Tuma e Profetanan Komo Ehèmpel: Oséas
1. Ki pregunta bo por a yega di hasi bo mes?
1 Ora bo meditá riba Yehova su gran miserikòrdia i tur e bon kosnan ku e ta perkurá na abundansia, kisas bo a yega di puntra bo mes: ‘Ki sakrifisio mi ta dispuesto pa hasi pa Yehova?’ (Sal. 103:2-4; 116:12) Oséas tabata dispuesto pa hasi tur loke Yehova a mand’é hasi, aunke esaki a enbolbé sakrifisio personal. Kon nos por imitá Oséas su ehèmpel?
2. Kon nos por imitá Oséas su ehèmpel di perseveransia?
2 Prediká den Tempu Difísil: Oséas su mensahe tabata prinsipalmente na e reino di dies tribu di Israel, kaminda kasi niun hende no tabata sirbi Yehova mas. Rei Jeroboam II mes a hasi loke ta malu den bista di Yehova i a sigui ku e adorashon di bisé ku Rei Jeroboam I a praktiká. (2 Rei. 14:23, 24) Tur otro rei ku a bini despues a kontribuí na e dekadensia spiritual di e reino di dies tribu, ku finalmente a ser destruí na aña 740 promé ku Kristu. Oséas a sirbi Yehova fielmente durante 59 aña meimei di tur e adorashon falsu ei. Nos tambe tin e mesun determinashon pa prediká aña aden aña afó apesar di apatia òf persekushon?—2 Tim. 4:2.
3. Kon Oséas su bida a demostrá Yehova su miserikòrdia?
3 Enfoká Riba Yehova Su Miserikòrdia: Yehova a bisa Oséas: “Tuma pa bo mes un esposa prostituta.” (Osé. 1:2) Gomer, e esposa di Oséas, a haña un yu kuné, pero ta parse ku e dos yunan ku el a haña despues no tabata di Oséas. Oséas tabata dispuesto pa pordoná su kasá infiel, i su ehèmpel a demostrá e gran miserikòrdia ku Yehova a mustra na e reino arepentí di Israel. (Osé. 3:1; Rom. 9:22-26) Nos ta dispuesto pa hasi sakrifisio personal pa siña tur sorto di hende ku Yehova ta un Dios miserikòrdioso?—1 Kor. 9:19-23.
4. Kiko ta algun sakrifisio ku nos por hasi pa Yehova?
4 Algun sirbidó di Yehova a sakrifiká karera lukrativo pa nan por dediká mas tempu na e trabou di prediká. Otronan a opta pa no kasa òf haña yu pa asina nan por traha pa e interesnan di Reino. Kisas nos ta pensa ku nos no por imitá Oséas su ehèmpel. Pero, segun ku nos ta haña mas apresio pa Yehova su bondat inmeresí i ta dependé riba su spiritu santu pa fortalesa, Yehova por usa nos na maneranan ku nunka nos a kere ku lo ta posibel, manera el a hasi ku Oséas.—Mat. 19:26; Flp. 2:13.