a stima e hendenan ku e tabata siña i el a usa vários métodonan di siña hende. Pues, si nos imitá e Gran Maestro, nos por mehorá e kalidat di nos sirbishi.—Luk. 6:40.
5. Kiko mester ta nos meta segun ku nos ta studia e buki “Bin, Sigui Mi”?
5 Esaki ta djis algun kos balioso ku nos ta siña di Hesus su bida. Ki otro tesoronan bo por haña? Segun ku bo ta siña mas di e bida di Hesus durante e Estudio di Beibel di Kongregashon, pone meta “pa konosé e amor di Kristu” i sigui su ehèmpel.—Efe. 3:19.