Skohe Ken Lo Bo Sirbi

1. Kiko nos mester hasi pa nos ta berdaderamente felis, i dikon? (Isaías 48:​17, 18)

YEHOVA, nos Tata den shelu, stima nos masha hopi mes, i e ke pa nos disfrutá di bida aworakí i den futuro. (Ekl. 3:​12, 13) El a traha nos asina magnífiko ku nos por hasi hopi kos, pero e no a traha nos pa dirigí nos mes ni pa disidí loke ta bon i malu. (Ekl. 8:9; Yer. 10:23) E sa ku pa nos ta berdaderamente felis, nos mester sirbié i obedes’é.—Lesa Isaías 48:​17, 18.

2. Kiko Satanas ke pa hende kere, i kiko Yehova a hasi?

² Satanas ke pa hende kere ku nan por ta felis maske nan no ta sirbi Yehova. Ku otro palabra, ku hende no mester di Dios, nan mes por dirigí nan mes sin niun problema. (Gén. 3:​4, 5) Pa proba ku loke Satanas a insinuá ei ta un mentira, Yehova a permití hende dirigí nan mes pa un tempu. Anto situashon di mundu ta proba ku hende no tabatin éksito den esei. Pero den Beibel nos ta lesa di hopi hende ku a sirbi Yehova i nan tabata felis. Esun di mas felis den nan tabata Hesus. Promé, nos lo wak dikon Hesus a skohe pa sirbi Yehova. Despues nos lo wak dikon ta Yehova so nos mester adorá i finalmente nos lo repasá algun motibu dikon nos a skohe pa sirbié.

DIKON HESUS A SKOHE PA SIRBI YEHOVA?

3. Kiko Satanas a ofresé Hesus, i kiko Hesus a skohe pa hasi?

³ Ora Hesus tabata riba tera, semper el a demostrá ken el a skohe pa sirbi. Por ehèmpel, poko tempu despues ku el a batisá, Satanas a ofres’é tur e reinonan di mundu si e djis ador’é un biaha so. Hesus a kontest’é: “Bai for di aki, Satanas! Pasobra ta pará skirbí: ‘Ta Yehova bo Dios bo tin ku adorá, i ta na e so bo tin ku rindi sirbishi sagrado.’” (Mat. 4:​8-10; nota) Dikon Hesus a skohe pa sirbi Yehova? Ban wak algun motibu.

4-5. Dikon Hesus a skohe pa sirbi Yehova?

⁴ E motibu prinsipal dikon Hesus a skohe pa sirbi Yehova ta pasobra e tin un amor i kariño profundo pa su Tata. (Huan 14:31) Ademas, Hesus ta sirbi Yehova pasobra e sa ku esei ta e kos korekto pa hasi. (Huan 8:​28, 29; Rev. 4:11) E sa ku Yehova ta e Kreador, ku nos por konfi’é i ku e ta generoso. (Sal. 33:4; 36:9; Sant. 1:17) Semper Yehova a bis’é e bèrdat i a dun’é tur loke e tin. (Huan 1:14) Pero kontrali na Yehova, Satanas ta kita bida. E ta golos, egoista i gañadó. (Huan 8:44) Hesus tabata sa tur eseinan, p’esei e no ke tabata manera Satanas i rebeldiá kontra Yehova.—Flp. 2:​5-8.

⁵ Un otro motibu mas dikon Hesus a skohe pa sirbi Yehova ta pasobra e tabata sa ku si e sirbi Yehova lealmente esei lo a hiba na hopi kos bon. (Heb. 12:2) Ki e kosnan ei tabata? Lo el a santifiká nòmber di su Tata i habri kaminda pa hende por biba pa semper sin piká i morto.

DIKON TA YEHOVA SO NOS MESTER ADORÁ?

6-7. Dikon hopi hende awe no ta sirbi Yehova, pero dikon ta Yehova so nos mester adorá?

⁶ Un motibu dikon hopi hende awe no ta sirbi Yehova ta pasobra ainda nan no sa di su bunita kualidatnan ni tur e bon kosnan ku el a hasi pa nan. Esei tabata e kaso di algun hende ku Apòstel Pablo a prediká na dje na Aténas.—Echo. 17:​19, 20, 30, 34.

⁷ Pablo a splika e hendenan ei ku e Dios berdadero a “duna tur hende bida, rosea i tur kos.” El a agregá: “Pa medio di dje nos tin bida, i nos ta move i eksistí.” Dios ta e Kreador, kende “for di un solo hende, . . . a traha tur nashon.” Pues Yehova ta e úniko persona ku tin tur derechi di haña adorashon.—Echo. 17:​25, 26, 28.

8. Kiko Yehova hamas i nunka lo hasi? Splika.

⁸ Komo e Kreador i Soberano di universo, Yehova por a fòrsa hende pa sirbié. Pero, hamas i nunka lo e hasi algu asina. Mas bien el a hasi sigur di pèrkurá prueba ku hende tin mester pa nan tuma nan mes desishon di sea kere ku e ta eksistí òf nò i sirbié. E stima hende hopi i ke pa nan tur bira su amigu pa semper. (1 Tim. 2:​3, 4) P’esei, el a entrená nos pa siña otro hende tokante e bon kosnan ku lo e hasi pa humanidat i kon lo e hasi esei. (Mat. 10:​11-13; 28:​19, 20) Anto pa nos ku a skohe pa bira Yehova su amigu, el a duna nos un kongregashon unda nos por ador’é i a pèrkurá pa nos tin ansianonan ku ta kuida nos ku amor.—Echo. 20:28.

9. Kon Yehova ta demostrá ku e stima tur hende?

⁹ Yehova ta demostrá su amor tambe na e manera ku e ta trata hende ku no ta kere ku e ta eksistí. Kon nos ta mira esei? Wèl, pa míles di aña hopi hende a hasi loke nan tabatin gana di hasi sin wòri nan kabes ki Yehova ta pensa. Asina mes, Yehova tabata bondadoso ku nan i a duna nan tur loke nan tin mester pa biba. (Mat. 5:​44, 45; Echo. 14:​16, 17) El a permití nan tin amigu, famia, yu i disfrutá dje rekompensa di nan trabou duru. (Sal. 127:3; Ekl. 2:24) Pues ta mas ku bisto ku Yehova stima tur hende. (Éks. 34:6) Pero awor, laga nos repasá algun motibu dikon nos a skohe pa sirbi Yehova, i kon e ta bendishoná nos ku sí ta sirbié.

DIKON NOS A SKOHE PA SIRBI YEHOVA?

10. (a) Ki ta e motibu prinsipal dikon nos ta sirbi Yehova? (Mateo 22:37) (b) Kon Yehova a tene kompashon ku abo? (Salmo 103:​13, 14)

¹⁰ Meskos ku Hesus, e motibu prinsipal dikon nos ta sirbi Yehova ta pasobra nos tin un amor i kariño profundo p’e. (Lesa Mateo 22:37.) Ora bo siña di Yehova su kualidatnan, bo ta sinti bo atraí na dje. Por ehèmpel, laga nos wak kuantu kompashon Yehova ta tene ku su sirbidónan. Aunke e israelitanan a desobedes’é bes tras bes, el a roga nan: “Por fabor, bandoná boso mal kaminda.” (Yer. 18:11) Anto apesar ku nos ta faya hopi biaha, Yehova ta pordoná nos pasobra e ta kòrda ku nos ta stòf. (Lesa Salmo 103:​13, 14.) Ora bo para pensa riba tur e biahanan ku Yehova a tene kompashon ku bo, esei sigur ta duna bo gana di sirbié pa semper.

11. Ki otro motibunan nos tin dikon nos ta sirbi Yehova?

¹¹ Un motibu mas dikon nos ta sirbi Yehova ta pasobra nos sa ku esei ta e kos korekto pa hasi. (Mat. 4:10) Ademas, nos sa ku si nos sirbi Yehova lealmente, esei lo hiba na hopi kos bon. Kiko e kosnan ei ta? Nos lo santifiká Yehova su nòmber, proba ku Diabel ta un gañadó i hasi kurason di nos Tata kontentu. Anto si nos skohe pa sirbi Yehova awor, nos lo tin e speransa di sirbié pa semper!—Huan 17:3.

12-13. Kiko nos ta siña for di Jane i Pam?

¹² Si bo ta un mucha, for di awor bo por siña stima Yehova i forma un amistat kuné. Anto e amor ei semper lo sigui krese. Esei ta loke a pasa ku dos ruman di otro, Jane i Pam.a Ora Jane tabatin 11 aña i Pam 10, nan a kuminsá studia Beibel aunke nan mayornan no tabata interesá den un estudio. Nan mayornan a permití nan studia basta nan bai misa wikènt ku e famia. Jane a bisa: “Na skol e muchanan tabata usa droga i tabata inmoral. Pero mi estudio di Beibel a yuda mi keda leu fo’i e kosnan ei.”

¹³ Despues di un par di aña, Jane i Pam a bira publikadó. Ku tempu, nan a bira pionero. Ora nan mayornan a bira grandi, nan tabata kuida nan i traha pionero. Pensando bèk riba nan bida, Jane a bisa: “Ku mi mes wowo m’a mira ku Yehova no ta keda sin kuida su amigunan i ku, manera 2 Timoteo 2:19 ta bisa, e ‘konosé esnan ku ta pertenesé na dje.’” Ta bisto ku Yehova semper ta kuida esnan ku ta skohe pa sirbié di kurason!

14. Kon nos por defendé Yehova? (Wak e plachi.)

¹⁴ Nos ke pa hende sa ku e kosnan malu ku nan a tende tokante Yehova no ta bèrdat. Por ehèmpel, pensa riba un bon amigu ku bo tin. E ta amabel, generoso i gusta pordoná. Pero un dia, bo ta tende un hende bisa ku bo amigu ta kruel i desonesto. Ki lo bo hasi? Sin pensa dos biaha lo bo defend’é. Asina tambe, ora nos tende hende gaña tokante Yehova, nos lo defend’é i laga sa e bèrdat. (Sal. 34:1; Isa. 43:10) Ku nos abla i akshon nos ta defendé Yehova i mustra ku nos ke sirbié di kurason.

15. Kiko ta algun bon kos ku a pasa Pablo despues ku el a hasi kambio den su bida? (Filipensenan 3:​7, 8)

¹⁵ Nos ta dispuesto pa hasi kualke kambio den nos bida pa asina nos agradá Yehova òf hasi mas p’e. Por ehèmpel, Apòstel Pablo tabatin un puesto haltu den e religion hudiu. Pero el a bandoná tur esei pa asina e por a bira un disipel di Kristu i sirbi Yehova. (Gal. 1:14) Debí na esei, e tabatin bunita eksperensianan sirbiendo Yehova. Ademas, lo e goberná ku Kristu den shelu. Pablo no a lamentá su desishon di sirbi Yehova niun tiki i nos tampoko lo no lamentá nos desishon.—Lesa Filipensenan 3:​7, 8.

16. Kiko nos ta siña for di Julia su eksperensia? (Wak e plachi.)

¹⁶ Si Yehova ta na promé lugá den nos bida, nos bida lo ta yen di bendishon awor i den futuro. E eksperensia di nos ruman Julia ta mustra esei. Fo’i chikitu e tabata kanta den kor di misa. Un kantante di ópera a mira su talento i a kuminsá entren’é. Den korto tempu Julia a bira famoso i a asta kanta na lugánan prestigioso. E tabata bai un akademia di músika renombrá, i einan un kompañero di klas a kuminsá papia kuné tokante Dios i splik’é ku nòmber di Dios ta Yehova. No a dura mashá ku Julia a kuminsá studia Beibel dos biaha pa siman. Eventualmente, el a disidí di usa su tempu i energia pa sirbi Yehova en bes di bira un kantante di ópera. Esei no tabata un desishon fásil. Julia a bisa: “Hopi hende a bisa mi ku mi ta bentando mi don afó, pero mi kier a usa henter mi bida pa sirbi Yehova.” Julia a tuma e desishon ei mas ku 30 aña pasá. Ki e ta pensa di e desishon ei ku el a tuma? El a bisa: “Mi ta felis ku m’a skohe pa sirbi Yehova i mi sa ku den futuro lo e satisfasé tur deseo di mi kurason.”—Sal. 145:16.

SIGUI SIRBI YEHOVA

17. (a) Kiko hende ku no ta sirbi Yehova ainda tin ku hasi, i dikon? (b) Kiko nos ku ya kaba a skohe pa sirbi Yehova sa?

¹⁷ E fin ta hopi serka. Apòstel Pablo a skirbi: “Pasobra ‘un poko tempu’ mas, i ‘esun ku ta bini lo yega i lo e no tarda.’” (Heb. 10:37) Ki nos tin ku komprondé? Ku e tempu ku a sobra pa hende skohe pa sirbi Yehova ta birando mas i mas kòrtiku. Pues nan tin ku tuma un desishon mas lihé posibel. (1 Kor. 7:29) Anto nos ku ya kaba a skohe pa sirbi Yehova, sa ku aunke nos lo pasa den prueba, esei lo ta djis pa “un poko tempu.”

18. Kiko Hesus i Yehova ke pa nos hasi?

¹⁸ Hesus a animá su disipelnan pa no djis kuminsá siguié, pero pa siguié kontinuamente. (Mat. 16:24) Pues si nos tin años ta sirbi Yehova, nos mester ta determiná pa sigui sirbié. Sirbi Yehova ta rekerí hopi esfuerso. E no ta fásil, pero nos por ta felis i disfrutá di hopi bendishon, asta for di awor.—Sal. 35:27.

19. Kiko nos ta siña di Gene?

¹⁹ Algun hende por pensa ku si nan sirbi Yehova, nan no por gosa di bida. Abo komo hóben ta sinti ku ta duru pa sirbi Yehova? Un ruman hóben ku yama Gene a bisa: “M’a sinti ku komo Testigu, mi no tabatin mag di hasi nada. Tur e otro muchanan di mi edat sí por a gosa di bida. Nan sí por a bai fiesta, haña frei i hunga wega violento. Pero ami, mi bida tabata drei rònt di Salòn i sirbishi so.” Kiko Gene a hasi? El a bisa: “M’a kuminsá hiba un bida dòbel. . . . I pa un tempu tabata dushi. Pero pa bisa bèrdat, mi no tabata felis. M’a kuminsá pensa riba tur e kosnan ku m’a siña di Beibel i ku m’a ignorá. Pues m’a disidí di sirbi Yehova ku henter mi kurason. Mi ta sinti ku for di e dia ei, Yehova a kontestá tur mi orashonnan.”

20. Kiko mester ta nos determinashon?

²⁰ Un salmista a kanta pa Yehova: “Felis ta e persona ku bo ta skohe i hala serka bo pa biba riba e plenchinan di bo tèmpel.” (Sal. 65:4) Meskos ku Hosue laga nos tambe bisa ku tur siguransa: “Pa loke ta ami i e hendenan di mi kas, nos lo sirbi Yehova.”—Hos. 24:15.