Ta Bon pa Nos “Hala Mas Serka Dios”!

1-2. (a) Pa nos por tin un amistat será ku un persona, esei ta eksigí kiko? (b) E artíkulo akí lo yuda nos ku kiko?

PENSA riba un bon amigu ku bo tin. Bo ta kòrda kon bo amistat kuné a kuminsá, i kiko a pone ku boso a bira bon amigu? Sin duda, bo a pasa tempu kuné, siña konos’é bon i haña sa ki e gusta i no gusta. Ademas, bo a mira ku e tin bunita kualidatnan ku bo tambe ke demostrá.

² Ta bisto anto ku pa por tin un amistat será, esei ta eksigí tempu i esfuerso. Mesun kos ta konta si nos ke tin un amistat será ku Yehova. E artíkulo akí lo yuda nos mira kon nos por hala mas serka di nos Dios. Pero promé, laga nos wak dikon ta bon pa nos hasi esei.

3. Pakiko nos mester pensa riba dikon ta bon pa nos hala mas serka Yehova? Duna un ehèmpel.

³ Pero djis sa so ku ta bon pa hala mas serka Yehova no ta sufisiente. (Sal. 63:​6-8) Dikon? Wak e siguiente ehèmpel. Tur hende sa ku ta importante pa kome salú, hasi ehersisio, drumi sufisiente i bebe sufisiente awa. Tòg hopi hende no ta preokupá nan kabes i nan salú ta bai atras. Pero ta te ora un hende pensa riba dikon ta bon pa e hasi e kosnan ei, ta e ora ei numa lo e yega na e punto di tuma akshon i hasi nan. Asina tambe, ta te ora nos pensa riba dikon ta bon pa nos hala mas serka Yehova, ta e ora ei numa nos lo yega na e punto di tuma akshon i hala serka dje.—Sal. 119:​27-30.

4. Segun Salmo 73:​28, kiko e salmista a realisá ku ta nesesario p’e hasi?

⁴ Lesa Salmo 73:28. E eskritor di Salmo 73 tabata un levita ku a sirbi komo músiko na Yehova su tèmpel. Aunke kisas e tabatin hopi tempu ta sirbi Yehova kaba, tòg el a realisá ku tabata nesesario p’e sigui kòrda su mes i otro hende dikon ta bon pa “hala mas serka Dios.” Ban wak dikon ta bon pa hasi esei.

LO BO TA FELIS

5. (a) Dikon nos lo ta felis ora nos hala mas serka Yehova? (b) Kon Yehova su sabiduria ta yuda nos i protehá nos? (Proverbionan 2:​6-16)

⁵ Mas nos hala serka Yehova, mas felis nos lo ta. (Sal. 65:4) Un dje motibunan ku nos lo ta felis ta pasobra nos ta hasi loke Yehova bisa nos. E sabiduria ku nos ta haña den Beibel ta yuda nos evitá di tuma mal desishon. (Lesa Proverbionan 2:​6-16.) Ta p’esei Beibel ta bisa: “Hende ku ta buska pa sa kon nan por atkerí sabiduria i perspikasia ta felis.”—Pro. 3:13.

6. Kiko a pone e salmista pèrdè su goso?

⁶ Pero asta Yehova su amigunan ratu-ratu por sinti nan tristu. Esei a pasa ku e eskritor di Salmo 73. El a rabia i kunsumí ora el a mira i pensa riba kosnan ku a parse inhustu. El a haña ku hende ku no tabatin kunes ku Dios ni ku Su normanan tabatin dushi bida. El a asta deseá loke nan tabatin. Segun e, hende violento i arogante semper tabata haña tur kos ku nan ke. Nan tabata riku, tabatin bon salú i no tabata sufri. (Sal. 73:​3-7, 12) Dado momento, e kos a molesti’é asina tantu ku el a kuminsá puntra su mes: ‘Ki bal sirbi Dios?’ Den su tristesa, el a sklama: “Ta pòrnada mi a tene mi kurason puru i laba mi man pa mustra ku mi ta inosente!”—Sal. 73:13.

7. Kiko nos tin ku hasi ora nos ta tristu? (Wak e plachi.)

⁷ Aunke e salmista tabata tristu, el a hasi algu pa bringa e sintimentu ei. El “a drenta Dios su tèmpel santu,” anto ei Yehova a korigí su pensamentu. (Sal. 73:​17-19) Nos bon Amigu Yehova sa ki ora nos ta tristu. Pues, nos tin ku papia kuné i pidié yuda nos pa sa kiko ta loke nos tin ku hasi. Su konseho for di Beibel i e animashon ku nos ta haña for di e kongregashon lo duna nos e forsa pa sigui sirbié aunke nos ta tristu. Asta ora nos preokupashonnan bira muchu pa nos, Yehova lo konsolá i trankilisá nos.—Sal. 94:19.a

LO BO TIN META I SPERANSA DEN BIDA

8. Ki otro dos motibu nos tin pa hala mas serka Dios?

⁸ Tin dos otro motibu importante dikon ta bon pa nos hala mas serka Dios. Promé, nos bida lo tin meta. Di dos, nos lo tin un bunita speransa pa futuro. (Yer. 29:11) Ban wak e benefisionan akí mas djaserka.

9. Dikon ora nos hala mas serka Yehova nos bida lo tin meta?

⁹ Hopi hende awe no ta kere ku Dios ta eksistí. Debí na esei, nan no sa pa ki motibu Yehova a krea hende i ta kere ku den futuro humanidat lo disparsé. Sinembargo, danki na nos estudio for di Beibel nos a siña ku tin un Dios i ku nada ku nos hasi p’e no ta en bano pasobra e “ta rekompensá esnan ku ta hasi esfuerso pa busk’é.” (Heb. 11:6) Pues, ora nos hala mas serka Yehova, nos ta hasiendo loke Yehova a krea nos pa hasi: sirbié. Anto ora nos hasi esei nos bida lo tin meta i nos lo ta felis.—Deu. 10:​12, 13.

10. Kiko Salmo 37:29 ta bisa tokante nos futuro?

¹⁰ Hopi hende no tin berdadero speransa pa futuro. Pues pa nan, bida no ta nada otro ku traha, kasa, haña yu i spar pa penshon. Nan no sa mes di Yehova su promesanan pa futuro. Pero, di otro banda, nos sí ta pone nos konfiansa den Yehova. (Sal. 25:​3-5; 1 Tim. 6:17) Nos ta konfia nos Dios i Amigu, i nos sa ku lo e kumpli ku tur su promesanan. Pa nos, futuro ta inkluí: ‘Sirbi Yehova pa semper den Paradeis.’—Lesa Salmo 37:29.

11. Menshoná un otro motibu dikon ta bon pa nos hala mas serka Dios, i kon e ta sinti.

¹¹ Tin hopi motibu mas dikon ta bon pa nos hala mas serka Dios. Por ehèmpel, nos por konta ku lo e pordoná nos ora nos arepentí. (Isa. 1:18) Ke men, nos no tin ku sigui sinti nos malu pa e pikánan ku nos a kometé den pasado. (Sal. 32:​1-5) Ademas, Yehova tambe ta sintié felis i kontentu ora nos hala mas serka dje. (Pro. 23:15) Klaru ku kada un di nos por tin hopi mas motibu dikon ta bon pa hala mas serka Dios. Pero awor, ban wak kon nos por sigui hala serka Dios.

KON PA SIGUI HALA “SERKA DIOS”

12. Kiko abo tin ku hasi pa hala mas serka Dios?

¹² Si bo ta batisá kaba, te na un sierto grado ya b’a logra hala serka Yehova. B’a siña hopi dje bèrdatnan tokante Yehova Dios i Kristu Hesus, b’a arepentí di bo pikánan di pasado, a demostrá fe den Dios i a hasi bo bèst pa obedes’é. Pero si bo ke hala mas serka Dios, bo mester sigui hasi e kosnan ei.—Kol. 2:6.

13. Menshoná tres kos ku ta yuda nos sigui hala serka Yehova.

¹³ Tin tres kos ku ta yuda nos sigui hala serka di Yehova. (1) Nos tin ku sigui lesa i studia Beibel ku e meta di saka afó kiko ta Dios su boluntat pa nos. Pues, nos no ke djis siña e kosnan básiko tokante Dios. Mas bien, nos ke hasi nos esfuerso pa pega na e prinsipionan ku tin den Beibel. (Efe. 5:​15-17) (2) Nos mester fortalesé nos fe. Pa hasi esei, nos mester meditá riba tur e maneranan ku Yehova ta mustra nos ku e ta stima nos. (3) Nos mester sigui odia e kosnan ku Yehova ta odia i evitá di ta amigu di hende ku ta hasi e kosnan ei.—Sal. 1:1; 101:3.

14. Di akuerdo ku 1 Korintionan 10:​31, kon nos por agradá Yehova tur dia? (Wak e plachi.)

¹⁴ Lesa 1 Korintionan 10:31. Ta masha importante pa nos hasi e kosnan ku nos sa ku ta hasi Yehova felis. Esei ta enserá hopi mas ku djis bai sirbishi i reunion. Loke nos ta hasi tur dia mester agradá Yehova. Por ehèmpel, nos ta hasi Yehova kontentu si nos ta onesto den tur kos i ta kompartí loke nos tin. (2 Kor. 8:21; 9:7) Ademas, e ke pa nos balorá bida. Pues, nos lo tene kuenta kuantu nos ta kome i bebe i lo buska maneranan pa kuida nos salú. Ora Yehova ta mira ku nos ta purba di agrad’é asta den e kosnan di mas chikitu, lo e stima nos asta mas.—Luk. 16:10.

15. Kon Yehova ke pa nos trata otro hende?

¹⁵ Yehova ta trata tur hende bon; tantu esnan hustu komo esnan inhustu. (Mat. 5:45) Anto e ta ferwagt pa nos hasi meskos kuné. Por ehèmpel, e no ke pa nos “papia malu di ningun hende ni kana buska pleitu,” ma pa nos demostrá “pleno suavedat pa ku tur hende.” (Tito 3:2) Sabiendo esaki, nos lo no sinti ku nos ta mihó ku otro hende djis pasobra nan no ta sirbi Yehova. (2 Tim. 2:​23-25) Pues, si semper nos trata otro hende bon, nos lo sigui hala serka Yehova.

HALA “SERKA DIOS” ASTA ORA BO FAYA

16. Ki sintimentu e eskritor di Salmo 73 a lucha kuné?

¹⁶ Tin biaha, debí na fayonan ku nos a kometé, nos por kuminsá pensa ku Yehova no ta nos amigu mas. E eskritor di Salmo 73 a sinti algu paresido. El a bisa: “Mi a kasi desviá for di e bon kaminda; mi pianan a hera di slep.” (Sal. 73:2) E mes a atmití ku e tabata “yen di amargura” i “irasonabel” manera “bestia sin sintí” dilanti Yehova. (Sal. 73:​21, 22) El a pensa ku debí na su fayonan e tabata un kaso pèrdí i ku nunka mas Yehova lo stim’é?

17. (a) Kiko e salmista a hasi ora el a sintié desanimá? (b) Kiko nos por siña for di e salmista? (Wak e plachi.)

¹⁷ Si kisas e salmista a sinti ku Yehova a bandon’é, e sintimentu ei no a dura largu. Dikon nos por bisa esei? Asta ora el a sintié hopi kibrá, e tabata sa ku e mester a hala serka Yehova. El a bisa: “Pero awor, mi ta semper huntu ku bo; bo a kohe mi man drechi tene. Bo ta guia mi ku bo konseho, i despues mi ta haña bo aprobashon.” (Sal. 73:​23, 24) Pues ora nos ta sinti nos débil òf desanimá, nos mester pidi Yehova forsa. (Sal. 73:26; 94:18) Asta si nos a faya, nos por bolbe serka Yehova i konfia ku e ta “kla pa pordoná.” (Sal. 86:5) Anto ora nos sinti nos hopi kibrá, ta e ora ei foral nos tin ku hala serka Yehova mas ku nunka.—Sal. 103:​13, 14.

SIGUI HALA “SERKA DIOS” PA SEMPER

18. Dikon nunka lo yega e dia ku nos no tin nodi di sigui hala serka Yehova?

¹⁸ Beibel ta bisa ku Yehova su sabiduria, su konosementu i su kamindanan ta ininvestigabel. Pues nunka lo yega e dia ku nos lo bisa ku nos no tin nodi di sigui hala serka Yehova.—Rom. 11:33.

19. Di kiko e Salmonan akí ta konvensé nos?

¹⁹ Salmo 79:13 ta bisa: “Nos, ku ta bo pueblo i e karnénan di bo kunuku, lo gradisí bo pa semper. Di generashon pa generashon, nos lo alabá bo.” Bo tambe por ta konvensí ku Yehova lo bendishoná bo pa semper tanten bo ta sigui hala serka dje. Anto ku konfiansa bo por bisa: “Dios ta fortalesé mi kurason; e ta mi baranka. E ta mi porshon pa semper.”—Sal. 73:26.