Tuma e Profetanan Komo Ehèmpel: Yonas
1. Ki bon kualidatnan Yonas tabatin?
1 Ora bo pensa riba profeta Yonas, kiko ta e promé kos ku ta bini na bo mente? Kisas algun hende ta haña ku e tabata un kobarde òf un persona sin sintimentu. Pero, sin duda el a mustra humildat, kurashi i un spiritu di sakrifisio propio. Kon nos por imitá su bon kualidatnan?—Sant. 5:10.
2. Kon nos por imitá Yonas su humildat?
2 Humildat: Na momento ku Yonas a haña su asignashon, el a hui bai den e direkshon kontrali. Esaki no ta un sorpresa pasobra e asirionan tabata hopi violento, i Nínive tabata konosí komo “e stat tur na sanger.” (Nah. 3:1-3) Sinembargo, Yonas a mustra humildat ora Yehova a disiplin’é i a aseptá e asignashon ora el a haña un di dos chèns. (Pro. 24:32, NW; Yon. 3:1-3) Pues, aunke Yonas na promé instante a bula pipa pa su asignashon, tòg despues el a kumpli ku e boluntat di Yehova. (Mat. 21:28-31) Nos tin e mesun determinashon pa prediká e bon notisia, asta ora nos risibí disiplina òf ora e teritorio ta difísil?
3. Pakiko nos mester tin kurashi i e spiritu di sakrifisio propio pa prediká e bon notisia?
3 Kurashi i Sakrifisio Propio: Ora Yonas a realisá ku su mal desishon a pone bida di e marineronan na peliger, e tabata dispuesto pa sakrifiká su bida. (Yon. 1:3, 4, 12) Mas despues, riba kaminda pa su asignashon na Nínive, el a kana bai te den e sentro di e stat, probablemente pa buska un bon lugá pa proklamá e huisio di Yehova. E akshonnan akí no ta di un kobarde, sino mas bien di un hende yen di kurashi! (Yon. 3:3, 4) Kiko di nos awe? Nos tin ku pidi Dios kurashi pa por prediká ora nos enfrentá oposishon. (Echo. 4:29, 31) I tambe nos mester tin e spiritu di sakrifisio propio pa duna di nos tempu i rekursonan den sirbishi.—Echo. 20:24.
4. Dikon nos mester tuma tempu pa meditá riba e bon ehèmpelnan ku e profetanan di Yehova a laga pa nos?
4 Kada bes ku bo lesa un relato di un profeta di Dios, purba pone bo mes den su lugá. Puntra bo mes: ‘Kiko ami lo a hasi? Kon mi por imitá e profeta akí su bon kualidatnan den mi bida?’ (Heb. 6:11, 12) Den futuro Nos Ministerio di Reino lo trata mas di e lèsnan balioso ku nos por siña for di otro profeta fiel di Yehova.