Loke Ta Bon i Loke Ta Malu: Algu Ku Nos Tur Mester Pensa Ariba

Si bo ke biaha bai un kaminda ku nunka bo no a bai promé, kiko lo bo hasi?

1. 1. Bai den e direkshon ku bo ta pensa ku bo tin ku bai.

2. 2. Sigui otro hende i spera ku nan sí sa kon pa yega unda bo ke bai.

3. 3. Sigui un guia konfiabel, manera un GPS, un mapa òf un amigu konfiabel ku sa kon pa yega.

Si nos skohe opshon un òf dos, nos lo yega un kaminda. Pero, kisas no ta unda nos kier a bai. Sinembargo, si nos skohe opshon tres, nos por tin sigur ku nos lo yega nos destinashon.

Nos bida ta manera un biahe, i nos ta spera ku lo e hiba nos na un futuro felis. Sea ku nos ta yega na nos destinashon òf nò ta dependé riba e guia ku nos ta skohe ora di tuma desishon.

Mayoria di desishon ku nos ta tuma den bida ta desishonnan chikitu, pero algun desishon ta masha importante. E desishonnan importante ei ta mustra kiko nos ta pensa ta bon òf malu. Ademas, nan por tin influensia riba nos i nos sernan kerí pa hopi tempu, sea pa bon òf pa malu. E desishonnan importante ei tin di haber ku:

• Sèks i matrimonio

• Onestidat, trabou i plaka

• Kon pa lanta yu

• Kon pa trata otro hende

Kon bo por tin sigur ku e desishonnan ku bo tuma relashoná ku e kosnan ei lo hiba na un futuro felis pa bo i bo famia?

E pregunta ku kada un di nos mester hasi nos mes ta: Kiko por yuda nos disidí loke ta bon i loke ta malu?

E revista akí lo splika dikon Beibel ta un bon guia pa yuda nos disidí loke ta bon i loke ta malu.