Ban Hasi Ougùstùs un Luna di Aktividat Históriko!

1. Ki kampaña spesial nos lo tene den ougùstùs?

¹ Aki un par di luna e Reino di Dios lo kumpli 100 aña. P’esei, ta na su lugá pa nos onra Yehova ku un kampaña spesial! Den ougùstùs awor, nos lo parti un tratado nobo rònt mundu. Su tema ta: Unda Bo Por Haña Kontesta pa e Preguntanan Importante di Bida? E tratado akí ta animá e lektor pa buska e kontestanan den Beibel i ta splik’é kon nos website jw.org por yud’é den esei.

2. Kon nos por apoyá e kampaña pa alabá Yehova “na bos haltu” den ougùstùs awor?

² Alabá Yehova “na Bos Haltu”: Pa yuda publikadónan ta mas aktivo den sirbishi, a hasi un provishon spesial pa esnan batisá por traha pionero ousiliar di 30 ora durante ougùstùs. Komo ku ougùstùs tin sinku djabièrnè, sinku djasabra i sinku djadumingu, hopi publikadó ku ta traha òf ta bai skol den siman lo por traha pionero e luna ei. Si bo yu òf un di bo studiantenan di Beibel ta kumpli ku e rekisitonan pa bira publikadó, papia mesora ku e koordinadó di e kuerpo di ansiano. Lo ta un gran animashon pa durante e luna históriko akí nan bira publikadó i traha huntu ku nos. Normalmente hopi pionero regular ta tuma fakansi durante ougùstùs ya ku nan a alkansá nan oranan. Pero kisas nan por ahustá nan skèdjel pa nan por partisipá plenamente den e kampaña spesial akí. Lo ta bon pa komo famia boso kuminsá plania for di awor kon boso lo bai apoyá e kampaña pa alabá Yehova “na bos haltu” den ougùstùs awor.—Èsd. 3:11; Pro. 15:22.

3. Kiko nos ta spera di logra ku e kampaña spesial akí?

³ Aunke nos a yega di partisipá den kampañanan similar, tur kos ta indiká ku esun akí lo ta históriko. Nos lo alkansá un máksimo nobo di kantidat di ora, publikadó i pionero ousiliar den ougùstùs awor? Segun ku e aña di sirbishi 2014 ta yega na su fin, nos ta pidi Yehova pa e bendishoná e esfuerso mundial ku nos lo hasi den ougùstùs. Lo e bira e ora ei e luna den kua nos a yega di duna e testimonio di mas grandi den henter historia.—Mat. 24:14.