Usa Presentashon Ku Ta Efektivo
1. Kiko nos por siña for di e echo ku e promé kristiannan a varia e manera ku nan a presentá e mensahe?
1 E promé kristiannan a prediká e bon notisia na hende di diferente kultura i religion. (Kol. 1:23) Aunke semper nan a papia di e mesun tema—e Reino di Dios—nan a varia e manera ku nan a present’é di akuerdo ku e públiko. Por ehèmpel, ora Pedro a papia ku algun hudiu ku tabatin rèspèt pa e Skritura, el a kuminsá na sita e palabranan di profeta Yoël. (Echo. 2:14-17) Di otro banda, wak kon Pablo a rasoná ku e griegonan manera Echonan 17:22-31 ta trese padilanti. Awe, den algun teritorio nos ta topa hende ku tin rèspèt pa Beibel i nos por us’é libremente den nos trabou di kas pa kas. Sinembargo, kisas nos mester ta mas diskreto ora nos ta papia ku hende ku no ta kristian òf ku no ta interesá den Beibel òf den religion.
2. Kon nos por usa e oferta di literatura pa yuda tantu hende ku tin rèspèt pa Beibel komo esnan ku no tin esei?
2 Hasi Bon Uso di e Oferta di Literatura: E aña di sirbishi akí, e oferta di literatura lo kambia kada dos luna i lo e enfoká mas riba revista, tratado i foyeto. Maske algun hende den e teritorio no ke papia tokante Beibel, tòg nos por bisa algu ku por lanta nan interes. Kisas nos no ta menshoná Beibel ni lesa un teksto na e promé bishita, pero si e persona mustra interes, ta bon pa nos bai bèk pa yud’é haña fe den e Kreador i den su Palabra. Di otro banda, si e persona tin rèspèt pa Beibel, nos por usa esaki den nos presentashon i ofresé e persona literatura bíbliko. De echo, semper nos por ofresé e buki Beibel Ta Siña òf e foyetonan Skucha Dios òf Skucha Dios i Biba pa Semper, sea kual sea e oferta di luna. E kos importante ta pa usa presentashon ku ta efektivo.
3. Den ki sentido kurason di hende ta manera tereno pa planta?
3 Prepará e Tereno: Por kompará kurason di hende ku tereno pa planta. (Luk. 8:15) Tin tereno mester di mas preparashon pa e simianan di bèrdat bíbliko por saka rais i krese. E disipelnan di promé siglo a logra planta simia di e bèrdat den tur tipo di tereno, i esei a duna nan goso i satisfakshon. (Echo. 13:48, 52) Nos tambe por tin e mesun éksito ora nos pone atenshon na e manera ku nos ta introdusí e mensahe i desaroyá nos presentashon.