Usa e Buki Beibel Ta Siña Bon

Ora un studiante di Beibel komprondé loke Beibel ta siña realmente i ta apliká esaki den su bida, lo e progresá den sentido spiritual. (Sal. 1:1-3) Nos por yuda nos studiante progresá si nos sa bon kon pa usa e buki Beibel Ta Siña.

Preguntanan di Introdukshon: Kada kapítulo ta kuminsá ku preguntanan ku lo ser kontestá den e lès. Bo por hasi e preguntanan akí den un forma retóriko pa habri bo studiante su apetit pa e informashon ku boso ta bai trata. Òf bo por hasi e preguntanan i lag’é duna un kontesta breve. Si e duna un kontesta robes, bo no tin nodi di korigié na e momento ei. Su kontesta lo yuda bo sa kua ta e puntonan ku despues lo bo tin ku splika mihó.—Pro. 16:23; 18:13.

Apèndiks: Si e studiante ta komprondé i aseptá e informashon den e sekshon prinsipal di e kapítulo, bo por anim’é pa repasá e apèndiks ku ta korespondé ku e kapítulo ei riba su mes. Anto na e siguiente estudio, bo por hasié algun pregunta pa bo sa si el a komprondé loke el a lesa. Sinembargo, si bo ta haña ta nesesario, bo por saka tempu durante e estudio pa lesa e apèndiks òf un parti di dje i hasi pregunta ku bo a prepará for di antemano pa yuda bo studiante komprondé.

Kuadro di Repaso: E kuadro di repaso ku tin na final di kada kapítulo ta duna kontesta pa e preguntanan di introdukshon di e kapítulo. Bo por repasá esaki ku bo studiante pa hasi sigur ku el a komprondé e puntonan prinsipal i por splika nan. Boso por lesa e kontestanan huntu ku e tekstonan ku ta kompañá nan. Anto, pidi bo studiante pa usa e tekstonan pa splika dikon e kontesta ta korekto.—Echo. 17:2, 3.