E Kualidat Prinsipal di un Bon Maestro
1. Kua ta e kualidat prinsipal ku ta hasi un hende un bon maestro?
1 Kua ta e kualidat prinsipal ku ta hasi un hende un bon maestro di Beibel? Edukashon eskolar, eksperensia den e bèrdat òf abilidat natural? En realidat, loke ta hasi un hende un bon maestro ta e kualidat di amor ku e ta desplegá. Ta e mesun kualidat akí un hende tabatin ku desplegá pa kumpli ku Lei di Moises. E kualidat di amor tambe ta algu ku disipelnan di Hesus mester demostrá pa hende por mira ku nan ta su siguidónan. Es mas, amor ta e kualidat prinsipal i mas atraktivo di Yehova su atributonan.—Huan 13:35; Gal. 5:14; 1 Huan 4:8.
2. Dikon ta importante pa nos tin amor pa hende?
2 Amor pa Hende: E Gran Maestro, Hesus, tabatin amor pa hende i esaki a pone ku nan a skuch’é. (Luk. 5:12, 13; Huan 13:1; 15:13) Si nos tin interes den hende, nos lo prediká na tur oportunidat. P’esei, opstákulo manera persekushon i apatia lo no desanimá nos. Tambe nos lo mustra interes sinsero den hende ku nos ta prediká na dje i ta adaptá nos presentashon pa kuadra ku nan sirkunstansia- i preokupashonnan. Anto nos lo ta dispuesto tambe pa dediká tempu na kada studiante di Beibel i tuma tempu pa prepará di antemano pa kada estudio.
3. Kon amor pa bèrdatnan bíbliko lo yuda nos den sirbishi?
3 Amor pa Bèrdatnan Bíbliko: Hesus a stima bèrdatnan bíbliko; nan tabata manera tesoro p’e. (Mat. 13:52) Si nos tin amor pa e bèrdat, nos lo papia ku entusiasmo ora nos ta prediká i esaki por animá nos oyentenan. Amor lo yuda nos tambe pa enfoká riba e informashon balioso ku nos ta kompartí ku hende en bes di enfoká riba nos limitashonnan ku ta pone nos bira nèrvioso den sirbishi.
4. Kon nos por kultivá amor?
4 Kultivá Amor: Pero kon nos por kultivá amor pa hende? Nos por hasi esei ora nos ta reflekshoná riba e amor ku Yehova i su Yu a mustra i tambe riba e kondishon spiritual deplorabel di hende den nos teritorio. (Mar. 6:34; 1 Huan 4:10, 11) Nos amor pa bèrdatnan bíbliko lo bira mas fuerte ora nos ta studia i meditá riba un base regular. Amor ta un aspekto di e fruta di spiritu. (Gal. 5:22) P’esei, nos por resa pidi Yehova pa su spiritu santu i pidié tambe pa yuda nos krese den amor. (Luk. 11:13; 1 Huan 5:14) Sea kual sea nos edukashon eskolar, eksperensia den e bèrdat òf abilidat natural, nos por ta un bon maestro di Beibel ora nos ta mustra amor.