Ki ‘Motibu Abo Tin pa Bo Ta Masha Kontentu’?
1. Na fin di luna, dikon nos tur mester ta masha kontentu?
1 Ora nos entregá nos rapòrt di sirbishi di vèlt na fin di luna, nos tur tin “motibu pa ta masha kontentu.” (Gal. 6:4) Sea ku nos ta pionero spesial i ta dediká 130 ora den sirbishi òf nos ta publikadó aprobá pa raportá frakshonnan di 15 minüt, nos tur mester sinti nos masha kontentu di por rindi sirbishi na Yehova di henter nos alma.—Sal. 100:2.
2. Dikon nos tin ku duna Yehova lo mihó di nos mes?
2 Komo e Señor Soberano di universo, Yehova meresé pa nos dun’é lo mihó di nos. (Mal. 1:6) Amor pa Yehova a motivá nos pa dediká nos bida pa hasi su boluntat. Pues, si nos a duna lo mihó di nos tempu, abilidat i energia den e sirbishi di Yehova, na fin di dia òf di luna nos kada un lo tin motibu pa ta masha kontentu. (Pro. 3:9) Sinembargo, si nos konsenshi ta bisa nos ku nos por a duna mas, nos mester skuch’é i analisá kon nos por mehorá.—Rom. 2:15.
3. Dikon no ta sabí pa kompará nos mes ku otro hende?
3 ‘Sin Kompará Nos Mes ku Otro Hende’: Lo no ta sabí pa kompará nos mes ku otro hende òf ku nos mes tempu nos tabatin mas energia. Tene kuenta ku sirkunstansia ta kambia i kada ken tin su abilidatnan. Hopi biaha, ora un hende ta hasi komparashon, e ta haña gana di kompetí òf e ta sinti ku e no ta bal nada. (Gal. 5:26; 6:4) En bes di hasi komparashon, Hesus a elogiá kada persona a base di loke e persona por a hasi.—Mar. 14:6-9.
4. Ki lès importante nos por siña for di e ilustrashon di e talentonan?
4 Den Hesus su ilustrashon di e talentonan, kada esklabo a haña talento “segun su kapasidat.” (Mat. 25:15) Ora e doño a bolbe pa hasi kuenta ku nan, el a elogiá esnan ku a traha diligentemente segun nan abilidat i sirkunstansia. Anto el a bisa nan pa drenta i kompartí su alegria. (Mat. 25:21, 23) Si nos tambe keda okupá den e trabou di prediká e Reino, nos por tin konfiansa ku nos lo risibí e aprobashon di Dios i nos lo tin motibu pa ta masha kontentu.