Siña Pensa Manera Yehova i Hesus

1-2. Kiko tur ta enbolbé den stima Yehova, i kon Hesus a demostrá ku e tabata stima Yehova ku henter su mente?

HESUS a bisa ku e mandamentu di mas importante den Lei di Moises ta: “Stima Yehova bo Dios ku henter bo kurason, ku henter bo alma, ku henter bo mente i ku tur bo forsa.” (Mar. 12:30) Ripará ku pa stima Yehova, nos kurason, esta, nos deseo-, sintimentu- i emoshonnan, mester ta enbolbí. Tambe ta nesesario pa nos dediká henter nos alma, forsa i energia na Yehova. Pero, stima Yehova ta enbolbé tambe nos mente, esta, nos manera di pensa. Aunke ku nos no por komprondé Yehova su manera di pensa kompletamente, nos tin ku purba di pensa manera e. Algu ku por yuda nos den esei ta di studia “e mente di Kristu,” pasobra Hesus ta pensa manera su Tata.—1 Kor. 2:16 i nota di estudio “nosotros sí tenemos la mente de Cristo”

² Hesus a stima Yehova ku henter su mente. E tabata sa loke Yehova tabata ke pa e hasi i tabata determiná pa hasi esei aunke e mester a sufri. Debí ku e kos di mas importante den su bida tabata pa hasi e boluntat di su Tata, e no a permití nada otro kita su mente for di esei.

3. Ki bunita oportunidat Apòstel Pedro tabatin, i kiko el a animá e kristiannan pa hasi? (1 Pedro 4:1)

³ Pedro i e otro apòstelnan tabatin e bunita oportunidat di pasa hopi tempu ku Hesus i mira kon el a pensa. Ora Pedro a skirbi su promé karta, el a animá e kristiannan pa fortifiká nan mes ku e mesun disposishon mental, esta, e mesun manera di pensa, ku esun di Kristu.a (Lesa 1 Pedro 4:1.) Na e idioma original Pedro a skirbi: “Arma boso mes.” E ekspreshon ei a deskribí sòldánan ku a arma nan mes pa bataya. Pues si kristiannan siña pa pensa manera Hesus a pensa, nan lo ta bon armá pa bringa kontra kualke deseo pa hasi loke ta robes i kontra e mundu di Satanas.—2 Kor. 10:​3-5; Efe. 6:12.

4. Kiko nos lo trata den e artíkulo akí?

⁴ Den e artíkulo akí nos lo haña sa kon nos por (1) siña pensa manera Yehova, loke lo yuda nos tur ku ta Testigu ta uní den nos manera di pensa, (2) siña pa ta humilde i (3) siña pa tin sano huisio dor di konfia den Yehova i hasi orashon. Pa logra eseinan, nos lo analisá Hesus su manera di pensa i wak kon nos por imit’é.

SIÑA PENSA MANERA YEHOVA

5. Kon un biaha Pedro no a pensa manera Yehova?

⁵ Tabatin un biaha ku Pedro no tabatin e mesun punto di bista ku Yehova tokante un asuntu. Hesus a bisa su apòstelnan ku e mester bai Herúsalèm, ku ei e lidernan religioso lo arest’é, ku lo e ser torturá i despues matá. (Mat. 16:21) Pedro kisas no por a aseptá ku Yehova lo a laga hende mata Hesus, kende tabata e speransa di Israel i e Mesías primintí. (Mat. 16:16) P’esei Pedro a hala Hesus un banda i bis’é: “Sea bondadoso ku bo mes, Señor; esei sigur lo no pasa ku bo.” (Mat. 16:22) Den e asuntu akí, Hesus i Pedro no tabata pensa meskos pasobra Pedro no tabata pensa manera Yehova.

6. Kiko Hesus a hasi ku a mustra ku e tabata pensa manera Yehova?

⁶ Hesus tabata sa kon su Tata ta pensa, i el a pensa presis manera dje. P’esei, el a bisa Pedro: “Kita for di mi dilanti, Satanas! Bo ta un piedra di trompeká pa mi, pasobra bo no tin e pensamentu di Dios, sino di hende.” (Mat. 16:23) Hesus tabata sa ku pa hasi Yehova su boluntat, e mester a sufri i muri. P’esei, e no a hasi kaso di Pedro su konseho, aunke ku Pedro su intenshon tabata di yud’é. Na e okashon ei, Pedro a siña ku e mester pensa manera Yehova ta pensa. Esei ta un lès importante pa nos tambe.

7. Kon Pedro a mustra ku e kier a pensa manera Yehova? (Wak e plachi.)

⁷ Mas despues, Pedro a mustra ku e kier a siña pensa manera Yehova. E tempu a yega ku Yehova tabata ke pa hende di e nashonnan bira parti di su pueblo. Yehova a asigná Pedro pa bai prediká na Kornelio, kende tabata entre e promé hendenan di e nashonnan ku a bira kristian. Pero hudiu no tabatin trato ku hende di nashon. Pues Pedro tabatin ku kambia su manera di pensa p’e kumpli ku su asignashon. Yehova a yuda Pedro komprondé Su boluntat. Pedro a kambia su punto di bista tokante hende di nashon. Anto ora Kornelio a manda busk’é, e “no tabatin nada kontra pa” bai. (Echo. 10:​28, 29) Pedro a prediká na Kornelio i tur hende di su kas i nan a batisá.—Echo. 10:​21-23, 34, 35, 44-48.

8. Kon nos por demostrá ku nos ta pensa manera Yehova? (1 Pedro 3:8)

⁸ Añanan despues, Pedro a animá su rumannan kristian pa “pensa di akuerdo ku otro,” esta, pa ta uní den nan manera di pensa. (Lesa 1 Pedro 3:8) Nos ta hasi esei ora nos imitá Yehova su manera di pensa ku nos ta haña den Beibel. Por ehèmpel, Hesus a bisa su disipelnan pa pone e Reino na promé lugá den nan bida. (Mat. 6:33) Ku esei na mente, un publikadó kisas ta plania pa kuminsá traha pionero òf sirbi den kualke forma di sirbishi di tempu kompleto. Na lugá di desanim’é i bis’é ‘bai trankil,’ òf ‘tin yen otro kos ku bo por hasi,’ nos mester anim’é i papia positivo tokante e meta ku el a pone i ofres’é yudansa.

SIÑA PA TA HUMILDE

9-10. Kon Hesus a mustra ku e tabata hopi humilde?

⁹ E anochi promé ku a kologá Hesus na staka, Hesus a siña Pedro i e otro apòstelnan un lès importante di humildat. Mas trempan e dia ei, Hesus a manda Pedro i Huan prepará e kosnan pa e último kuminda ku lo el a kome ku nan promé ku su morto. Un di e kosnan ku probablemente nan a hasi ta di hasi sigur ku tabatin un ponchera i sèrbètè pa asina laba pia di e invitadonan promé ku kome. Pero ken lo a hasi e trabou humilde ei di laba pia?

¹⁰ Sin pensa dos biaha, Hesus a lanta, kita su paña djariba, mara un sèrbètè na su sintura, pone awa den e ponchera i a kuminsá laba pia di su apòstelnan. (Huan 13:​4, 5) Nan lo a keda hopi sorprendí pasobra normalmente ta kria ta hasi e trabou ei. Bo por imaginá kuantu tempu a tuma Hesus pa laba pia di tur 12 apòstel? El a asta laba pia di Hudas, kende despues lo a traishon’é. Hesus a mustra ku e tabata hopi humilde. Despues, ku pasenshi el a splika nan: “Boso ta komprondé kiko mi a hasi ku boso? Boso ta yama mi: ‘Maestro,’ i ‘Señor,’ i boso tin rason, pasobra esei mi ta. Pues, si ami, aunke mi ta Señor i Maestro, a laba boso pia, boso tambe mester laba pia di otro.”—Huan 13:​12-14.

11. Kon Pedro a demostrá ku el a siña pa ta humilde? (1 Pedro 5:5) (Wak e plachi.)

¹¹ Pedro a siña hopi for di e humildat di Hesus. Despues ku Hesus a bai shelu, Pedro a hasi un milager kurando un hòmber ku a nase lam. (Echo. 1:​8, 9; 3:​2, 6-8) Manera tabata di spera, e milager ei a hala atenshon di hopi hende. (Echo. 3:11) Ki Pedro lo a hasi? Lo el a tuma e atenshon, onor i gloria? Den su kultura tabata masha importante pa un hende destaká i sobresalí. Ma Pedro tabata humilde i a duna tur onor i gloria na Yehova i Hesus, bisando: “Ta pa medio di e nòmber di Hesus i pa medio di nos fe den su nòmber, e pianan di e hòmber akí ku boso ta mira i ku boso konosé a haña forsa.” (Echo. 3:​12-16) Par di tempu despues, Pedro a skirbi e kristiannan na Korinto un karta tokante e importansia di siña pa ta humilde. E palabranan ku el a usa kisas ta kòrda nos di e okashon ora ku Hesus a mara e sèrbètè na su sintura i a laba pia di e apòstelnan.—Lesa 1 Pedro 5:5.

12. Meskos ku Pedro, kon nos por siña pa ta humilde?

¹² Meskos ku Pedro, nos por siña pa ta humilde. Pa nos logra esei, nos tin ku kòrda ku berdadero humildat ta enserá mas ku papia na un manera pa parse di ta humilde. E ekspreshon original ku Pedro a usa ku tradusí ta “humildat,” ta mustra ku berdadero humildat ta enserá e manera ku nos ta pensa di nos mes i di otro hende. Nos ta hasi kos pa otro hende pasobra nos ta stima Yehova i nos próhimo, no pasobra nos ke pa hende papia bon di nos òf gaba nos. Si di buena gana nos ta sirbi Yehova i nos rumannan den kualke manera ku nos por, sea ku otro hende ta mira òf no, e ora ei nos ta demostrá ku di bèrdat nos ta humilde.—Mat. 6:​1-4.

SIÑA PA TIN “SANO HUISIO”

13. Splika kiko ke men tin “sano huisio.”

¹³ Kiko ke men tin “sano huisio”? (1 Ped. 4:7) Un kristian ku tin sano huisio ta hasi esfuerso pa tuma desishon ku ta reflehá Yehova su manera di pensa. Tambe e sa ku no tin nada ku ta mas importante ku su amistat ku Yehova. E no ta pensa ku e ta masha kos ni ku e sa tur kos. Ademas e tin konfiansa den Yehova, p’esei lo e resa na dje konstantemente pa guia.b

14. Menshoná un situashon ku Pedro no a konfia den Yehova.

¹⁴ E lastu anochi promé ku Hesus su morto, el a spièrta su disipelnan: “Awe nochi boso tur lo trompeká pa motibu di loke lo pasa ku mi.” Yen di konfiansa Pedro a kontest’é: “Maske tur e otronan trompeká pa motibu di loke lo pasa ku bo, ami sí lo no trompeká nunka!” E anochi ei, Hesus a konsehá algun di su disipelnan pa “keda vigilá i hasi orashon kontinuamente.” (Mat. 26:​31, 33, 41) Pedro no a sigui e konseho ei. Si el a hasi esei, kisas lo e tabatin kurashi pa bisa ku e tabata un disipel di Hesus. En bes di esei, Pedro a bisa ku e no konosé Hesus i despues a lamentá esei masha hopi mes.—Mat. 26:​69-75.

15. Kiko a yuda Hesus tin sano huisio e anochi promé ku el a muri?

¹⁵ Hesus a konfia kompletamente den Yehova. Aunke Hesus tabata perfekto, el a hasi orashon vários biaha riba e anochi promé ku el a muri. Esei a dun’é kurashi pa hasi loke Yehova tabata ke p’e hasi. (Mat. 26:​39, 42, 44; Huan 18:​4, 5) Pedro a mira Hesus hasi orashon asina tantu biaha riba e anochi ei, ku nunka mas lo e lubidá esei.

16. Kon Pedro a demostrá ku el a siña tin sano huisio? (1 Pedro 4:7)

¹⁶ Ku tempu, Pedro a siña pa konfia mas den Yehova pa medio di orashon. Despues ku Hesus a resusitá, el a sigurá Pedro i e otro apòstelnan ku nan lo haña spiritu santu pa nan por prediká. Pero, Hesus a pidi nan pa warda na Herúsalèm te ora esei sosodé. (Luk. 24:49; Echo. 1:​4, 5) Kiko Pedro a hasi miéntras e tabata warda? Pedro i e otro rumannan a “sigui hasi hopi orashon.” (Echo. 1:​13, 14) Mas despues, den su promé karta, el a animá su rumannan kristian pa tin sano huisio i semper resa pa guia di Yehova. (Lesa 1 Pedro 4:7.) Pedro a siña konfia den Yehova i a bira un pilá den e kongregashon.—Gal. 2:9.

17. Kiko nos mester sigui hasi? (Wak e plachi.)

¹⁷ Pa nos por tin sano huisio, nos mester sigui hasi orashon na Yehova, asta pa kosnan ku pa nos ta fásil pa hasi. Anto nos tin ku resa foral ora ku nos tin ku tuma desishon importante. Nos ta pidi Yehova pa su guia, konfiando ku e sa loke ta mihó pa nos.

18. Meskos ku Pedro, kiko nos por hasi?

¹⁸ Nos ta masha gradisidu ku Yehova a krea nos ku e kapasidat pa reflehá su kualidatnan. (Gén. 1:26) Nos sa ku nos no por imit’é perfektamente. (Isa. 55:9) Pero meskos ku Pedro, nos por siña pensa manera Yehova, siña pa ta humilde i siña pa tin sano huisio.