Mayornan, Usa Nos Website pa Siña Boso Yunan
1. Kiko ta e meta di e sekshon “Niños” riba nos website?
1 Nos website, jw.org, ta diseñá pa interesá hende di tur edat. Bou di e sekshon “Niños” riba e website (bai na Enseñanzas bíblicas > Niños) tin informashon ku por yuda tantu mucha chikí komo nan mayornan hala serka di otro i di Yehova. (Deu. 6:6, 7) Kon mayornan por usa e sekshon akí pa siña nan yunan?
2. Kon mayornan por determiná si un informashon ta pas pa nan yu?
2 Sea Fleksibel: Kada yu ta diferente. (1 Kor. 13:11) Pues, komo mayor, kon bo por determiná si un informashon ta pas pa bo yu? Wèl, puntra bo mes: ‘Kiko lo kapta atenshon di mi yu? Kuantu kos nan lo komprondé? Kuantu tempu nan por konsentrá riba e informashon?’ Pa mucha di tres aña òf mas chikí, mayornan por usa e relatonan bou di “Mis primeras lecciones de la Biblia.” Algun famia ta usa e relatonan bíbliko ku tin bou di e sekshon “De padres a hijos.” Pero, ta bon pa bo wak e siguiente opshonnan tambe.
3. Kon mayornan por usa e relato- i aktividatnan ku tin bou di e sekshon “Ideas para la adoración en familia”?
3 Hasié un Proyekto: E sekshon “Ideas para la adoración en familia” tin sugerensianan práktiko pa yuda mayornan studia ku nan yunan. Pa haña sa kon por usa e relato- i aktividatnan di e sekshon akí, klek e boton “Descargar” i lesa e “Guía para los padres.” Por ehèmpel, na e “Actividad ilustrada,” mayornan por haña páginanan pa klùr ku ta ideal pa siña e yunan mas chikí. E “Proyecto de investigación” ta un aktividat ku mayornan por yuda nan yunan mas grandi kompletá. Komo ku tur e aktividatnan ku tin riba e página “Guia para los padres” ta korespondé ku e mesun relato òf lès di Beibel, tur yu, sin importá nan edat, tin e oportunidat di partisipá den e mesun proyekto durante e adorashon komo famia.
4. Kiko nos por haña bou di e sekshon “Hazte amigo de Jehová”?
4 Yuda Nan Bira Amigu di Yehova: E vidio-, kantika- i aktividatnan bou di e sekshon “Hazte amigo de Jehová” ta yuda mayornan siña nan yunan chikí e Palabra di Dios. (Deu. 31:12) Kada un di e vidionan kòrtiku akí ta siña e muchanan lèsnan importante. I e weganan riba e página di “Actividades,” tal manera ‘buska i haña,’ ta yuda nan komprondé e balor di e lèsnan ei. Komo ku mucha gusta kanta—i kantika ta yuda nan keda kòrda loke nan a siña—kada tantu tempu ta pone kantika di Reino i kantika pa mucha riba nos website.
5. Dikon mayornan mester pidi Yehova yuda nan pa siña nan yunan e bèrdat?
5 Mayornan, Yehova ke pa boso ta un bon tata i un bon mama pa boso yunan. Pues pidié yuda boso siña boso yunan e bèrdat. (Hues. 13:8) Ku Yehova su yudansa, boso por eduká boso yunan pa bira “sabí pa salbashon mediante fe den Kristu Hesus.”—2 Tim. 3:15; Pro. 4:1-4.