Bo Tabata Sa?

Kiko ta tur e belastingnan ku e hudiunan mester a paga den tempu di Hesus?

PA HOPI aña, e hudiunan tabatin kustumber di duna sèn komo parti di nan adorashon. Pero den tempu di Hesus, nan mester a paga masha hopi belasting mes. Esei a hasi nan bida hopi duru.

Tur aña, tur hende hòmber hudiu mester a paga mitar siklo (dos drakma) na e tabernakel i despues, ku tempu, na e tèmpel. Den promé siglo, tabata usa e belasting ei pa perkurá pa sakrifisio i pa mantenshon di e tèmpel ku Heródes a konstruí. Algun hudiu a puntra Pedro si Hesus tabata paga e belasting ei. I Hesus a bisa ku no tabatin nada malu den pag’é. De echo, el a bisa Pedro unda pa haña un moneda pa paga e belasting ei.—Mat. 17:24-27.

E tempu ei, e hudiunan mester a paga tambe un otro tipo di belasting ku tabata yama diesmo. Esei tabata un di dies parti di nan kosecha òf di nan entrada. (Lev. 27:30-32; Num. 18:26-28) E lidernan religioso a insistí ku mester a paga e belasting ei riba kada un bèrdura, asta riba “menta, eneldo i komino.” Hesus no a bisa ku tabata malu pa paga diesmo, pero el a bisa ku e manera hipókrita ku e eskriba- i fariseonan tabata usa Lei tabata malu.—Mat. 23:23.

Pero e tempu ei, e hudiunan tambe mester a paga hopi belasting na e romanonan, kendenan tabata goberná riba nan. Por ehèmpel, nan tabatin belasting di tereno. Nan por a paga esei sea ku plaka òf ku produkto. E belasting ei tabata entre 20 pa 25 porshento di loke nan tereno a produsí. Ademas, kada hudiu mester a paga un belasting na Sésar tambe. Ta tokante e belasting akí e fariseonan a kuestioná Hesus. Pero, Hesus a mustra nan kon nan mester a mira pagamentu di belasting ora ku el a bisa: “Duna Sésar loke ta di Sésar, ma Dios loke ta di Dios.”—Mat. 22:15-22.

Tabatin un belasting tambe riba merkansia ku tabata drenta òf sali sierto distrito. Tabata kobra e belasting akí na haf, brùg, krusada òf entrada pa un pueblo òf plasa.

E belastingnan ku e hudiunan mester a paga gobièrnu romano tabata hopi pisá pa nan. Segun historiadó romano Tásito, durante reinado di Emperador Tiberio, ora ku Hesus tabata riba tera, “Siria ku Hudea a roga pa paga ménos belasting pasobra esei tabata muchu pisá pa nan.”

Anto e sistema di kobramentu di belasting a hasi e situashon mas pió. E derecho pa kobra belasting tabata bai via findishi. Esun ku gana e findishi tabata buska otro hende ku lo kobra e belasting p’e. Nan tur tabata kier a gana algu. Ta parse ku Zakeo tabatin algun hende ku tabata kobra belasting p’e. (Luk. 19:1, 2) Ta di komprondé dikon e hudiunan tabatin asina tantu rabia riba henter e sistema di kobramentu di belasting ei i tabata odia tambe tur kobradó di belasting.