Bo Tin Fe?

Pa agradá Yehova, nos mester tin fe. Pero Beibel ta bisa ku “no ta tur hende tin fe.” (2 Tes. 3:2) Aunke Apòstel Pablo tabata papia di su persiguidónan, yamando nan “hende malbado . . . ku ta kana perhudiká otro hende,” loke el a bisa tokante fe ta konta pa otro hende tambe. Tin hende no ke aseptá ku tin un Dios ku a krea tur kos. (Rom. 1:20) Algun ta bisa ku nan ta kere den algu òf un ser mas poderoso. Pero esei no ta berdadero fe.

Nos mester ta konvensí ku Yehova ta eksistí i “ta rekompensá” hende ku tin berdadero fe den dje. (Heb. 11:6) Pa nos por haña e sorto di fe akí, nos mester di Dios su spiritu santu. Pues, nos tin ku pidi Yehova duna nos su spiritu santu. (Luk. 11:​9, 10, 13) Yehova a usa su spiritu santu pa guia e eskritornan di Beibel. P’esei, un otro manera importante pa nos haña spiritu santu ta di lesa Beibel. Despues, pensa riba loke nos a lesa i hasi esfuerso pa apliká loke nos a siña. Asina ei, nos ta laga Yehova su spiritu santu yuda nos pa biba na un manera ku ta mustra ku nos tin e sorto di fe ku ta agrad’é.