Yehova Su Amor Ta Yuda Bo Vense Miedu

1. Ki ta algun situashon ku por duna nos miedu?

BAN wak algun situashon ku algun di nos rumannan a pasa aden. Nestor i su kasá María kier a bai prediká kaminda tin mester di mas predikadó.b Pero, pa logra esei, nan mester a biba mas simpel i esei a duna nan hopi miedu. Dikon? Pasobra nan a pensa ku biba ku ménos lo a hasi nan infelis. Awor laga nos papia di Biniam ku ta biba na un pais kaminda hende ta oponé nos obra. E tabata sa ku ora e bira un Testigu, lo el a hañ’é ku persekushon i esei a dun’é miedu. Pero, loke a dun’é asta mas miedu ainda tabata kon su famia lo reakshoná ora nan haña sa ku el a bira un Testigu. Por último, nos tin e situashon di Valérie. Dòkter a bis’é ku su kanser ta agresivo. Komo ku Valérie kier a respetá Yehova su punto di bista tokante sanger, e no por a haña un siruhano ku kier a oper’é sin usa sanger. Pa Valérie, e solo echo ku e por a muri a dun’é miedu.

2. Dikon nos tin ku hasi esfuerso pa dominá nos miedunan?

² Bo a yega di sinti e tipo di miedunan ei? Mayoria di nos sí. Pero, si nos no siña dominá nan, chèns ta grandi ku nos lo tuma mal desishon i asta hasi algu ku por daña nos amistat ku Yehova. I ta nèt esei Satanas ke. Tambe e ta purba di usa nos miedunan pa pone nos desobedesé Yehova i asta stòp di prediká. (Rev. 12:17) Ta bèrdat ku Satanas ta malbado, kruel i tin hopi poder. Pero, nos por protehá nos mes for di dje. Kon asina?

3. Kiko por yuda nos vense nos miedunan?

³ Ora nos ta konvensí ku Yehova ta stima nos i ku e t’ei pa nos, nos lo no tin miedu di Satanas. (Sal. 118:6) Laga nos kue e ehèmpel di e eskritor di Salmo 118. El a hañ’é den un par di situashon hopi difísil. E tabatin hopi enemigu i tin di nan tabatin outoridat (versíkulo 9, 10). Algun biaha el a hañ’é bou di hopi preshon (versíkulo 13). Ademas, Yehova a disiplin’é severamente (versíkulo 18). Apesar di tur e kosnan ei, e salmista a kanta: “Lo mi no tin miedu.” Kon bin e tabatin tantu konfiansa asina? Wèl, e tabata sa ku aunke el a haña disiplina, Yehova tabata stim’é masha hopi mes. E tabata konvensí ku ni maske kiko e pasa aden, Yehova semper lo t’ei pa yud’é.—Sal. 118:29.

4. Ki tipo di miedu nos por vense si nos ta konvensí ku Yehova stima nos?

⁴ Kada un di nos mester ta konvensí ku Yehova stima nos. Esei lo yuda nos vense tres miedu ku hende sa tin: (1) miedu di no por perkurá pa nos famia, (2) miedu di hende i (3) miedu di muri. E rumannan ku nos a menshoná den paragraf 1 a logra vense nan miedu pasobra nan tabata konvensí ku Yehova stima nan.

MIEDU DI NO POR PERKURÁ PA NOS FAMIA

5. Ki situashon por preokupá kabesnan di famia? (Wak plachi riba portada.)

⁵ Ta normal ku un kabes di famia kristian ta tuma su responsabilidat di perkurá pa su famia na serio. (1 Tim. 5:8) Si bo ta un kabes di famia, kisas durante e pandemia bo tabatin miedu ku lo b’a pèrdè bo trabou. Por ta bo tabata asta preokupá pensando ku lo bo no por pone pan riba mesa òf ku lo bo no por paga hür òf hipotek. Anto kisas b’a pensa: ‘Si mi pèrdè mi trabou, unda mi ta bai haña un otro?’ Òf meskos ku Nestor i María, menshoná na paragraf 1, b’a pensa ku bo no por biba ku ménos sèn. Debí na e miedunan ei, Satanas a logra stroba hopi hende di sirbi Yehova.

6. Kiko Satanas ke laga nos kere?

⁶ Satanas ke pa nos kere ku Yehova no ta preokupá su kabes ku nos i ku lo e no yuda nos perkurá pa nos famia. I si nos kere algu asina, nos lo hasi loke sea ta nesesario pa keda ku nos trabou, asta si esei ke men hasi algu ku Yehova no gusta.

7. Kiko Hesus a sigurá nos?

⁷ Hesus, kende konosé e Tata mihó ku kualke hende, a bisa: “Dios, boso Tata sa kiko boso tin mester asta promé ku boso pidié.” (Mat. 6:8) Ademas, Hesus sa ku Yehova ta dispuesto pa perkurá pa nos nesesidatnan. Komo kristiannan, nos tur ta parti di Yehova su famia. Komo ku e ta nos Kabes di famia, nos tin sigur ku lo e hasi presis manera el a pidi tur otro kabes di famia hasi na 1 Timoteo 5:8.

8. (a) Kiko por yuda nos vense e miedu di no por perkurá pa nos famia? (Mateo 6:31-33) (b) Kon nos por imitá e pareha riba e plachi ku ta trese kuminda pa un ruman?

⁸ Ora nos ta konvensí ku Yehova stima nos i nos famia, nos lo no duda ku nos lo tin e kosnan ku nos tin mester. (Lesa Mateo 6:31-33.) Yehova ke perkurá pa nos i no tin niun persona ku por hasi esei mihó kuné! Por ehèmpel, ora el a traha nos planeta e no a djis pone e kosnan ku nos tabatin mester pa sobrebibí. El a yen’é ku e kosnan ku ta hasi nos felis. (Gén. 2:9) Asta si tin biaha nos tin djis e kosnan básiko pa e dia ei, nos tin ku kòrda ku nos tin nan pasobra ta Yehova a perkurá nan. (Mat. 6:11) Kòrda semper ku loke Yehova duna nos ta mas balioso ku kualke kos ku nos tin ku sakrifiká aworakí. I den futuro lo e duna nos bida eterno. Esei ta loke Nestor i María a bin realisá.—Isa. 65:21, 22.

9. Kiko bo a siña di Nestor i María?

⁹ Nestor i María ta biba na Colombia. Nan tabatin un bon trabou i un bida konfortabel. Nan a bisa: “Nos kier a hiba un bida simpel i hasi mas pa Yehova. Pero nos tabatin miedu ku nos lo no ta felis si nos tin ku biba ku ménos.” Kiko a yuda nan vense e miedu ei? Nan a sinta pensa riba tur e biahanan ku Yehova a mustra nan ku e tabata stima nan. Konvensí ku Yehova semper lo kuida nan, nan a kita for di trabou, a bende nan kas i a muda pa un otro área den e pais ku tabatin mester di mas predikadó. Kon nan ta sinti tokante nan desishon? Nestor a bisa: “Nos a mira ku e palabranan di Mateo 6:33 ta bèrdat. No tabatin ni un momento ku nos a sinti falta di algu. I awor nos ta mas felis.”

MIEDU DI HENDE

10. Dikon hende tin miedu di otro hende?

¹⁰ Despues di e rebelion di Adam ku Eva, hende a bin ta hasi daño na otro hende. (Ekl. 8:9) Por ehèmpel, hopi hende ta abusá di nan poder, ta kometé krímen violento, ta insultá i menasá kompañeronan di klas òf ta trata nan mes famia masha kruel. Ta di komprondé anto dikon hende tin miedu di otro hende. Kon Satanas ta purba di probechá di e miedu akí?

11-12. Kon Satanas ta usa miedu di hende kontra nos?

¹¹ Satanas ta usa nos miedu di hende pa pone nos sea stòp di prediká òf stòp di hasi loke Yehova ke pa nos hasi. Satanas ta pone ku gobièrnunan ta prohibí nos trabou di prediká i ta persiguí nos. (Luk. 21:12; Rev. 2:10) Hopi hende den Satanas su mundu ta plama rumor falsu i mentira malisioso tokante Testigunan di Yehova. Debí na e mentiranan ei hende ta hasi chèrchi di nos òf asta maltratá nos físikamente. (Mat. 10:36) E táktikanan ei di Satanas no ta nada nobo; e ta usando nan for di promé siglo kaba.—Echo. 5:27, 28, 40.

¹² Miedu pa persekushon di gobièrnu no ta e úniko arma ku Satanas ta usa kontra nos. Algun hende, ora nan bini den e bèrdat, tin hopi mas miedu pa e reakshon di nan famia ku di maltrato físiko. Komo ku nan stima nan famia masha hopi mes, nan ke pa nan haña e bèrdat. P’esei, ta duel nan mashá ora nan tende nan famia papia malu di e Dios berdadero i su sirbidónan. Den algun kaso, miembronan di famia ku na promé instante tabata oponé, mas despues a bira Testigu. Awor, kiko nos lo hasi si nos famia no ke tin nada mas di haber ku nos debí ku nos a bira un Testigu di Yehova?

13. Dikon nos mester ta konvensí ku Yehova stima nos ora nos famia bira lomba pa nos? (Salmo 27:10)

¹³ E palabranan na Salmo 27:10 ta bunita i ta konsolá nos. (Les’é.) Si nos keda kòrda kuantu Yehova stima nos, nos lo no tin miedu di loke por pasa, asta si nos famia bira lomba pa nos. I nos por konfia ku Yehova lo rekompensá nos si nos perseverá. Yehova ta e mihó persona ku por perkurá pa nos nesesidatnan físiko, emoshonal i spiritual. Esei ta nèt loke Biniam, menshoná na paragraf 1 a eksperensiá.

14. Kiko bo a siña di Biniam?

¹⁴ Biniam a bira un Testigu di Yehova aunke ku e tabata sa ku lo e hañ’é ku persekushon kruel. Biniam tabata konvensí ku Yehova stim’é i lo yud’é. El a bisa: “E persekushon di gobièrnu tabata pió di loke m’a pensa, pero loke mi tabatin mas miedu di dje tabata oposishon di mi famia. Mi tabatin miedu di desepshoná mi tata, kende no tabata un Testigu, i pa pèrdè rèspèt di mi famia.” Pero, Biniam tabata konvensí ku Yehova semper ta kuida esnan ku E stima. Biniam a sigui splika: “M’a meditá riba kon Yehova a yuda otro rumannan soportá difikultatnan ekonómiko, odio i atakenan di grupo. I mi tabata sa ku si mi pega na Yehova, lo e bendishoná mi. Nan a arestá mi vários biaha i asta a torturá mi. I ta na e momentonan duru ei m’a mira ku mi propio wowo ku si nos keda fiel na Yehova, lo e t’ei pa yuda nos.” Yehova a bira un berdadero Tata pa Biniam i e rumannan a bira un famia real p’e.

MIEDU DI MURI

15. Dikon ta normal pa sinti miedu di muri?

¹⁵ Beibel ta bisa ku morto ta un enemigu. (1 Kor. 15:25, 26) Morto ta algu ku ta ansha nos tur, foral si nos òf un hende ku nos stima tin un malesa hopi serio. Pero, dikon nos tin miedu di muri? Pasobra Yehova a krea nos ku e deseo di biba pa semper. (Ekl. 3:11) Pero, te na un sierto grado, miedu di muri por protehá nos. Por ehèmpel, esei por motivá nos pa wak bon kiko nos ta kome, pa hasi ehersisio, pa evitá di hasi algu ku ta pone nos bida na peliger, pa bai dòkter i pa bebe remedi ora ta nesesario.

16. Kon Satanas ta probechá di nos miedu di muri?

¹⁶ Satanas sa ku pa nos bida ta hopi presioso. P’esei, e ta para ariba ku nos ta dispuesto pa sakrifiká loke sea ta nesesario, asta nos amistat ku Yehova, pa nos por keda na bida. (Yòb 2:4, 5) Pero Satanas ta robes. Komo ku e ta “esun ku tin e medio pa kousa morto,” e ta usa nos miedu di muri pa purba di pone nos bira lomba pa Yehova. (Heb. 2:14, 15) Tin biaha, hende ku ta bou di Satanas su influensia ta menasá nos ku morto pa nos stòp di sirbi Yehova. Òf otro biaha, Satanas ta probechá di un emergensia médiko pa purba di pone nos faya ku Yehova. Kisas dòkternan òf famianan ku no ta Testigu por pone preshon riba nos pa tuma sanger, algu ku ta kontra Dios su lei. Òf un hende por purba di konvensé nos pa tuma un tratamentu ku ta kontra e prinsipionan di Beibel.

17. Segun Romanonan 8:37-39, dikon nos no mester tin miedu di muri?

¹⁷ Ta klaru ku nos niun no ke muri. Pero si esei sosodé, nos ta konvensí ku Yehova lo sigui stima nos. (Lesa Romanonan 8:37-39.) Ora un amigu di Yehova muri, e ta keda den Su memoria. Anto p’e, e ta bibu ainda. (Luk. 20:37, 38) E no por warda e dia yega pa e por dun’é bida atrobe. (Yòb 14:15) Yehova a paga un preis masha haltu mes pa nos por “haña bida eterno.” (Huan 3:16) Nos sa kuantu Yehova ta stima kada un di nos. Pues, en bes di bira lomba pa Yehova ora nos bira malu òf ora hende menasá nos ku morto, nos ta bai serka dje pa konsuelo, sabiduria i forsa. Ta nèt esei Valérie i su esposo a hasi.—Sal. 41:3.

18. Kiko bo a siña di Valérie?

¹⁸ Ora Valérie tabatin 35 aña, el a haña sa ku e tabatin un tipo di kanser ku no ta komun i ku ta hopi agresivo. Wak kon Yehova su amor a yud’é vense su miedu di muri. El a bisa: “Ora m’a tende ku mi tabatin kanser, esei tabata un shòk pa nos. Mi úniko opshon tabata di hasi un operashon grandi. M’a papia ku diferente siruhano, pero niun no kier a operá mi sin sanger. Ta bèrdat ku mi tabatin miedu, pero komo ku mi kier a obedesé Yehova su lei, bou di niun sirkunstansia lo mi no a tuma sanger. Henter mi bida Yehova a mustra mi ku e tabata stima mi. Awor mi tabatin e oportunidat pa mustr’é kuantu ami ta stim’é. Kada un mal notisia ku m’a haña a hasi mi mas determiná pa no laga Satanas gana. Mi kier a laga Yehova sintié orguyoso di mi. Ku tempu m’a logra operá sin sanger i tur kos a bai bon. Ketu bai mi ta lucha ku mi salú, pero Yehova semper a duna nos loke nos tabatin mester. Por ehèmpel, e wikènt promé ku m’a haña sa ku mi tabatin kanser, nos a studia e artíkulo ‘Nos Por Enfrentá Situashonnan Difísil ku Kurashi.’c E artíkulo ei a yega nèt na ora. Nos a les’é bes tras bes. Artíkulonan asina, sirbishi i nos reunionnan a yuda ami i mi kasa pa no pèrdè kabes i pa tuma bon desishon.”

VENSE BO MIEDU

19. Kiko ta bai pasa un djis aki?

¹⁹ Ku Yehova su yudansa, kristiannan rònt mundu a logra pasa dor di situashonnan difísil i a oponé Diabel. (1 Ped. 5:8, 9) Abo tambe por. Un djis aki, Yehova lo instruí Hesus, i esnan ku ta goberná huntu kuné, “pa destruí e obranan di Diabel.” (1 Huan 3:8) Despues di esei, esnan ku ta sirbi Dios aki riba tera lo ‘no tin nada di teme mas i lo ta librá di teror.’ (Isa. 54:14, BPK; Mik. 4:4) Pero mientrastantu, nos tin ku sigui hasi esfuerso pa vense nos miedunan.

20. Kiko lo yuda nos vense nos miedunan?

²⁰ Nos tin ku sigui konfia mas i mas ku Yehova ta stima i ta protehá su sirbidónan. Kiko lo yuda nos logra esei? Esei ta di meditá riba kon Yehova a protehá su sirbidónan den pasado i papia tokante esei ku otronan. Tambe nos ke kòrda kon Yehova a yuda nos mes ora nos a pasa den situashonnan difísil. Sí, ku Yehova su yudansa, nos por vense nos miedunan.—Sal. 34:4.