Kon Nos Por Yuda Hende Ku No Por Lesa Bon?

1. Dikon no ta fásil pa siña hende ku no por lesa bon e bèrdatnan di Beibel?

¹ Algun hende ta interesá den kosnan spiritual, pero komo ku nan no ta lesa bon, nan por sinti nan un tiki inkómodo ku Beibel i otro buki. P’esei kisas no tin muchu sentido pa for di un prinsipio nos ofresé nan e buki Beibel Ta Siña. Kon nos por yuda nan den sentido spiritual? Nos a hasi un enkuesta den mas ku 20 pais pa haña sa kiko publikadónan ku eksperensia ta hasi den un situashon asina. Laga nos wak algun di nan sugerensianan.

2. Ki hèrmènt útil nos tin pa yuda hende ku no por lesa bon?

² Si e hende no por lesa bon òf no sa lesa mes, lo ta bon pa kuminsá ku e foyeto Skucha Dios òf Skucha Dios i Biba pa Semper. Un pionero di Merka ta mustra e persona tur e dos foyetonan i ta puntr’é kua di nan dos e ta preferá. E sukursal di Kenia a informá ku e publikashonnan akí ta masha útil pa nan pasobra den e kultura afrikano hende tin kustumber di siña kosnan pa medio di kontamentu di historia i no pa medio di seshon di pregunta i kontesta. Aunke hende ku tin skol a kustumbrá ku e método di pregunta i kontesta esnan ku no tin muchu skol sí no ta gusta e sistema akí mashá. Si e hende por lesa un tiki, hopi publikadó ta kuminsá den e foyetonan Dios Tin Bon Notisia pa Nos! òf Bo Por Ta Amigu di Dios! òf kisas Mi Buki di Relato Bíbliko.

3. Kiko nos tin ku tene kuenta kuné si nos ke yuda un hende ku no sa lesa?

³ Duna Elogio: Hende ku no sa lesa por tin ripara di esei i hopi no sa duna balor na nan mes. Pa bo por siña nan e bèrdat, bo tin ku kuminsá laga nan sinti nan mes kómodo. Mayoria di hende ku no sa lesa ta inteligente i ta kapta kos lihé. P’esei, trata nan ku e rèspèt ku nan ta meresé. (1 Ped. 3:15) Ora nan mira ku ta bale la pena hasi esfuerso i ku nan ta progresá den sentido spiritual, nan lo sinti nan motivá pa sigui ku e estudio. P’esei duna nan hopi kòmplimènt.

4. Kon nos por animá studiantenan ku no por lesa bon pa prepará pa e estudio?

⁴ Asta si un studiante no por lesa bon, anim’é p’e prepará pa e estudio. Algun publikadó na Suráfrika ta animá nan studiantenan pa pidi un miembro di famia òf amigu ku por lesa bon yuda nan. Un publikadó na Gran Bretaña ta laga su studiantenan di Beibel usa su buki durante un parti di e estudio pa asina nan por wak kon fásil ta pa haña e kontesta ora e ta marká. Un ruman hòmber na India ta animá su studiantenan pa prepará pa e siguiente estudio dor di wak e plachinan i meditá di antemano riba nan.

5. Kon nos por mustra pasenshi ora nos ta dirigí un estudio?

⁵ Tene Pasenshi: Sea kual sea e publikashon ku nos usa, enfoká riba e puntonan prinsipal i yuda e studiante komprondé nan bon. Na komienso, ta mihó pa limitá e estudio na 10 òf 15 minüt. No purba di trata muchu informashon; un par di paragraf mes ta sufisiente. No pèrdè pasenshi si e studiante ta lesa pokopoko. Segun ku e ta haña mas apresio pa Yehova, lo e sintié motivá pa mehorá su lesamentu. Pa yuda su amor pa Yehova krese, ta bon pa invit’é asistí na e reunionnan for di kuminsamentu.

6. Kon nos por siña hende lesa?

⁶ Si un studiante di Beibel siña lesa bon, su progreso spiritual ta bai mas lihé. (Sal. 1:1-3) Si e studiante desanimá, kisas bo por yud’é haña konfiansa ora bo menshoná e kosnan ku el a siña. Sigur’é ku Yehova lo bendishoná su esfuersonan i anim’é pa e pidié yudansa. (Pro. 16:3; 1 Huan 5:14, 15) Algun publikadó na Gran Bretaña ta animá nan studiantenan pa pone metanan realístiko, por ehèmpel, siña álfabèt, despues buska i lesa teksto di Beibel i finalmente lesa publikashonnan bíbliko simpel. Hopi biaha, pa bo siña un hende lesa, no ta sufisiente pa djis mustr’é kon e tin ku lesa; e mester sinti su mes motivá tambe pa hasi esei.

7. Dikon nos no mester keda sin kompartí e bèrdat ku hende ku no por lesa bon?

⁷ Yehova no ta menospresiá hende ku no tin hopi skol. (Yòb 34:19) Loke ta importante p’e ta e hende su kurason. (1 Kró. 28:9) P’esei no keda sin kompartí e bèrdat ku hende ku no por lesa bon. Bo tin ekselente publikashonnan ku bo por kuminsá kuné. Ku tempu, bo por pasa pa e buki Beibel Ta Siña pa e studiante por haña un mihó komprondementu di e Skritura.