Bo Por Tin Pas Mental Apesar di Guera i Konflikto
Gary, kende ántes tabata den servisio militar, a bisa: “Promé ku mi a kuminsá studia Beibel, mi no tabata sa dikon tin asina tantu krueldat, inhustisia i problema na mundu. Pero awor mi tin pas mental. Mi sa ku Yehova Dios lo hasi mundu un lugá trankil i sigur pa biba.”
No ta Gary so ta sinti asina. Wak kon Beibel a yuda otro hende tambe.
BEIBEL TA BISA: “O Yehova, bo ta bon i semper kla pa pordoná.”—Salmo 86:5.
KON E TEKSTO EI TA YUDA UN PERSONA? “E teksto ei ta sigurá mi ku Yehova ta miserikòrdioso. Mi sa ku e ta kla pa pordoná mi pa tur e kosnan ku mi a hasi tempu ku mi a bringa den guera.”—Wilmar, Colombia.
BEIBEL TA BISA: “Lo mi krea shelu nobo i un tera nobo. Hende lo no kòrda riba e kosnan di ántes mas, ni e kosnan ei lo no keda tormentá nan kurason.”—Isaías 65:17.
KON E TEKSTO EI TA YUDA UN PERSONA? “Mi ta sufri di síntoma di ansiedat fuerte i di depreshon debí na e kosnan ku mi a eksperensiá tempu ku mi tabata den servisio militar. Pero e teksto ei ta kòrda mi ku pronto Yehova lo laga mi lubidá tur mal rekuerdo ku mi tin; nan lo disparsé pa semper. Esei sigur ta un bunita regalo!”—Zafirah, Merka.
BEIBEL TA BISA: “Durante su reinado, hende hustu lo ta manera mata ku ta sprùit di nobo, i lo tin pas tur kaminda te ora ku luna no ta eksistí mas.”—Salmo 72:7.
KON E TEKSTO EI TA YUDA UN PERSONA? “Hopi biaha, mi ta pensa riba e palabranan di e teksto ei. Pronto, guera i tur e kosnan malu ku e ta trese kuné lo no eksistí mas. Nos lo no mester preokupá mas pa siguridat di nos sernan kerí.”—Oleksandra, Ukrania.
BEIBEL TA BISA: “Bo mortonan lo biba. . . . Boso ku ta morto den stòf, spièrta i grita di alegria!”—Isaías 26:19.
KON E TEKSTO EI TA YUDA UN PERSONA? “Kasi tur e miembronan di mi famia a muri den e genosidio di e tribu Tutsi. Pero e teksto ei ta sigurá mi ku lo mi mira nan atrobe. Mi ta anhelá di tende nan stèm atrobe i mira kon kontentu nan lo ta ora nan ser resusitá!”—Marie, Ruanda.
BEIBEL TA BISA: “Djis akí, lo no tin hende malbado mas. . . . Pero hende mansu lo heredá tera, i nan lo disfrutá di pas na abundansia.”—Salmo 37:10, 11.
KON E TEKSTO EI TA YUDA UN PERSONA? “Aunke e guera a stòp, ainda tin inhustisia i hende ku ta hasi kos malu. E versíkulonan ei a yuda mi hopi. Yehova ta mira tur kos, i e ta komprondé mi situashon. E ta primintí ku pronto tur sufrimentu lo kaba i lo pasa pa olvido.”—Daler, Tadjikistan.
E personanan ku nos a kaba di menshoná ta entre e miónes di Testigunan di Yehova ku a haña pas mental despues di analisá loke Beibel ta bisa. Nan a siña kon pa vense odio ku ta eksistí entre rasa, nashon i tribu. Nan a siña tambe kon pa vense tur otro tipo di odio. (Efesionan 4:31, 32) Testigunan di Yehova ta keda neutral den asuntu polítiko, i nan no ta partisipá den ningun akto violento.—Huan 18:36.
Ademas, mundialmente, Testigunan di Yehova ta yuda otro i sostené otro manera famia. (Huan 13:35) Por ehèmpel, Oleksandra, menshoná anteriormente, a hañ’é ta hui bai ku su ruman muhé na un otro pais debí na guera. El a bisa: “Ora nos a krusa frontera di e pais, mesora nos a mira algun Testigu di e pais ei kla pará pa duna nos bonbiní. E sosten ku nan a duna nos a yuda nos adaptá na nos bida nobo komo refugiado den e pais ei.”
Gustosamente, nos ke invitá bo pa asistí na nos reunionnan. Na nos reunionnan, lo bo siña kon bo por haña pas mental for di awor i kon bo por ta na pas ku otro hende. Ademas, lo bo siña tokante e promesanan di Beibel pa futuro, esta, ku lo tin berdadero pas na mundu. Bishitá jw.org pa buska un reunion ku ta keda serka di bo òf pa pidi un kurso di Beibel interaktivo grátis. Un Testigu di Yehova por yuda bo, usando e publikashon Bo Por Disfrutá di Bida pa Semper!