Kon pa Yega na Kurason di Hende Ku Ta Skucha Nos
1. Ki efekto Hesus su siñansa tabatin riba kurason di hende ku a skuch’é?
1 Hesukristu a papia na un manera ku a yega na kurason di su oyentenan. Na por lo ménos un okashon e kurason di Hesus su disipelnan tabata “manera na kandela” despues ku el a splika nan e Skritura na plaka chikí. (Luk. 24:32) Obedensia na Dios mester ta di kurason. P’esei, kon nos por yega na kurason di hende ku ta skucha nos i asina animá nan pa hasi kambio den nan bida?—Rom. 6:17.
2. Si nos ke yega na kurason di hende, dikon nos tin ku usa takto i mustra komprenshon?
2 Mustra Takto i Komprenshon: Pa mayoria di hende, djis bisa nan kiko ta bon i kiko ta malu lo no motivá nan pa hasi kambio. I ataká nan kreensianan ku bòshi teksto di Beibel lo por asta pone nan rechasá e mensahe. Pa por motivá un persona, nos mester saka afó kiko e ta kere aden i dikon e ta hasi sierto kosnan. P’esei, nos tin ku usa takto i hasi pregunta bon pensá pa enkurash’é pa e ekspresá su mes. (Pro. 20:5) Anto ora nos haña sa kiko e ta pensa, nos lo por skohe teksto di Beibel ku lo por yega na su kurason. P’esei, ta importante pa nos mustra interes personal i tene pasenshi. (Pro. 25:15) Kòrda tambe ku kada persona su progreso spiritual ta diferente. P’esei, duna e spiritu santu di Yehova chèns pa yud’é kambia su pensamentu i kondukta.—Mar. 4:26-29.
3. Kon nos por yuda hende ku ta skucha nos kultivá bon kualidat?
3 Yuda Nan Kultivá Bon Kualidat: Nos por usa tekstonan ku ta demostrá Yehova su amor i bondat pa yuda hende ku ta skucha nos kultivá bon kualidat. Nos por usa tekstonan manera Salmo 139:1-4 òf Lukas 12:6 i 7 pa mustra nan ku Dios tin interes den kada un di nos. I ora nan kultivá apresio di kurason pa Yehova su bondat inmeresí, nan amor i deboshon na dje lo krese. (Rom. 5:6-8; 1 Huan 4:19) Ademas, ora nan haña sa ku nan kondukta por hasi Yehova sea kontentu òf tristu, nan lo ke hasi kambio pa biba na un manera ku ta agradá i onra Yehova.—Sal. 78:40, 41; Pro. 23:15.
4. Ora di siña hende, kon nos por mustra ku nos ta respetá nan derecho di skohe pa nan mes?
4 Yehova no ta obligá niun hende pa obedesé su mandamentunan. Mas bien, e ta mustra nan dikon ta sabí pa sigui su konseho. (Isa. 48:17, 18) Nos ta imitá Yehova ora nos ta yuda hende yega na nan mes konklushonnan. Anto, ora un hende konvensé su mes ku e tin ku hasi kambio den su bida, e kambionan ei lo ta mas duradero. (Rom. 12:2) Ademas, lo e hala mas serka Yehova, esun ku ta “sondia, [òf, eksaminá] kurason.”—Pro. 17:3.