Bo Por Sinti Pas Durante Situashonnan Difísil

1. Kiko “e pas di Dios” ta, i dikon ta bon pa nos tiné? (Filipensenan 4:6, 7)

TIN un tipo di pas ku mundu no konosé: “E pas di Dios.” Esei ta un sintimentu di trankilidat ku solamente hende ku tin un amistat será ku Yehova por tin. Ora nos tin e pas ku ta bini di Dios, nos ta sinti nos safe. (Lesa Filipensenan 4:6, 7.) Nos lo tin amistat será ku nos rumannan ku tambe stima Dios, anto nos lo tin un amistat será ku “e Dios di pas.” (1 Tes. 5:23) Ora nos konosé nos Tata, ta konfi’é i obedes’é, nos lo sinti e pas ku ta bini di Dios. E pas ei lo kalma nos kurason ora nos ta pasa den momentonan difísil.

2. Kon nos sa ku ta posibel pa sinti e pas di Dios?

² Di bèrdat ta posibel pa nos sinti e pas di Dios den momentonan difísil manera un brote di malesa, kalamidat, disturbio públiko òf persekushon? E kosnan ei por duna nos hopi miedu. Pero, Hesus a duna su siguidónan e konseho akí: “No laga boso kurason bira intrankil ni lag’é krem di miedu.” (Huan 14:27) Rumannan ku a pasa den pruebanan difísil a sigui e konseho ei i, ku yudansa di Yehova, nan por a sinti pas atrobe.

DURANTE UN BROTE DI MALESA

3. Kon un epidemia òf pandemia por kita nos pas?

³ Un epidemia òf pandemia por kambia bida di hende drástikamente. Wak e impakto ku COVID-19 tabatin riba hopi hende. Mas ku mitar di e hendenan ku a partisipá den un enkuesta a bisa ku durante e pandemia ei nan tabatin problema ku drumimentu. Debí na e pandemia, tabatin un oumento drástiko di hende ku strès, kaso di depreshon, alkoholismo, konsumo di droga i mal uso di remedi, violensia den famia i intento di suisidio. Kiko bo por hasi pa keda kalmu i sinti e pas di Dios si surgi brote di un malesa kaminda bo ta biba?

4. Dikon Hesus su profesia tokante e último dianan ta trankilisá nos?

⁴ Hesus a profetisá ku durante e último dianan lo tin pèst, esta, brote di malesa, “den un lugá tras di otro.” (Luk. 21:11) E informashon ei ta trankilisá nos. Dikon? Pasobra ya komo nos sa ku e kosnan ei lo sosodé, nan no ta kue nos di sorpresa. Nos ta mira ku tur kos ta pasando presis manera Hesus a bisa. P’esei, nos lo sigui e konseho ku Hesus a laga atras pa su siguidónan ku lo biba durante e último dianan. El a bisa: “Mira pa boso no spanta.”—Mat. 24:6.

5. (a) Segun Filipensenan 4:8 i 9, kiko nos por pidi Yehova ora tin un brote di malesa? (b) Dikon ta bon pa skucha e grabashonnan di lesamentu di Beibel?

⁵ Ora tin un brote di malesa, ta normal ku nos ta preokupá i te asta haña miedu. Ta esei a pasa ku un ruman ku yama Desi.b Despues ku su tio, primu i dòkter a muri di COVID-19, e tabatin miedu ku e mes lo a haña e vírùs i pega su mama di edat kuné. E tabatin miedu tambe ku lo el a pèrdè trabou i a puntra su mes: ‘Si mi no tin sèn, ta kon mi ta bai hasi paga hür i kumpra kuminda?’ Tur e kosnan ei a keda drei den su mente i e no por a drumi anochi. Pero, Desi a haña su pas bèk. Kon? El a resa na Yehova i a pidié spesífikamente pa yud’é keda trankil i pensa riba kosnan positivo. (Lesa Filipensenan 4:8, 9.) Anto pa skucha Yehova, e tabata pone grabashonnan di e lesamentu di Beibel. El a bisa: “E manera trankil ku e rumannan ta lesa a kalma mi i a kòrda mi ku Yehova stima mi.”—Sal. 94:19.

6. Kon estudio personal i reunion lo yuda bo?

⁶ Ora tin un brote di malesa esei por bruha tur bo rutina, pero no lag’é stroba bo di hasi estudio personal ni asistí na reunion. E eksperensianan den nos publikashon- i vidionan ta laga bo kòrda ku bo rumannan ta sirbi Yehova fielmente apesar ku nan ta pasando den situashonnan meskos ku bo. (1 Ped. 5:9) E reunionnan lo yuda bo yena bo mente ku kosnan positivo for di Beibel. I nan ta duna bo e oportunidat pa animá bo rumannan i haña animashon di nan. (Rom. 1:11, 12) Ora bo pensa riba kon Yehova ta yuda su sirbidónan ora nan tabata malu, tabatin miedu òf a sinti nan nan so, bo fe lo bira mas fuerte i lo bo ta kompletamente konvensí ku lo e t’ei pa abo tambe.

7. Kiko nos ta siña for di Apòstel Huan?

⁷ Hasi tur loke bo por pa keda den kontakto ku bo rumannan. Debí na un brote di malesa, kisas nos lo tin ku tene distansia físiko asta ora nos ta huntu ku nos rumannan. Den un situashon asina bo por sinti bo meskos ku Apòstel Huan. E tabatin hopi gana di mira su amigu Gayo kara kara. (3 Huan 13, 14) Pero, Huan a komprondé ku pa un tempu e no por a hasi esei. Pues, el a hasi loke e tabata por: El a skirbi Gayo un karta. Si bo no por bishitá bo rumannan en persona, tene kontakto ku nan via telefòn, video call òf mensahe. Ora bo hasi esei, lo bo no sinti bo dje so ei i lo bo sinti bo mas trankil. Si bo ta sinti bo hopi anshá, yama e ansianonan i aseptá nan yudansa amoroso.—Isa. 32:1, 2.

ORA DI UN KALAMIDAT

8. Kon un kalamidat por kita bo pas?

⁸ Si bo a yega di pasa den un inundashon, temblor òf kandela, kisas b’a keda sinti bo anshá pa basta tempu. I si b’a pèrdè un ser kerí òf bo kosnan material, kisas lo bo a sinti tristu, desesperá i asta rabiá. Esei no ke men ku bo ta materialista òf ku bo falta fe. Loke bo a pasa aden ta algu hopi duru i ta normal pa sinti asina. (Yòb 1:11) Pero apesar di tur e situashonnan difísil ei, tòg bo por tin pas. Laga nos wak kon.

9. Kiko Hesus a bisa pa prepará nos pa kalamidat?

⁹ Kòrda ku Hesus a bisa ku promé ku e fin yega “lo tin temblor grandi” i otro kalamidatnan. (Luk. 21:11) P’esei, kontrali na hende den mundu ku ta kere ku nunka nan lo pasa den un kalamidat, nos sa ku lo bai tin mas i mas kalamidat i algun di nan por afektá nos. Hesus a profetisá tambe ku lo tin “oumento di maldat,” i nos ta mira esei na e kantidat di krímen, violensia i atakenan di terorismo. (Mat. 24:12) Hesus nunka a bisa ku e tipo di kosnan ei lo pasa solamente ku hende ku no tin un amistat ku Yehova. De echo, hopi sirbidó fiel di Yehova a pasa den kalamidat. (Isa. 57:1; 2 Kor. 11:25) Yehova lo no protehá nos milagrosamente di tur kalamidat, pero sí e ta duna nos tur loke nos tin mester pa keda trankil.

10. Dikon nos por bisa ku nos ta demostrá fe ora nos prepará pa kalamidat? (Proverbionan 22:3)

¹⁰ Si for di adelantá nos plania ki pa hasi durante un emergensia, lo ta hopi mas fásil pa keda trankil ora esei sosodé. Prepará pa un kalamidat no ta nifiká ku nos no tin fe den Yehova. Al kontrario, esei ta proba ku nos tin fe den su abilidat di kuida nos. Beibel mes ta konsehá nos pa prepará pa posibel kalamidat. (Lesa Proverbionan 22:3.) Ademas, Yehova su organisashon bes tras bes ta usa nos reunionnan, artíkulonan den revista, i anunsionan pa animá nos pa prepará pa situashonnan di emergensia.c Abo ta konfia Yehova? Si ta asina, sigui e konseho ei aworakí, promé ku un kalamidat presentá.

11. Kiko bo ta siña for di Margaret?

¹¹ Ban wak loke a pasa un ruman ku yama Margaret. Debí na un kandela grandi ku a kuminsá den e área kaminda e ta biba, outoridatnan a duna òrdu pa tur hende evakuá. Komo ku tur hende tabata purba di hui pareu, tráfiko tabata mal pegá. Tur kaminda tabatin huma pretu i Margaret no por a sali for di su outo. Pero, komo ku e tabata prepará, el a logra sali for di e situashon peligroso ei. E tabatin un mapa den su tas ku a yud’é haña un otro ruta. E ruta ei no tabata deskonosí p’e pasobra ya el a yega di kor’é ora e tabata prepará pa un kaso di emergensia. Margaret a salba debí ku e tabata bon prepará.

12. Dikon nos ta sigui instrukshonnan di siguridat?

¹² Pa nos protekshon i di otro hende, outoridatnan por pone toke de keda, pidi nos evakuá òf pidi nos pa sigui otro instrukshon. Algun hende no ta hasi kaso di e instrukshonnan ei pasobra nan no ke bai laga nan propiedatnan. Kiko nos komo kristian mester hasi? Beibel ta bisa: “Pa kousa di Señor, someté boso na tur outoridat establesé pa hende: sea na un rei komo superior òf na gobernadornan komo esnan ku e ta manda.” (1 Ped. 2:13, 14) Dios su organisashon tambe ta duna nos instrukshon pa nos protekshon. Regularmente nos ta haña rekordatorio pa hasi sigur ku nos a duna e ansianonan nos datonan aktualisá, ya asina nan sa unda pa lokalisá nos den un kaso di emergensia. Bo a hasi esei kaba? Nos ta haña instrukshonnan adishonal tambe enkuanto kiko pa hasi ora nos tin ku keda paden, evakuá, buska produktonan di promé nesesidat anto kon i ki ora pa yuda otro hende. Si nos no obedesé, nos por pone nos bida i bida di e ansianonan na peliger. Kòrda ku e ruman hòmbernan fiel akí ta hasi nan esfuerso pa kuida nos. (Heb. 13:17) Margaret a bisa: “Mi ta konvensí ku ta e instrukshonnan di e ansianonan i di e organisashon tin mi na bida.”

13. Kon e rumannan ku mester a bandoná nan kas a mantené nan goso i pas?

¹³ Hopi di nos rumannan mester a bandoná nan kas debí na kalamidat, guera òf disturbio públiko. Nan a hasi nan bèst pa adaptá na nan situashon nobo i kuminsá bèk ku nan aktividatnan spiritual. Nan ta sigui “deklará e bon notisia di e palabra,” meskos ku e kristiannan di promé siglo ku a ser plamá pa motibu di persekushon. (Echo. 8:4) E trabou di prediká ta yuda nos rumannan focus riba e Reino i no riba nan difikultatnan. Asina ei, nan ta mantené nan goso i pas.

NA MOMENTO DI PERSEKUSHON

14. Kon persekushon por kita nos pas?

¹⁴ Debí na persekushon, nos por pèrdè hopi kos ku normalmente ta duna nos trankilidat. Por ehèmpel, nos ta felis ora nos ta liber pa reuní, prediká i hasi nos kosnan di tur dia sin miedu di kai será. Pero si outoridatnan kita e libertatnan ei for di nos, nos por sinti nos anshá i yen di miedu pa loke lo por pasa. Ta masha normal pa nos sinti asina. Pero, nos mester tene kuidou sí. Hesus a bisa ku debí na persekushon, algun hende lo stòp di siguié. (Huan 16:1, 2) Pues, kon nos por mantené nos pas bou di persekushon?

15. Dikon nos no mester tin miedu di persekushon? (Huan 15:20; 16:33)

¹⁵ Beibel ta bisa: “Tur hende ku ta deseá di biba ku deboshon na Dios komo disipel di Kristu Hesus tambe lo ser persiguí.” (2 Tim. 3:12) Esei ta un bèrdat ku nos ruman Andrei no por a aseptá ora a prohibí nos obra na su pais. El a pensa: “Tin muchu Testigu di Yehova ta biba aki banda. Ta imposibel pa gobièrnu sera nos tur.” Pero, e pensamentu ei no a trankilis’é, ma a ansh’é mas. Otro rumannan a laga e situashon den man di Yehova i no a purba di konvensé nan mes ku nan lo no ser arestá. Nan tabata konsiente ku nan por ser arestá pero nan no tabata dje preokupá ei manera Andrei. Pues, Andrei a disidí di sigui nan ehèmpel i konfia Yehova kompletamente. No a tarda muchu ku e tambe a kuminsá sintié mas trankil, i awor e ta felis apesar di tur e difikultatnan. Meskos ta konta pa nos tambe. Aunke Hesus a bisa nos ku nos lo haña nos ku persekushon, el a sigurá nos ku nos por keda fiel.—Lesa Huan 15:20; 16:33.

16. Ki instrukshon nos tin ku obedesé ora nos haña nos ku persekushon?

¹⁶ Ora nos obra ser restringí òf prohibí, nos lo haña instrukshon for di sukursal i e ansianonan tokante kiko pa hasi. Loke nan bisa nos ta pa nos protekshon, pa hasi sigur ku nos ta sigui haña kuminda spiritual i pa yuda nos sa kon pa sigui prediká bou di e sirkunstansianan ei. Hasi bo bèst pa sigui e instrukshonnan ei, asta si bo no ta komprondé dikon. (Sant. 3:17) Ademas, nunka duna informashon tokante nos rumannan òf tokante aktividatnan di kongregashon na hende ku no tin derecho di sa esei.—Ekl. 3:7.

17. Meskos ku e apòstelnan di promé siglo, kiko nos ta determiná pa hasi?

¹⁷ Un di e motibunan prinsipal pakiko Satanas ta bringa kontra Dios su pueblo ta pasobra ta nan “tin e trabou di duna testimonio di Hesus.” (Rev. 12:17) No laga Satanas ni su mundu spanta bo. Ora nos ta prediká i siña hende e bèrdat apesar di oposishon, esei lo hasi nos felis i nos lo tin pas. Den promé siglo, ora ku e outoridatnan hudiu a bisa e apòstelnan pa stòp di prediká, e hòmbernan fiel ei a skohe pa obedesé Dios. Nan a sigui prediká i esei a hasi nan felis. (Echo. 5:27-29, 41, 42) Klaru ku ora nos obra ta restringí, nos mester ta kouteloso ora nos ta prediká. (Mat. 10:16) Pero si nos hasi nos bèst, nos lo tin pas pasobra nos ta agradá Yehova i ta kompartí un mensahe ku por salba bida di hende.

“E DIOS DI PAS LO TA KU BOSO”

18. Ken por duna nos berdadero pas?

¹⁸ Sea sigur ku ni maske kon difísil e situashon ku nos ta pasando aden ta, nos por sinti pas. Na e momentonan ei, nos tin ku kòrda ku e úniko pas ku por yuda nos ta esun di Dios, esta, esun ku solamente Yehova por duna nos. P’esei, dependé riba Yehova den kaso di un brote di malesa, kalamidat òf persekushon. Hasi bo esfuerso pa sigui tur guia ku ta bini di Yehova su organisashon. Keda pensa riba e bunita speransa ku ta warda bo den futuro. Segun ku bo ta hasi tur e kosnan ei, ‘e Dios di pas lo ta ku bo.’ (Flp. 4:9) Den e siguiente artíkulo nos lo wak kon nos por yuda nos rumannan haña e pas di Dios apesar ku nan ta pasa den tempunan difísil.