Kiko Ta Motivá Nos pa Prediká?
1. Amor pa ken ta motivá nos pa prediká?
1 E mihó trabou ku nos por hasi awe ta di prediká e bon notisia di e Reino di Dios. Sí, ku e aktividat akí nos ta demostrá ku nos ta obedesé e dos mandamentunan di mas grandi, esta, di stima Yehova i stima nos próhimo. (Mar. 12:29-31) Amor ta un forsa poderoso ku por motivá nos pa prediká ku entusiasmo.—1 Huan 5:3.
2. Kon nos ta mustra amor pa Yehova pa medio di e trabou di prediká?
2 Amor pa Yehova: E amor ku nos ta sinti pa nos mihó Amigu, Yehova Dios, ta motivá nos pa defendé su reputashon ku Satanas a bin ta daña pa un seis mil aña kaba. (2 Kor. 4:3, 4) Ta pa Satanas su motibu hende ta kere ku Dios ta tormentá pekadónan den un fièrnu di kandela, ku e ta parti di un Trinidat misterioso i ku e no ta interesá den hende. Hopi hende a yega asta na e konklushon ku Dios no ta eksistí. Pero nos ke pa nan sa e bèrdat tokante nos tata selestial. Nos esfuersonan diligente pa duna testimonio tokante Dios ta hasié masha kontentu i ta frustra Diabel su plannan.—Pro. 27:11; Heb. 13:15, 16.
3. Pakiko nos trabou di prediká ta un muestra di nos amor pa próhimo?
3 Amor pa Próhimo: Kada bes ku nos prediká na un hende, nos ta demostrá nos amor p’e. Den e tempu krítiko akí ta masha urgente pa hende skucha e bon notisia. Hopi hende ta manera e ninivitanan di e tempu di Yonas ku no tabata “sa e diferensia entre nan man drechi i [nan] man robes.” (Yon. 4:11) Nos trabou di prediká ta siña hende kon pa ta felis i tin éksito den bida. (Isa. 48:17-19) E ta duna nan speransa. (Rom. 15:4) Si nan skucha i kumpli ku loke nan ta siña, nan “lo ser salbá.”—Rom. 10:13, 14.
4. Kiko Yehova lo no lubidá hamas?
4 Un mucha ku ta stima su mama ku su tata no ta demostrá su amor pa nan na sierto okashon so. Mas bien, e ta purba demostrá su amor na tur momento. Asina tambe, nos gran amor pa Yehova i pa nos próhimo lo motivá nos pa probechá di tur oportunidat ku presentá pa duna testimonio, no solamente ora nos ta prediká di kas pa kas. Pues, nos lo prediká sin stòp. (Echo. 5:42) Hamas Yehova lo lubidá e amor ku nos ta demostrá.—Heb. 6:10.