Protehá Bo Konsenshi
1. Kiko ta e tema di e dia spesial di asamblea pa aña di sirbishi 2013, i kiko ta e propósito di e programa?
1 Tur dia di nobo nos ta haña nos ku situashonnan ku por pone nos konsenshi na prueba. P’esei e programa pa e dia spesial di asamblea pa aña di sirbishi 2013, ku ta kuminsá dia 1 di sèptèmber 2012, tin komo tema “Protehá Bo Konsenshi.” (1 Tim. 1:19) A prepará e programa akí pa yuda nos reflekshoná seriamente riba e manera ku nos ta usa e balioso regalo akí ku nos a haña di nos Kreador.
2. Ki preguntanan lo keda kontestá durante e programa?
2 Kontenido di e Programa: Durante e programa lo kontestá shete pregunta importante tokante konsenshi:
• Kiko por daña nos konsenshi?
• Kon nos por entrená nos konsenshi?
• Kiko nos tin ku hasi pa keda liber di kulpa di sanger di hende?
• Kiko nos ta demostrá ora nos ta pensa i aktua a base di prinsipionan di Beibel?
• Kon nos por evitá di heridá konsenshi di otro hende?
• Hóbennan, kon boso por keda firme ora boso ta enfrentá prueba?
• Ki bendishon hende ku ta sigui nan konsenshi dirigí pa spiritu santu lo risibí?
3. Kon nos por benefisiá di e programa?
3 Ku Yehova su yudansa nos por para firme kontra e intentonan di Satanas pa korumpí nos konsenshi. Nos Tata selestial stima nos, i pa medio di su Palabra i organisashon e ta bisa nos: “Esaki ta e kaminda. Kana den dje.” (Isa. 30:21) E programa akí ta un di e maneranan ku Yehova ta mustra nos kon nos tin ku kana. P’esei hasi sigur pa bo t’ei henter e programa. Presta bon atenshon i reflekshoná riba kon bo por apliká loke bo a siña den bo bida. Ademas, tuma tempu pa repasá e programa huntu komo famia. Ora nos praktiká loke nos siña, nos lo “mantené un konsenshi limpi” i lo no laga e plaser pasahero di e mundu di Satanas desviá nos for di e kaminda di bida.—1 Ped. 3:16.