ARTÍKULO DI ESTUDIO 31
KANTIKA 12 Gran Dios, Yehova
Loke Yehova A Hasi pa Salba Hende for di Piká i Morto
“Dios a stima mundu asina tantu ku el a duna su Yu unigénito.”—HUAN 3:16.
LOKE NOS LO SIÑA
Loke Yehova a hasi pa yuda nos lucha kontra piká. I kon el a habri kaminda pa nos disfrutá di bida pa semper, liber di piká.
1-2. (a) Splika kiko piká ta, i kon nos por vens’é. (Wak “Splikashon.”) (b) Kiko nos lo trata den e artíkulo akí i den e sobrá kuater artíkulonan den E Toren di Vigilansia akí? (Wak tambe “Un mensahe na e Lektornan” den e edishon akí.)
KUANTU bo ta kere Yehova stima bo? Si bo ke sa esei, lo ta bon pa bo studia loke el a hasi pa salba bo for di piká i morto. Pikáa ta un enemigu masha kruel ku bo no por vense riba bo mes. Hende ta peka tur dia i morto ta konsekuensia di piká. (Rom. 5:12) Pero tin bon notisia. Yehova ta sigurá nos ku lo e salba nos for di piká i morto!
2 Yehova tin mas o ménos 6.000 aña ta yuda hende lucha kontra piká. Dikon e ta hasi esei? Pasó e stima nos. For di e momento ku Yehova a krea hende, el a stima nan mashá. P’esei, e ta hasi hopi esfuerso pa yuda nan den nan lucha kontra piká. Yehova sa ku piká ta hiba na morto, anto e no ke pa nos muri. E ke pa nos biba pa semper. (Rom. 6:23) Anto bo por tin sigur ku e ke esei pa abo tambe. Den e artíkulo akí nos lo trata tres pregunta: (1) Ki speransa Yehova a duna hende imperfekto? (2) Kiko hende imperfekto den tempu di Beibel a hasi pa agradá Yehova? (3) Kiko Hesus a hasi pa salba hende for di piká i morto?
KI SPERANSA YEHOVA A DUNA HENDE IMPERFEKTO?
3. Kon Ádam ku Eva a bira pekadó?
3 Ora Yehova a krea e promé hòmber i muhé, el a duna nan tur loke nan tabatin mester pa ta felis: un bunita lugá di biba, un matrimonio i un trabou fasinante. Nan mester a yena e tera ku nan desendientenan i hasi henter e planeta un paradeis meskos ku e hòfi na Éden. Un kos so el a prohibí nan di hasi. Anto el a spièrta nan ku si nan skohe pa hasi e kos ei tòg, nan lo muri. Ma nos tur sa kiko a pasa. Un angel malbado ku no tabata stima Dios ni nan, a konvensé Ádam i Eva pa desobedesé Dios. Sí, nan a bai tras di Satanas. Aunke nan por a mira kuantu nan Tata, Yehova, tabata stima nan, nan no a konfia den dje. En bes di obedes’é, nan a peka. Anto a pasa presis loke Yehova a bisa. For di e dia ei padilanti, nan a sufri pa restu di nan bida. Nan a bira bieu i ku tempu nan a muri.—Gén. 1:28, 29; 2:8, 9, 16-18; 3:1-6, 17-19, 24; 5:5.
4. Dikon Yehova ta odia piká? (Romanonan 8:20, 21)
4 Yehova a laga skirbi e relato ei den Beibel pa yuda nos komprondé kuantu e ta odia piká. Piká ta daña nos amistat ku Yehova i ta kousa morto. (Isa. 59:2) Anto nèt p’esei Satanas gusta piká. El a kousa tur e problemanan akí i e ke pa hende sigui peka. Kisas el a pensa ku ora Ádam ku Eva a peka, el a logra stroba e meta ku Yehova tabatin pa hende. Pero loke e no a realisá ta kuantu Yehova stima hende. Dios nunka a kambia su propósito pa e desendientenan di Ádam ku Eva. E stima hende masha hopi mes i p’esei mesora el a duna nan un speransa. (Lesa Romanonan 8:20, 21.) E tabata sa ku algun di nan lo a skohe pa stim’é i obedes’é. I komo nan Tata i Kreador, lo e hasi posibel pa nan ser librá di piká i pa nan hala serka dje. Pero kon Yehova lo a logra tur esei?
5. Ki speransa Yehova a duna humanidat mesora despues ku Ádam i Eva a peka? (Génesis 3:15)
5 Lesa Génesis 3:15. Pa medio di e profesia akí, nos ta mira ku mesora despues ku Ádam i Eva a peka Yehova a duna humanidat speransa. El a bisa kiko lo pasa ku Satanas i ku lo tin un “desendiente” ku lo salba humanidat. Ku tempu, e desendiente ei lo destruí Satanas i drecha tur e problemanan ku el a kousa den e hòfi na Éden. (1 Huan 3:8) Pero promé, Satanas lo heridá e desendiente ei i kousa su morto. Esei lo hùrt Yehova masha hopi mes. Pero, Yehova tabata dispuesto pa pasa den tur e doló ei i permití e “desendiente” sufri pa asina salba hopi hende for di piká i morto.
LOKE HENDE IMPERFEKTO DEN TEMPU DI BEIBEL A HASI PA AGRADÁ YEHOVA
6. Kiko hende ku fe, manera Abel i Noe, a hasi pa hala serka Yehova?
6 Durante e siglonan ku a sigui, pokopoko Yehova a indiká loke hende imperfekto por hasi pa hala serka dje. Abel tabata e di dos yu di Ádam ku Eva i e promé hende ku a pone fe den Yehova despues di e rebelion na Éden. Abel tabata stima Yehova i kier a hasié kontentu i hala serka dje. P’esei, e kier a duna Yehova algu. Abel tabata un wardadó di karné, pues el a kue algun di su lamchinan, mata nan i ofresé nan komo sakrifisio na Yehova. Kon Yehova a reakshoná? El “a keda kontentu ku Abel, i el a aseptá su ofrenda.” (Gén. 4:4) Ma no ta e sakrifisionan di Abel so el a aseptá. El a keda kontentu ku sakrifisio di hopi otro hende ku tambe a stim’é i konfi’é manera Noe. (Gén. 8:20, 21) Aseptando e sakrifisionan ei, Yehova a indiká ku hende imperfekto por agrad’é i hala serka dje.b
7. Kiko nos ta siña for di loke Ábraham tabata dispuesto pa hasi?
7 Ábraham tabatin fe fuerte den Yehova. Yehova a pidié hasi algu hopi duru—sakrifiká su yu Ísak. Esei sigur lo a hasi Ábraham masha hopi doló mes. Pero, e tabata desididu pa hasi loke Yehova a pidié. Ma nèt ora Ábraham tabata bai mata su yu, Yehova a stòp e. For di loke Ábraham tabata dispuesto pa hasi, nos ta siña un bèrdat importante: Yehova lo ta dispuesto pa ofresé su Yu ku mas el a stimá komo un sakrifisio. Dikon? Pasó e stima hende masha hopi mes.—Gén. 22:1-18.
8. Kiko nos ta siña for di e sakrifisionan di bestia ku e Lei a eksigí? (Levítiko 4:27-29; 17:11)
8 Siglonan despues, den e Lei ku Yehova a duna e nashon di Israel, el a bisa nan pa ofresé sakrifisio di bestia pa asina nan por haña pordon pa nan pikánan. (Lesa Levítiko 4:27-29; 17:11.) E sakrifisionan ei tabata un muestra di e mihó sakrifisio ku Yehova lo a sòru p’e i ku lo salba humanidat for di piká pa semper. Yehova a bisa su profetanan pa skirbi tokante un desendiente primintí, ku a resultá di ta e Yu unigénito di Dios, ku lo tin ku sufri i ser matá. Lo e ser matá manera un lamchi ku a ser sakrifiká. (Isa. 53:1-12) Para pensa un ratu: Yehova tabata dispuesto pa duna e Yu ku mas el a stima komo un sakrifisio pa asina salba humanidat for di piká i morto. Anto esei ta inkluí abo tambe!
LOKE HESUS A HASI PA SALBA HENDE FOR DI PIKÁ
9. Kiko Huan Boutista a bisa tokante Hesus? (Hebreonan 9:22; 10:1-4, 12)
9 Na aña 29 di promé siglo, Huan Boutista a mira Hesus di Názarèt i a bisa: “Ata e Lamchi di Dios ku ta kita piká di mundu!” (Huan 1:29) Ku e palabranan ei, Huan Boutista a indiká ku Hesus tabata esun ku lo a sakrifiká su bida pa humanidat. Awor por fin e desendiente ku Yehova a primintí a yega i ta é lo salba humanidat di piká unabes i pa semper.—Lesa Hebreonan 9:22; 10:1-4, 12.
10. Kon Hesus a mustra ku el a “bini pa yama” pekadó?
10 Hesus tabata sa ku e motibu prinsipal pakiko hende tabata sufri ta pasó nan ta pekadó. P’esei e tabatin atenshon spesial pa esnan ku tabata sinti nan malu pa esei i tabata invitá nan pa bira su siguidó. El a usa un ilustrashon pa splika pakiko: “Hende bon di salú no tin mester di dòkter, ma hende malu sí.” El a agregá: “Mi no a bini pa yama hende hustu, sino pekadó.” (Mat. 9:12, 13) Anto ta esei Hesus a hasi. Hesus a papia amabel i a pordoná un muhé pekadó ku a laba su pianan ku su lágrimanan. (Luk. 7:37-50) Na un otro okashon, Hesus a siña un muhé samaritano bèrdatnan importante aunke e tabata sa ku e muhé tabata biba ku un hòmber ku no tabata su kasá. (Huan 4:7, 17-19, 25, 26) Pero kiko awor di hende ku a muri debí na piká? Wèl, Hesus a demostrá ku Yehova a dun’é poder di resusitá hende. El a resusitá hende hòmber, muhé i mucha.—Mat. 11:5.
11. Dikon hende pekadó tabata sinti nan kómodo serka Hesus?
11 Hesus a komprondé kon hende pekadó tabata sinti i e tabata trata nan bon. P’esei, no ta nada straño anto ku asta hende ku tabata hasi kos hopi malu, a sinti nan kómodo pa aserká Hesus. (Luk. 15:1, 2) Anto Hesus a elogiá esnan ku a pone fe den dje i a trata nan ku kariño. (Luk. 19:1-10) Hesus tabata miserikòrdioso meskos ku su Tata. (Huan 14:9) For di e manera ku Hesus a papia ku hende i a trata nan, nos ta siña ku Yehova tin hopi kariño, ta stima hende imperfekto i ke yuda nan gana e lucha kontra piká. Hesus a yuda pekadó haña gana di kambia nan bida i siguié.—Luk. 5:27, 28.
12. Kiko Hesus a bisa su siguidónan tokante su morto?
12 Hesus tabata sa kiko tabata sper’é. Mas ku un biaha, el a bisa su siguidónan ku lo e ser traishoná i kologá na un staka. (Mat. 17:22; 20:18, 19) E tabata sa ku su sakrifisio lo a kita piká di mundu, manera Huan Boutista i otro profetanan a bisa. Hesus a bisa tambe ku despues ku e muri, lo e “hala tur sorto di hende” serka dje. (Huan 12:32) Hende imperfekto ku pone fe den Hesus i purba di imit’é lo agradá Yehova i al final nan lo “ser librá di piká.” (Rom. 6:14, 18, 22; Huan 8:32) P’esei Hesus tabatin kurashi i tabata dispuesto pa muri na un manera doloroso pa asina salba nos.—Huan 10:17, 18.
13. Kon Hesus a muri, i kiko su morto ta siña nos tokante Yehova Dios? (Wak e plachi.)
13 Un di Hesus su bon amigunan a traishon’é. Despues Hesus su enemigunan a arest’é, insult’é i akus’é di kosnan ku e no a hasi. Nan a dun’é sentensia di morto i a tortur’é. I por último, sòldánan a klab’é na staka. Tur esaki a pone Hesus sufri hopi. Pero tabatin un Persona ku a sufri asta mas: Yehova. Yehova a wanta su mes pa no usa su poder ilimitá pa para sufrimentu di su Yu. Pero dikon el a laga Hesus, su Yu di mas stimá, sufri i muri? Den un palabra: Amor. Hesus a bisa: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.”—Huan 3:16.
Yehova a pasa den hopi doló i sufrimentu ora el a laga su Yu ser ehekutá pa asina libra nos for di piká i morto (Wak paragraf 13)
14. Kiko bo ta siña for di e sakrifisio di Hesus?
14 Hesus su sakrifisio ta e prueba di mas grandi di kuantu Yehova stima e desendientenan di Ádam ku Eva. E ta proba tambe kuantu Yehova stima abo. El a sakrifiká e Yu ku mas el a stima i a soportá hopi doló pa por salba abo for di piká i morto. (1 Huan 4:9, 10) Sí, e ke yuda kada un di nos lucha kontra piká awor—i gana e bataya den futuro!
15. Kiko nos mester hasi si nos ke benefisiá di e regalo ku Dios a duna hende imperfekto?
15 Dios a duna hende imperfekto un regalo pa asina nos por haña pordon pa nos pikánan. Esei ta e sakrifisio di su Yu unigénito. Pero pa Dios pordoná nos, nos tin ku hasi algu sí. Kiko esei ta? Huan Boutista i despues Hesukristu mes a duna e kontesta: “Arepentí, pasobra e Reino di shelu a yega serka.” (Mat. 3:1, 2; 4:17) Pues, ta masha importante pa nos arepentí di nos pikánan si realmente nos ke lucha kontra piká i hala serka Yehova i ser pordoná. Pero, kiko ke men arepentí, i kon esei ta yuda nos sigui agradá Yehova aunke ku nos ta pekadó ainda? E siguiente artíkulo lo kontestá esei.
KANTIKA 18 Gratitut pa e Reskate
a SPLIKASHON: Den Beibel, e palabra “piká” por referí na ora nos ta hasi loke Yehova ta bisa ku ta malu òf ora nos keda sin hasi loke Yehova ta bisa ku ta korekto. Pero “piká” por referí tambe na e imperfekshon ku tur hende a heredá for di Ádam. I debí na e piká ku nos a heredá, ku tempu nos tur ta muri.