Nos Hèrmèntnan pa Siña Hende e Bèrdat
1. Den ki sentido un predikadó kristian ta manera un artesano?
1 Artesanonan tin un variedat di hèrmènt den nan kaha di hèrmènt. Algun hèrmènt nan ta usa solamente pa tareanan spesial, i tin hèrmènt ku nan ta usa regularmente. Artesanonan ku eksperensia semper ta kana ku nan hèrmèntnan básiko, esta, e hèrmèntnan ku nan ta usa mihó. Beibel ta animá nos pa ta diligente den sirbishi i pa ta “un trahadó ku no tin nada di tene bèrgwensa di dje.” (2 Tim. 2:15) Kua ta nos hèrmènt di mas importante? Sin duda, esei ta Beibel, e hèrmènt prinsipal ku nos ta usa pa ‘hasi hende disipel.’ (Mat. 28:19, 20) P’esei, nos mester hasi tur nos esfuerso pa “manehá e palabra di e bèrdat korektamente.” Sinembargo, tin otro hèrmèntnan básiko den nos kaha di hèrmènt ku tur kristian mester siña manehá bon pa nan por siña hende e bèrdat.—Pro. 22:29.
2. Kua ta nos hèrmèntnan básiko pa siña hende e bèrdat?
2 Nos Hèrmèntnan Básiko pa Siña Hende e Bèrdat: Kua otro hèrmènt nos ta usa aparte di Beibel? E hèrmènt prinsipal ku nos ta usa pa siña hende e bèrdat di Beibel ta e buki Kiko Beibel Ta Siña Realmente? Despues ku nos kaba e buki akí ku e studiante, nos ta usa “Keda den e Amor di Dios” pa siñ’é apliká prinsipionan di Beibel den su bida. P’esei, nos mester sa bon kon pa usa e dos publikashonnan akí. Den nos kaha di hèrmènt, nos mester tin algun foyeto tambe. Por ehèmpel, e foyeto Dios Tin Bon Notisia pa Nos! ta práktiko pa kuminsá estudio di Beibel. Si den nos teritorio tin hende ku no por lesa bon òf ku ta papia un idioma den kua tin poko òf niun publikashon, nos por usa e foyetonan Skucha Dios i Skucha Dios i Biba pa Semper. Un di e hèrmèntnan básiko ku ta yuda nos dirigí e studiantenan na e organisashon ta: Ken Awe Ta Hasi e Boluntat di Yehova? Vidionan, manera Dikon Analisá Loke Beibel Ta Bisa?, Kiko Ta Sosodé na un Salòn di Reino?, i Dios Tin un Nòmber?, tambe ta yuda nos hasi hende disipel i nos mester siña hasi bon uso di nan.
3. Kon Nos Ministerio di Reino lo yuda nos den futuro?
3 Den futuro, Nos Ministerio di Reino lo yuda nos bira mas ábil den usa e publikashonnan básiko, òf hèrmèntnan, ku nos tin pa siña hende e bèrdat. Segun ku nos ta hasi esfuerso pa usa nan bon, nos lo kumpli ku e konseho inspirá: “Presta atenshon konstantemente na bo mes i na e siñansa ku bo ta duna. Perseverá den e kosnan akí, pasobra hasiendo esei lo bo salba bo mes i tambe esnan ku ta skucha bo.”—1 Tim. 4:16.