Sigui Kana pa Medio di Fe

1. Dikon Apòstel Pablo tabata satisfecho ku e manera ku el a hiba su bida?

DADO momento, Apòstel Pablo tabata sa ku lo el a muri. Apesar di esei, e tabata masha satisfecho ku e manera ku el a hiba su bida. Pensando bèk e por a bisa: “Mi a terminá e kareda i mi a keda firme den e fe.” (2 Tim. 4:​6-8) Pablo a tuma e desishon sabí di sirbi Yehova i p’esei e tabata sa ku e tabatin Yehova su aprobashon. Nos tambe ke tuma bon desishon i haña Yehova su aprobashon. Ban wak kon nos por hasi esei.

2. Kiko ke men kana pa medio di fe?

² Refiriendo na su mes i e otro fiel kristiannan, Pablo a bisa: “Nos ta kana pa medio di fe, no pa medio di bista.” (2 Kor. 5:7) Kiko e tabata ke men? Den Beibel, “kana” tin biaha por referí na e manera ku un hende ta skohe pa hiba su bida. Un hende ku ta tuma desishon solamente basá riba loke e ta mira, tende i sinti, ta kana “pa medio di bista” i no tin fe den Yehova. Pero, un hende ku ta tene kuenta ku loke Yehova ke, ta kana “pa medio di fe.” Su akshonnan ta demostrá ku e ta konvensí ku si e sigui Yehova su guia den Beibel, lo e tin un mihó bida awor i asta mas bendishon den futuro.—Sal. 119:66; Heb. 11:6.

3. Dikon ta bon pa nos kana pa medio di fe? (2 Korintionan 4:18)

³ Klaru ku nos ta usa nos sentidonan pa tuma desishon. Pero si ta nan so nos ta usa pa tuma desishon, nos por haña nos ku problema. Dikon? Pasobra nos no por konfia nos sentidonan tur ora. Si nos ta tuma desishon basá solamente riba loke nos ta mira, tende i sinti, tardi òf trempan nos ta bai hasi algu ku Yehova no gusta. (Ekl. 11:9; Mat. 24:​37-39) Pero, ora nos kana pa medio di fe, nos lo tuma desishon ku “ta agradá Señor.” (Efe. 5:10) Ora nos sigui Yehova su guia, esei lo duna nos pas i berdadero felisidat. (Sal. 16:​8, 9; Isa. 48:​17, 18) Anto si nos sigui kana pa medio di fe nos lo haña bida eterno.—Lesa 2 Korintionan 4:18.

4. Kon nos por sa si nos ta kana pa medio di fe òf pa medio di bista?

⁴ Pa nos por haña sa si nos ta kana pa medio di fe òf bista, nos tin ku puntra nos mes: ‘Ora mi ta tuma desishon mi ta tene kuenta solamente ku loke mi ta mira? Òf, mi ta laga Yehova su konsehonan guia mi?’ Kontesta pa e preguntanan ei lo yuda nos sa si nos ta kana pa medio di fe òf pa medio di bista. Laga nos wak kon nos por sigui kana pa medio di fe (1) ora ta trata di trabou, (2) ora di skohe un kasá i (3) ora haña guia di Yehova su organisashon. Pa kada un di nan nos ta bai trata kiko nos mester tene kuenta kuné pa nos tuma un bon desishon.

ORA TA TRATA DI TRABOU

5. Ta ku sèn so nos mester tene kuenta kuné ora di skohe un trabou? Splika.

⁵ Nos tur ke pèrkurá pa nos mes i pa nos famia. (Ekl. 7:12; 1 Tim. 5:8) Tin trabou ta paga bon. Un trabou asina por yuda nos kubri nos gastunan di tur dia i asta spar. Pero otro trabounan kisas ta paga ménos i e sèn ta yega nèt nèt pa kubri e gastunan esensial. Pues, ta normal ku ora nos ta bai skohe un trabou, nos ke sa kuantu sèn nos lo gana. Sinembargo, si ta esei so nos ta tene kuenta kuné, nos lo ta kanando pa medio di bista.

6. Kon nos por kana pa medio di fe ora di skohe un trabou? (Hebreonan 13:5)

⁶ Si nos ta kana pa medio di fe, nos lo pensa bon kon e trabou lo por afektá nos amistat ku Yehova. Lo ta bon pa puntra nos mes: ‘E trabou akí lo pone mi hasi kos ku Yehova ta odia?’ (Pro. 6:​16-19) ‘E trabou lo kita e tempu ku mi tin ku dediká na mi aktividatnan spiritual i kisas asta separá mi for di mi famia pa periodonan largu?’ (Flp. 1:10) Si ta asina, lo ta sabí pa no tuma e trabou asta si ta difísil pa haña trabou. Ora nos ta kana pa medio di fe nos ta tuma desishon ku ta mustra ku nos ta konvensí ku Yehova lo pèrkurá pa nos nesesidatnan.—Mat. 6:33; lesa Hebreonan 13:5.

7-8. Kon Javier a kana pa medio di fe? (Wak e plachi.)

⁷ Ban wak kon Javier,a un ruman di Suramérika, a mira e importansia di kana pa medio di fe. El a konta: “M’a solisitá pa un puesto na mi trabou ku lo a paga dòbel di loke mi tabata gana.” Aunke, Javier a haña e puesto ei interesante, e tabatin hopi gana tambe di traha pionero. El a sigui konta: “M’a bai e entrevista. Pero promé, m’a pidi Yehova yuda mi pasobra mi tabata konvensí ku e tabata sa loke ta mihó pa mi. Aunke mi kier a krese i bai dilanti den mi karera, mi no tabata ke mi trabou stroba mi di hasi mas pa Yehova.”

⁸ Javier a konta: “Durante e entrevista, e manager a bisa mi ku overtaim ta parti di e trabou. Ku tur rèspèt m’a splik’é ku esei lo bai stroba mi aktividatnan spiritual.” Pues, Javier no a tuma e trabou. Dos siman despues, el a kuminsá traha pionero. I den e mesun aña ei, el a haña un trabou partaim. El a bisa: “Yehova a skucha mi orashon i el a yuda mi haña un trabou ku ta permití mi traha pionero. Awor mi tin un trabou ku ta laga mi sirbi Yehova i yuda mi rumannan. Anto mi ta masha kontentu ku esei.”

9. Kiko bo ta siña di Trésor?

⁹ Kiko awor si bo ripará ku e trabou ku bo tin no ta permití bo kana pa medio di fe? Ban wak loke a pasa ku Ruman Trésor di Congo. El a konta: “E trabou ku m’a haña tabata e trabou di mi soño. Riba dje, mi tabata gana tres biaha mas tantu ku promé i hende tabata mira mi komo un hende importante.” Pero, Trésor tabata traha hopi overtaim i tabata pèrdè hopi reunion. Ademas, su koleganan tabata pone hopi preshon riba dje pa gaña i tapa kosnan desonesto ku tabata pasa. P’esei Trésor kier a kita fo’i trabou. Pero e tabatin miedu di keda sin trabou. Kiko a yud’é? El a bisa: “Habakuk 3:​17-19 a yuda mi komprondé ku asta si mi pèrdè mi entrada, di un manera òf otro, Yehova lo kuida mi. Pues m’a kita fo’i trabou.” El a sigui bisa: “Hopi doño di trabou ta kere ku si nan duna bo mas sèn lo bo lubidá e kosnan ku ta importante, inkluso bo famia i Yehova. Mi ta asina kontentu ku m’a protehá mi amistat ku Yehova. Un aña despues, Yehova a yuda mi haña un bon trabou ku ta paga mi sufisiente pa kubri mi gastunan. Ademas, mi tin mas tempu pa mi kosnan spiritual. Ora nos skohe pa pone Yehova na promé lugá, kisas pa un tempu kosnan lo ta pèrtá. Pero Yehova sigur lo kuida nos.” Pues, si nos konfia Yehova su konsehonan i su promesanan, nos lo sigui kana pa medio di fe i lo e bendishoná nos.

ORA DI SKOHE UN KASÁ

10. Kiko ta importante pa wak ora di skohe un kasá, pero kiko nos lo no ke hasi?

¹⁰ Ta algu masha normal ku hende tin gana di kasa, pasobra matrimonio ta un regalo di Yehova. Ora di skohe un hende pa kasa kuné, un ruman muhéb kisas ta analisá un ruman hòmber su karakter, su aparensia, su reputashon, kon e ta manehá plaka i si e ta wak pa un hende den su famia. Ademas e ruman muhé lo analisá si e ruman hòmber lo hasié felis. Tur e kosnan ei ta importante! Pero, si ta eseinan ta e úniko kosnan ku e ruman muhé ta tene kuenta kuné, e ta kanando pa medio di bista.

11. Kon nos por kana pa medio di fe ora di skohe un kasá? (1 Korintionan 7:39)

¹¹ Yehova ta keda masha kontentu di mira su sirbidónan sigui su konseho ora di buska un kasá! Por ehèmpel, un di e konsehonan ei ta pa warda te ora ku nos pasa “e flor di hubentut” promé ku kuminsá buska un kasá. (1 Kor. 7:36) Tambe, un ruman lo hasi sigur ku e ruman ku e ta interesá den dje tin e kualidatnan ku Yehova ta bisa ta nesesario pa ta un bon kasá. (Pro. 31:​10-13, 26-28; Efe. 5:33; 1 Tim. 5:8) Anto si un hende ku no ta un sirbidó di Yehova batisá mustra interes romántiko den un ruman, lo e no kuminsá nada ku e hende ei. Mas bien, e ruman lo sigui Yehova su konseho di kasa solamente “den Señor,” manera 1 Korintionan 7:39 ta bisa. (Lesa.) Siguiendo e konsehonan ei, e ruman lo kana pa medio di fe pasobra e ta konfia ku Yehova lo kuid’é den sentido emoshonal mas mihó ku kualke otro persona.—Sal. 55:22.

12. Kiko nos ta siña di Rosa?

¹² Ban wak loke Rosa, un pionero di Colombia, a pasa aden. Debí na su trabou, e tabatin kontakto regular ku un hende hòmber ku a kuminsá mustra interesá den dje. E no tabata un Testigu, pero Rosa a kuminsá hañ’é leuk. Rosa a bisa: “El a parse mi un bon hende. E tabata yuda den su komunidat, no tabatin bisio, tabata trata mi masha lif, anto mi tabata gusta esei. E tabatin tur loke mi tabata ke den un kasá, pero e no tabata un ruman.” Rosa a sigui bisa: “Mi tabatin hopi gana di kasa, pero mi no por a haña niun hende den bèrdat. Pues, tabata hopi difísil pa mi bis’é ku mi no ke tin nada kuné.” Rosa no a focus riba djis e kosnan ku e por a mira. Mas bien, el a pensa kon su desishon por a afektá su amistat ku Yehova. El a kibra tur kontakto ku e hòmber i a keda okupá ku kosnan spiritual. Poko tempu despues, el a haña invitashon pa bai Skol pa Predikadó di Reino, i awor e ta un pionero spesial. Rosa a bisa: “Yehova a bendishoná mi i a hasi mi masha felis.” Tin biaha no ta fásil pa nos hasi loke Yehova ke, pasobra nos kurason ke hasi algu otro. Pero ora nos kana pa medio di fe, semper lo bai nos bon.

ORA HAÑA GUIA DI YEHOVA SU ORGANISASHON

13. Kon nos por reakshoná ora nos haña instrukshon di Yehova su organisashon?

¹³ Hopi biaha, ansianonan, superintendentenan di sirkuito, sukursal i Kuerpo Gobernante ta duna nos instrukshon ku ta yuda nos adorá Yehova. Pero no ta tur biaha nos ta komprondé dikon a bin ku un sierto instrukshon. Kisas e úniko kos ku nos por pensa ta ku e instrukshon no ta bai funshoná. I asta nos por kuminsá focus riba e fayonan di e rumannan ku a duna e instrukshon.

14. Kiko por yuda nos kana pa medio di fe ora nos haña guia for di Yehova su organisashon? (Hebreonan 13:17)

¹⁴ Ora nos ta kana pa medio di fe nos ta konfia ku Yehova ta esun ku ta na kabes di su organisashon i sa loke ta mihó pa nos. Anto debí na esei nos ta obedesé mesora i di buena gana. (Lesa Hebreonan 13:17.) Nos ta konsiente ku nos obedensia ta yuda e kongregashon keda uní. (Efe. 4:​2, 3) Nos sa ku e rumannan ku ta duna nos guia ta imperfekto, pero nos ta konvensí ku Yehova lo bendishoná nos obedensia. (1 Sám. 15:22) Anto si Yehova mira ku mester ègt korigí algu, nos sa ku lo e hasi esei na su debido tempu.—Mik. 7:7.

15-16. Kiko a yuda Kevin kana pa medio di fe aunke e tabatin duda den un instrukshon? (Wak e plachi.)

¹⁵ Ban wak un eksperensia ku ta mustra dikon ta bon pa kana pa medio di fe. Aunke hopi hende na Perú por papia spañó, mayoria di nan ta papia idioma indígena. Un di e idiomanan ei ta quechua. Pa hopi aña, e rumannan di abla quechua tabata buska hende di abla quechua den teritorio. Pero, pa obedesé leinan nobo di gobièrnu, nan a haña instrukshon pa ahustá e manera di buska hende. (Rom. 13:1) Algun ruman tabata preokupá ku e kambio lo a bai stroba nan di haña hende quechua. Pero debí ku e rumannan a obedesé e instrukshonnan, Yehova a bendishoná nan i nan a haña hopi mas hende di abla quechua.

¹⁶ Kevin, un ansiano den un kongregashon quechua, tabata un di esnan ku tabata preokupá ku e kambio. El a splika: “M’a puntra mi mes: ‘Kon nos ta bai haña e hendenan ku ta papia quechua awor?’” Kiko Kevin a hasi? El a bisa: “M’a kòrda riba Proverbionan 3:​5, anto m’a pensa riba Moises. E mester a saka e israelitanan for di Egipto anto hiba nan un lugá ku a parse di no tin salida. Esei a pone ku e egipsionan lo por a kaba ku nan fásilmente. Pero tòg el a obedesé, i Yehova a bendishon’é na un manera masha maravioso.” (Éks. 14:​1, 2, 9-11, 21, 22) Kevin tabata dispuesto pa ahustá su manera di prediká. Ku ki resultado? El a bisa: “Kasi mi no por splika kon bon Yehova a bendishoná nos. Promé, nos tabata kana masha hopi mes pa buska hende quechua, anto tin biaha ta djis un òf dos so nos ta haña. Awor nos ta traha e teritorionan kaminda nos sa ku tin hopi hende quechua. Komo resultado, nos tin mas kòmbersashon, rebishita i estudio di Beibel. Ademas, tin mas hende ta bini nos reunionnan.” Sí, ora nos kana pa medio di fe, Yehova semper ta bendishoná nos.

17. Kiko abo a siña den a artíkulo akí?

¹⁷ Nos a analisá tres área importante kaminda nos tin ku sigui kana pa medio di fe. Pero ta den tur área di nos bida nos tin ku sigui kana pa medio di fe. Por ehèmpel, ora di skohe entretenimentu, rekreo, kuantu aña nos ta dediká na enseñansa i kon pa lanta yu. Pa kualke desishon ku nos mester tuma, nos no mester hasi kaso solamente di loke nos ta mira, sino tambe di nos amistat ku Yehova, su konsehonan i su promesa di semper kuida nos. Si nos hasi esei, nos lo “kana den nòmber di Yehova, nos Dios, pa tur eternidat.”—Mik. 4:5.