Tuma e Profetanan Komo Ehèmpel: Nahum
1. Kiko nos ta siña for di e buki di Nahum?
1 E ruinanan di e stat di Nínive di antigwedat ta prueba palpabel ku Yehova ta tuma vengansa kontra su enemigunan, manera profeta Nahum a deklará. Ni e atversarionan di mas kruel no por para banda di dje. (Nah. 1:2, 6) Si nos analisá e profesia di Nahum un tiki mas djaserka, nos lo saka algun lès ku lo ta útil den nos sirbishi.
2. Kon nos por mantené nos mensahe positivo?
2 Duna Konsuelo i Speransa: Na promé bista, e buki di Nahum ta parse simplemente un profesia di huisio kontra Nínive, e kapital orguyoso di Asiria di antigwedat. (Nah. 1:1; 3:7) Sinembargo, e profesia akí tabata un bon notisia pa e pueblo di Yehova. Nahum, kende su nòmber ta nifiká “Konsoladó,” a sigurá su paisanonan hudiu ku pronto nan enemigu lo no t’ei mas! Ademas, Nahum a garantisá nan ku Yehova ta “un lugá fortifiká den e dia di angustia.” (Nah. 1:7) Ora nos ta prediká, nos tambe ta kompartí bon notisia i ta animá hende pa buska refugio den Yehova.—Nah. 1:15.
3. Kon nos por imitá Nahum usando ehèmpel i ilustrashon den sirbishi?
3 Usa Ehèmpel i Ilustrashon: Yehova a inspirá Nahum pa kompará e fin di Nínive ku esun di e stat egipsio Tebas (No-amon), ku Asiria mes a destruí anteriormente. (Nah. 3:8-10) Ora nos ta papia ku otro hende tokante e fin di e mundu malbado akí, nos por hala atenshon na profesianan di Beibel ku ta mustra ku Yehova ta kumpli ku su palabra te den e último detaye. Por ehèmpel, ora Babilonia i Medo a uni forsa pa lansa un atake kontra e stat di Nínive na aña 632 promé ku Kristu, áwaseru pisá a laga Riu Tigris desbordá i pone ku un parti grandi di e murayanan masivo di e stat akí kai den otro. Nan a konkistá Nínive masha lihé mes, nèt manera Yehova a profetisá.—Nah. 1:8; 2:6.
4. Kon nos por papia na un manera kla i komprendibel den sirbishi?
4 Papia na un Manera Kla i Komprendibel: Nahum a skirbi su profesia na un manera deskriptivo i emoshonante. E puntonan ku el a trese dilanti tabata komprendibel. (Nah. 1:14; 3:1) Meskos tambe, nos ke usa palabra ku ta fásil pa komprondé. (1 Kor. 14:9) Asina ku bo kuminsá papia ku un persona, splik’é bon kla e motibu di bo bishita. Yuda bo studiantenan di Beibel kultivá fe den Yehova i den su Palabra, i komprondé kon e informashon ta apliká na nan.—Rom. 10:14.
5. Ki garantia nos ta haña den e profesia di Nahum?
5 Nahum tabatin pleno konfiansa ku Yehova su palabra lo a kumpli sin falta. Nos por mira esei bon kla den e buki di Beibel ku ta karga su nòmber. Segun ku e mundu di Satanas ta yega na su fin, nos ta haña konsuelo den e deklarashon ku Dios a duna: “Angustia lo no lanta dos biaha.”—Nah. 1:9.