Mi Ta Hasiendo Sufisiente?
1. Ki preokupashon un kristian fiel por tin?
1 Bo a yega di hasi bo mes e pregunta ei? Kisas edat, salú òf responsabilidat di famia no ta permití bo partisipá dje hopi ei mas den sirbishi i esei ta pone bo sinti desanimá. Un ruman muhé ku tin tres yu a skirbi ku tin bes e ta sintié kulpabel pasobra e tempu i energia ku e tin ku dediká na kuida su famia ta pone ku e no por hasi hopi den sirbishi. Kiko lo yuda nos mira e situashon na un manera balansá?
2. Kiko Yehova ta ferwagt di nos?
2 Loke Yehova Ta Ferwagt di Nos: Ta mas ku klaru ku nos tur lo ke hasi mas den sirbishi. Pero hopi bes tin un gran diferensia entre loke nos ke hasi i loke realístikamente nos por hasi. E echo ku nos lo ke hasi mas ta mustra ku nos no ta indiferente. Nos mester kòrda ku Yehova sa bon kiko ta nos limitashonnan i no ta ferwagt pa nos kibra heru ku man. (Sal. 103:13, 14) Ta kiko e ta ferwagt di nos? E ke pa nos sirbié ku henter nos kurason i dun’é lo mihó.—Kol. 3:23.
3. Kiko por yuda nos evaluá si nos ta hasiendo sufisiente den sirbishi?
3 Kiko por yuda nos haña sa loke ta realístiko den nos kaso? Nos por pidi Yehova yuda nos mira nos situashon na un manera mas realístiko. (Sal. 26:2) Un amigu kristian madurá i di konfiansa ku konosé nos bon i ku no tin miedu di bisa nos si nos mester mehorá tambe por yuda nos. (Pro. 27:9) Kòrda tambe ku ta bon pa evaluá nos sirkunstansia regularmente ya ku e por kambia.—Efe. 5:10.
4. Kon nos mester mira e rekordatorionan bíbliko ku nos ta haña pa prediká e palabra?
4 Kon Nos Tin Ku Mira Rekordatorionan: Hopi biaha durante un kareda, e hendenan kantu di kaminda ta grita palabranan di animashon ora e koredónan ta pasa. E propósito ta pa yuda e koredónan yega e meta final i no pa kibra nan. Meskos tambe, e meta di e rekordatorionan bíbliko ku nos ta haña na nos reunionnan i den nos publikashonnan pa “prediká e palabra” urgentemente ta pa yuda nos i no pa pone nos sinti ku nos no ta hasiendo sufisiente esfuerso. (2 Tim. 4:2) Nos por tin konfiansa ku tanten ku nos ta sigui hasi nos bèst, Yehova lo keda kòrda nos ‘amor i trabou.’—Heb. 6:10.