Un Seri Práktiko pa Usa den Sirbishi
1. Kua ta e dos metanan di e seri “Un Kòmbersashon Interesante Tokante Beibel”?
1 Tempu tempu, E Toren di Vigilansia pa públiko tin e seri “Un Kòmbersashon Interesante Tokante Beibel.” E seri akí tin dos meta: presentá siñansa bíbliko na un manera ku ta atraé hende i yuda nos mira kon pa usa takto ora nos ta rasoná riba sierto tema. (1 Ped. 3:15) Kon nos por hasi bon uso di e artíkulonan akí?
2. Kon nos por usa e artíkulonan akí den sirbishi?
2 Usa Nan den Sirbishi: Lo ta bon pa nos warda algun ehemplar di E Toren di Vigilansia ku tin un artíkulo di e seri akí den nan. Ora un doño di kas, un persona interesá òf un studiante di Beibel hasi un pregunta òf bini ku un opheshon ku un di e artíkulonan akí a trata, nos lo por dun’é un ehemplar di e revista ku ta kontené e artíkulo ei i ofres’é pa analis’é huntu kuné. Si bo no tin e revista ku ta trata e artíkulo, bo por download esaki for di jw.org.
3. Kon nos por analisá un di e artíkulonan ku un doño di kas?
3 Kon nos por analisá un di e artíkulonan akí ku un persona? Algun publikadó ta pidi e persona pa hunga e ròl di e doño di kas i nan ta hunga e ròl di e Testigu. E manera akí di analisá e diálogo na bos haltu por duna bon resultado pasobra e ta laga e persona analisá nos kreensianan sin intimid’é.—Deu. 32:2.
4. Kon nos por usa e artíkulonan di e seri akí pa siña nos mes?
4 Siña Bo Mes i Bo Studiante di Beibel: Ora bo ta lesa e artíkulonan akí, tuma nota di e tekstonan, e ilustrashonnan i e forma di rasoná. Wak ku ki tono e publikadó ta trese e informashon padilanti. Despues purba sigui e ehèmpel akí den sirbishi. (Pro. 1:5; 9:9) Un ruman muhé a bisa: “Ora mi ta lesa e artíkulonan akí ta manera mi ta siña for di un kompañero pionero ‘perfekto’—un ku semper tin palabra na ora!”
5. Kon nos por yuda nos studiantenan di Beibel prepará pa sirbishi?
5 Nos por usa e artíkulonan akí tambe pa yuda nos studiantenan di Beibel prepará pa sirbishi. Lesa e informashon huntu, anto laga nan hunga e ròl di e publikadó. Esaki ta siña nan papia di nan kreensianan ku takto. (Kol. 4:6) Sin duda, e seri di artíkulonan akí ta un di e vários maneranan ku Yehova ta yuda nos “kumpli ku [nos] sirbishi kabalmente.”—2 Tim. 4:5.