Tuma e Profetanan Komo Ehèmpel: Habakuk
1. Dikon nos por komprondé loke profeta Habakuk a sinti?
1 Ora nos mira kon maldat ta oumentá den e mundu rònt di nos ta fásil pa nos sinti meskos ku Habakuk, kende a puntra Yehova: ‘Pakiko bo ta tolerá inhustisia?’ (Hab. 1:3, BPK; 2 Tim. 3:1, 13) Si nos meditá riba Habakuk su mensahe i su bon ehèmpel, nos ta ser fortalesé miéntras nos ta spera riba Yehova su dia di huisio.—2 Ped. 3:7.
2. Kon nos por demostrá ku nos ta biba pa medio di fe meskos ku Habakuk?
2 Biba pa Medio di Fe: Habakuk no a sinta lamentá su situashon; mas bien, el a keda alerta i aktivo den sentido spiritual. (Hab. 2:1) Yehova a sigur’é ku Su palabra lo kumpli nèt na tempu i ku “e hustu lo biba pa medio di su fe.” (Hab. 2:2-4) Kiko esaki ta nifiká pa kristiannan ku ta biba den e último dianan di e tempu di fin? Ta bon pa sa na ki tempu e fin lo bini. Pero mas importante ainda ta pa nos ta konvensí ku e fin ta bini. Nos fe por motivá nos pa keda alerta i duna prioridat na nos sirbishi.—Heb. 10:38, 39.
3. Dikon nos tin ku sigui sirbi Yehova ku goso?
3 Sirbi Yehova ku Goso: Ora Gòg di Magòg ataká e pueblo di Yehova, nos fe lo ser poné na prueba. (Eze. 38:2, 10-12) Semper ku tin guera kosnan ta bira difísil, asta pa e banda ku sali viktorioso. Hende por pèrdè propiedat i nivel di bida por baha. Kon nos lo reakshoná ora e difikultatnan ei presentá? Habakuk tabata sa ku kosnan lo a bira difísil, p’esei e tabata determiná pa mantené su goso den su sirbishi na Yehova. (Hab. 3:16-19) “E goso” di Yehova lo yuda nos tambe wanta e pruebanan ku ta na kaminda.—Neh. 8:10; Heb. 12:2.
4. Kiko Yehova lo sigui hasi pa nos awor i den futuro?
4 Yehova lo sigui siña hende ku sobrebibí e dia di huisio. (Hab. 2:14) Esnan ku lanta for di morto tambe lo siña tokante Yehova. Laga nos determiná for di awor pa usa tur oportunidat ku presentá pa papia di Yehova i su obranan maravioso.—Sal. 34:1; 71:17.