Tuma e Profetanan Komo Ehèmpel: Mikéas
1. Ki pregunta Mikéas por tabatin na mente, pero dikon su predikashon no tabata enbano?
1 Bo a yega di puntra bo mes: ‘Ki dia e fin di e mundu malbado akí lo yega?’ Kisas profeta Mikéas tambe tabatin un pregunta asina na mente ora e tabata proklamá Yehova su mensahe di huisio kontra e reino di Israel i Huda. Pero, Mikéas su predikashon no tabata enbano, pasobra na aña 740 promé ku Kristu, miéntras Mikéas tabata na bida ainda, Yehova su profesia kontra di Samaria a kumpli. (Mik. 1:6, 7) Despues, na aña 607, Herúsalèm a ser destruí. (Mik. 3:12) Kon nos por imitá Mikéas segun ku nos ta warda riba Yehova su binidero dia di huisio?
2. Dikon nos tin ku warda ku pasenshi riba e dia di Yehova i kiko esei ta enserá?
2 Tene Pasenshi: Mikéas a skirbi: “Ma pa loke t’ami, lo mi warda riba [Yehova]; lo mi spera riba e Dios di mi salbashon.” (Mik. 7:7) Ta klaru ku Mikéas no a sinta man krusá warda e fin yega. El a keda aktivo den su trabou komo profeta. Segun ku nos ta warda riba e dia di Yehova, nos tambe mester ta okupá den aktonan di “kondukta santu i mester hasi obranan ku ta demostrá deboshon na Dios.” (2 Ped. 3:11, 12) Yehova su pasenshi ta duna hende chèns pa arepentí. (2 Ped. 3:9) Ta p’esei nos ta tuma masha na serio e konseho di Beibel pa imitá e pasenshi di e profetanan.—Sant. 5:10.
3. Dikon nos mester pidi Yehova pa su spiritu santu?
3 Dependé Riba Yehova Su Forsa: Aunke Mikéas su asignashon tabata difísil, el a dependé riba Yehova su forsa pa kumpli kuné. (Mik. 3:8) Ta Yehova mes ta urgi nos den su Palabra pa pidié pa su forsa. E ta duna forsa na esnan ku ta kansá pa asina nan por kumpli ku nan responsabilidatnan teokrátiko. (Sal. 84:5, 7; Isa. 40:28-31) Abo a yega di sinti esaki den bo bida kristian? Bo ta pidi Yehova regularmente pa fortalesé bo pa medio di su spiritu santu?—Luk. 11:13.
4. Ki ekselente ehèmpel Mikéas a laga pa nos?
4 Mikéas a biba pa hasi e boluntat di Dios. Esei tabata e kos di mas importante p’e. E tabata determiná pa keda fiel na Dios maske e tabata rondoná pa hende moralmente korumpí. Awe tambe, nos integridat ta ser poní na prueba tur dia. P’esei, laga nos fortalesé nos determinashon pa “kana den e nòmber di [Yehova] nos Dios pa semper i semper.”—Mik. 4:5.