No Tarda pa Batisá

1. Ki bon motibunan bo tin pa batisá?

BO TA stima Yehova Dios? E ta esun ku a duna bo tur e regalonan ku bo ta disfrutá di dje, asta bida mes. Bo ke demostr’é ku bo ta stim’é? E mihó manera pa bo demostrá esei ta di dediká bo bida na dje i batisá. For di e momento ei, bo ta bira parti di e famia di Yehova. Asina ei, komo bo Tata i Amigu, lo bo ta di dje i lo e guiá bo i kuida bo. (Sal. 73:24; Isa. 43:​1, 2) Ademas, dedikashon i boutismo ta duna bo e speransa di biba pa semper.—1 Ped. 3:21.

2. Kiko nos lo analisá den e artíkulo akí?

² Pero, kisas pa un motibu òf otro bo ta duda pa batisá. No wòri, mas hende tabatin e mesun sintimentu ei. Miónes di hende mester a hasi kambio den nan kondukta i manera di pensa pa nan por a batisá. Anto awor nan ta sirbi Yehova kontentu i ku entusiasmo. Den e artíkulo akí nos lo papia tokante algun hende den promé siglo. Nos lo analisá algun opstákulo ku nan a enfrentá i mira kiko nos por siña for di nan ehèmpel.

E SAMARITANONAN A BATISÁ

3. Ki kambio algun samaritano a hasi?

³ E samaritanonan den tempu di Hesus tabata pertenesé na un sekta religioso den bisindario di e statnan antiguo Síkèm i Samaria, ku a keda nort di Hudea. Promé ku e samaritanonan por a batisá, nan mester a hasi algun kambio. Nan mester a siña konosé e Palabra di Dios mihó. Esei ta debí ku nan tabata kere ku Dios a inspirá e promé sinku bukinan so, esta, di Génesis te ku Deuteronomio, i posiblemente e buki di Hosue. Banda di esei, e samaritanonan tabata ferwagt ku e Mesías lo a bini, segun loke Yehova a primintí na Deuteronomio 18:18 i 19, pero nan mester a rekonosé ku Hesus tabata e Mesías primintí. (Huan 4:25) Anto “hopi di e samaritanonan” a rekonosé esei. (Huan 4:39) Tambe, komo ku hopi di e kristiannan tabata hudiu, algun samaritano mester a lucha kontra e prehuisio ku nan tabatin kontra e hudiunan.—Luk. 9:​52-54.

4. Segun Echonan 8:​5, 6 i 14, kiko e samaritanonan a hasi ora ku Felipe a prediká na nan?

⁴ Loke a yuda e samaritanonan batisá. Felipe tabata un predikadó di bon notisia di Dios. Ora el a prediká na e samaritanonan “tokante Kristu,” algun di nan “a aseptá palabra di Dios.” (Lesa Echonan 8:​5, 6, 14.) Aunke ku Felipe tabata hudiu, nan no a rechasá su mensahe. Kisas nan a kòrda sierto teksto for di e Pentateuko ku a bisa ku Dios no ta parsial. (Deu. 10:​17-19) Sea kual sea e kaso, nan “tabata presta masha atenshon na loke Felipe tabata bisa” tokante Kristu. Felipe tabata hasi tambe hopi milager, manera kura hende i saka demoño. (Echo. 8:7) Tur e kosnan ei a yuda nan rekonosé ku Felipe tabatin Dios su spiritu santu.

5. Kiko nos ta siña for di e samaritanonan?

⁵ Tabatin vários kos ku por a stroba e samaritanonan ei. Pa kuminsá, Felipe tabata un hudiu i loke e tabata prediká tabata nobo pa nan. Ma apesar di e kosnan ei, unabes ku nan tabata konvensí ku loke Felipe a siña nan tabata bèrdat, nan no a tarda pa batisá. Beibel ta bisa: “Awor, ora Felipe a bini i kuminsá anunsiá bon notisia tokante e Reino di Dios i tokante e nòmber di Hesukristu, e hendenan a kere Felipe su mensahe. Anto, tantu hende hòmber komo hende muhé a ser batisá.” (Echo. 8:12) Kiko di abo? Abo ta konvensí ku Dios su Palabra ta bèrdat? Bo ta konvensí ku Testigunan di Yehova ta demostrá e amor ku Kristu a bisa ku su berdadero siguidónan lo demostrá? (Huan 13:35) Si ta asina, no tarda pa batisá. Konfia ku Yehova lo bendishoná bo.

6. Kon loke Ruben a hasi por yuda abo?

⁶ Ruben ku ta biba na Alemania a lanta den e bèrdat. Pero tempu ku e tabata hóben el a kuminsá duda si ègt Dios ta eksistí. Kiko a yud’é kita su dudanan? El a realisá ku e tabatin mester di mas konosementu, anto el a hasi algu tokante esei. El a bisa: “Pa mi por a kita mi dudanan, m’a hasi estudio personal. Mi mester a studia e tópiko di evolushon vários biaha.” El a lesa e buki Is er een Schepper die om u geeft? E buki ei a yuda Ruben masha hopi mes. El a yega na e konklushon: ‘Waw! Yehova ta eksistí.’ Anto ora ku Ruben a bishitá e sede mundial, su amor pa su rumannan rònt mundu a bira asta mas grandi. Ora el a bai bèk Alemania, el a batisá ku 17 aña. Si abo tambe ta duda den algu ku bo a siña, hasi investigashon den nos publikashonnan. “Konosementu eksakto” lo yuda bo kita bo dudanan. (Efe. 4:​13, 14) Anto segun ku bo ta mira i tende tokante e amor i union ku tin entre Dios su pueblo rònt mundu i bo mira esaki den bo mes kongregashon, bo amor pa e hermandat lo krese.

SAULO DI TARSO A BATISÁ

7. Ki Saulo mester a kambia?

⁷ Ban wak loke nos por siña di Saulo di Tarso. E tabata vèrsá den hudaismo i tabata birando mas i mas prominente entre e hudiunan. (Gal. 1:​13, 14; Flp. 3:5) E tempu ei hopi hudiu tabata kere ku e kristiannan tabata apóstata. P’esei, Saulo a persiguí e kristiannan sin miserikòrdia. Segun e, ta Dios su boluntat e tabata hasi. (Echo. 8:3; 9:​1, 2; 26:​9-11) Awor, si Saulo kier a pone fe den Hesus i batisá, e mes mester tabata dispuesto pa wòrdu persiguí.

8. (a) Kiko a yuda Saulo yega na boutismo? (b) Segun Echonan 22:​12-16, kon Ananías a yuda Saulo? (Wak e plachi.)

⁸ Loke a yuda Saulo batisá. Ora ku Hesus a papia ku Saulo for di shelu, Saulo a bira siegu. (Echo. 9:​3-9) Pa tres dia, e no a kome ni bebe nada i sigur el a keda pensa riba loke a sosodé. Saulo a bin realisá ku Hesus tabata e Mesías i ku Hesus su siguidónan tabatin e religion berdadero. Sigur Saulo a sintié hopi malu di tabata kómplise den morto di Esteban! (Echo. 22:20) Na final di tres dia, un disipel ku yama Ananías a bini serka Saulo i a dun’é su bista bèk. Ademas, el a anim’é pa no tarda pa batisá. (Lesa Echonan 22:​12-16.) Saulo tabata humilde, a skucha Ananías i a batisá mesora.—Echo. 9:​17, 18.

9. Kiko nos por siña for di Saulo?

⁹ Tin vários kos ku nos por siña for di Saulo. Por ehèmpel, e no a laga orguyo ni miedu di hende strob’é di batisá. Saulo tabata humilde i tabata dispuesto pa hasi kambio den su bida pa bira un siguidó di Kristu. (Echo. 26:​14, 19) El a skohe pa bira un kristian aunke esei lo a nifiká persekushon p’e. (Echo. 9:​15, 16; 20:​22, 23) Anto despues di su boutismo, el a sigui dependé riba Yehova pa yud’é perseverá durante vários prueba. (2 Kor. 4:​7-10) Ora bo batisá komo Testigu di Yehova, kisas bo por haña bo ku prueba òf oposishon, pero bo no ta so. Bo por tin sigur ku Yehova i Hesus semper t’ei pa yuda.—Flp. 4:13.

10. Kon Anna su eksperensia por yuda abo?

¹⁰ Anna a lanta na Ost Europa. Su mama a batisá i despues, ku aprobashon di su tata, Anna a kuminsá studia ora e tabatin nuebe aña. Pero e restu di su famia ku tabata biba huntu ku nan tabatin problema ku esei. Pa e famia tabata un bèrgwensa pa un hende di e famia bandoná religion di e antepasadonan. Ora Anna tabatin 12 aña, el a pidi su tata p’e batisá. Su tata tabata ke sa si esaki tabata un kos ku e mes ke hasi òf ta hende ta preshon’é. Anna a kontest’é: “Mi stima Yehova.” Pues su tata a bai di akuerdo p’e batisá. Despues di su boutismo, su famia a sigui hasi chèrchi di dje i trat’é malu. Un di nan a bis’é: “Mihó b’a hiba un bida kon ku ta i huma sigaria ku bira un Testigu di Yehova.” Kon Anna a trata ku su situashon? El a bisa: “Yehova a duna mi forsa i mi mayornan tambe a apoyá mi.” Anna a traha un lista di tur e biahanan ku el a sinti Yehova su yudansa den su bida. Ratu-ratu e ta pasa den e lista p’e no lubidá nunka kon Yehova semper a yud’é. Si bo tin miedu di enfrentá oposishon, kòrda ku Yehova lo yuda abo tambe.—Heb. 13:6.

KORNELIO A BATISÁ

11. Kiko por a stroba Kornelio di batisá?

¹¹ Beibel ta papia tambe di Kornelio. E tabata “un senturion,” esta, un ofisial ku tabata na mando riba 100 sòldá romano. (Echo. 10:​1, nota) Debí na esei, lo e tabata un persona hopi importante den komunidat i den e ehérsito. Ademas, e tabata un persona ku “tabata gusta yuda hende pober.” (Echo. 10:2) Yehova a manda Apòstel Pedro pa bai papia kuné tokante e bon notisia. Akaso Kornelio a laga su posishon prominente strob’é di batisá?

12. Kiko a yuda Kornelio yega na boutismo?

¹² Loke a yuda Kornelio batisá. Beibel ta bisa ku Kornelio tabata “un hòmber deboto na Dios, i e huntu ku tur su hendenan di kas tabata adorá Dios.” Ademas, semper e tabata hasi orashon na Dios. (Echo. 10:2) Ora ku Pedro a kompartí e bon notisia ku Kornelio, e i su famia a aseptá Kristu i no a tarda pa batisá. (Echo. 10:​47, 48) Sin duda Kornelio tabata dispuesto pa hasi kualke kambio nesesario pa asina e ku su famia por a sirbi Yehova.—Hos. 24:15; Echo. 10:​24, 33.

13. Kiko nos por siña for di Kornelio?

¹³ Ni Saulo ni Kornelio no a laga nan puesto prominente stroba nan di bira un kristian. Kiko di abo? Abo mester hasi kambio grandi den bo bida pa bo por batisá? Si ta asina, bo por konta ku Yehova lo yuda bo. Si bo ta determiná pa sirbi Yehova i biba segun su prinsipionan den Beibel, lo e bendishoná bo sigur.

14. Kon Tsuyoshi su ehèmpel por yuda bo?

¹⁴ Tsuyoshi ta biba na Hapon. E mester a hasi algun kambio na su trabou pa asina e por a kualifiká pa boutismo. E tabata traha na Ikenobo, un skol ku ta siña kon pa traha areglo floral. Tsuyoshi tabata asistènt di e kabes di e skol ei. E kabes di e skol tabata traha areglonan floral pa entiero, i durante e entiero e tabata partisipá den e ritonan budista. Ora ku e kabes di skol no por a bai, Tsuyoshi tabata bai na su lugá. Pero, ora ku Tsuyoshi a siña e bèrdat tokante morto, el a ripará ku e no por a batisá si e sigui partisipá den e ritonan. P’esei, el a disidí ku e no ta bai partisipá mas. (2 Kor. 6:​15, 16) Tsuyoshi a papia ku e kabes di skol tokante e situashon. Kiko tabata e resultado? Tsuyoshi por a keda ku su trabou i no tabatin nodi di partisipá den e ritonan. Un aña despues ku el a kuminsá studia, el a batisá.a Si bo tin ku ahustá bo trabou pa asina agradá Yehova, sea sigur ku lo e pèrkurá pa bo i bo famia.—Sal. 127:2; Mat. 6:33.

E KORINTIONAN A BATISÁ

15. Kiko por a stroba e korintionan di batisá?

¹⁵ Den tempu di Beibel, e stat Korinto tabata konosí pa su materialismo i inmoralidat. Hopi hende einan tabata hiba un bida ku Dios no ta aprobá. Pues ta bisto ku lo tabata difísil pa un hende den e stat ei kuminsá sirbi Yehova. Asina mes, ora ku Apòstel Pablo a bini den e stat i a prediká e bon notisia tokante Kristu, “hopi di e korintionan ku a tende e mensahe tambe a bira kreyente, i nan a ser batisá.” (Echo. 18:​7-11) Ora ku Señor Hesukristu a aparesé na Pablo den un vishon, el a bisa Pablo: “Tin hopi hende den e stat akí ku lo kere den mi.” Pues, Pablo a sigui prediká einan pa un aña i mei.

16. Kiko a yuda e korintionan hasi kambionan drástiko pa batisá? (2 Korintionan 10:​4, 5)

¹⁶ Loke a yuda e korintionan batisá. (Lesa 2 Korintionan 10:​4, 5.) E Palabra di Dios i Yehova su spiritu santu a yuda nan hasi kambionan drástiko den nan bida. (Heb. 4:12) Na Korinto, hopi hende tabata praktiká kosnan manera buracheria, ladronisia i homoseksualidat. Pero esnan ku a aseptá e bon notisia tokante Kristu a logra stòp di hasi e kosnan ei.—1 Kor. 6:​9-11.b

17. Kiko nos por siña for di e korintionan?

¹⁷ Pa e hendenan na Korinto por a bira kristian, algun di nan mester a hasi kambionan hopi grandi den nan bida. Pero, nan no a laga e difikultatnan ei stroba nan. Nan a hasi hopi esfuerso pa subi e kaminda smal ku ta hiba na bida eterno. (Mat. 7:​13, 14) Bo ta luchando ku algu pa bo por yega na boutismo? Awèl, no stòp di lucha! Roga Yehova pa su spiritu santu yuda bo bringa e deseo di hasi loke ta robes.

18. Kon Monika su ehèmpel por yuda bo?

¹⁸ Monika, un ruman ku ta biba na Georgia, mester a traha duru pa hasi algun kambio p’e yega na boutismo. Por ehèmpel, e kosnan ku e tabata papia, wak i skucha no tabata kosnan ku Yehova ta gusta. El a bisa: “Ora mi tabata tiner, e kos ku mas a yuda mi tabata orashon. Yehova tabata sa ku mi kier a hasi loke ta bon, anto semper el a yuda mi i guia mi.” Monika a batisá ku 16 aña. Abo ta luchando pa stòp di hasi sierto kos pa hasi Yehova kontentu? Si ta asina, sigui pidi Yehova pa duna bo e forsa pa hasi e kambionan nesesario. Ku mil amor lo e duna bo su spiritu santu.—Huan 3:34.

BO FE POR VENSE OPSTÁKULO

19. Kiko lo yuda bo vense opstákulo? (Wak e plachi.)

¹⁹ Ni maske ki opstákulo bo ta luchando kuné aworakí ku ta stroba bo di batisá, sea sigur ku Yehova ta stima bo i ke pa bo bira parti di su famia. Den promé siglo, Hesus a bisa su disipelnan: “Si boso fe ta djis e tamaño di un pipita di mòster, boso lo bisa e seru akí: ‘Kita for di aki, bai aya,’ i lo e kita, i nada lo no ta imposibel pa boso.” (Mat. 17:20) E disipelnan ei tabata huntu ku Hesus pa djis un par di aña so. Pues nan fe tabatin ku krese mas ainda. Pero Hesus a sigurá nan ku si nan sigui traha riba nan fe, Yehova lo a yuda nan kita kualke opstákulo, ni maske kon grandi nan ta. Anto si meskos ku nan abo tambe oumentá bo fe, Yehova lo yuda abo tambe!

20. Kon e ehèmpelnan den e artíkulo akí a yuda bo?

²⁰ Si bo a ripará ku tin un par di kos ku ta stroba bo di batisá, no tarda pa traha riba nan. Tantu e ehèmpel di e rumannan di promé siglo komo di esnan den nos tempu por yuda bo mira ku bo no ta bo so. Nan ehèmpel lo animá bo i motivá bo pa dediká bo bida na Yehova i batisá. Anto esei lo ta e mihó desishon ku bo por tuma!