Nos Ta Dirigí Estudionan di Beibel na un Manera Efikas?
1. Ki responsabilidat tur publikadó tin pa ku studiantenan di Beibel?
1 Ningun hende no por sirbi Dios a ménos ku Yehova “hal’é serka” dje. (Huan 6:44) Aunke esei ta bèrdat, nos komo publikadó tin e responsabilidat pa yuda hende hala serka nan Tata selestial. (Sant. 4:8) Pero esei ta rekerí bon preparashon. Djis lesa e paragrafnan i hasi e preguntanan imprimí so no ta yuda nos studiante kapta e mensahe i hasi progreso.
2. Kiko nos lo logra si nos ta dirigí un estudio di Beibel na un manera efikas?
2 Pa dirigí un estudio na un manera efikas, e publikadó mester yuda e studiante (1) komprondé loke Beibel ta siña, (2) aseptá esaki i (3) pon’é na práktika. (Huan 3:16; 17:3; Sant. 2:26) Esaki ta un proseso ku por dura lunanan. Sinembargo, kada paso ku e persona dal, su relashon ku Yehova ta bira mas fuerte i su deseo pa dediká su mes na dje ta krese.
3. Dikon un bon maestro ta hasi pregunta pa animá e studiante pa ekspresá su punto di bista?
3 Kiko e Studiante Ta Pensa?: Pa haña sa si e studiante ta komprondé i ta di akuerdo ku loke e ta siña, evitá ku ta nos so ta papia. En bes di hasi esei, animá e studiante pa ekspresá su mes. (Sant. 1:19) E ta komprondé loke Beibel ta bisa tokante e tópiko konserní? E por splik’é ku su mes palabranan? Kiko e mes ta pensa di e tópiko? E ta haña ku loke Beibel ta siña ta rasonabel? (1 Tes. 2:13) E ta komprondé ku e mester hasi kambio den su bida? (Kol. 3:10) Pa haña sa kiko e studiante ta pensa, nos mester usa takto i hasié pregunta ku ta anim’é pa ekspresá su punto di bista, anto skuch’é ku atenshon.—Mat. 16:13-16.
4. Kiko nos mester hasi si un studiante tin problema pa komprondé òf pa pone na práktika algun siñansa di Beibel?
4 Ta rekerí tempu pa stòp ku kustumbernan i pa kambia maneranan di pensa ku hopi biaha ta profundamente ankrá. (2 Kor. 10:5) Kiko nos por hasi si e studiante no ta aseptá òf no ta pone na práktika loke e ta siña? Nos mester tin pasenshi pasobra ta tuma tempu pa e Palabra di Dios i spiritu santu obra den kurason di e studiante. (1 Kor. 3:6, 7; Heb. 4:12) En bes di preshoná e studiante, ta mihó pa laga e tópiko para i sigui ku e estudio. Segun ku nos ta sigui siñ’é ku amor i pasenshi, ku tempu e por sinti su mes motivá pa hasi e kambionan nesesario.