Imitá Marko i Timoteo

1-2. Kiko por a stroba Marko i Timoteo di hasi mas pa Yehova i e kongregashon?

ABO komo un ruman hòmber hóben ke hasi mas pa Yehova i bo kongregashon? Klaru ku bo ke esei. I ta dushi pa mira asina tantu ruman hòmber ku e bunita deseo ei! (Sal. 110:3) Pero kisas tin algu ta wanta bo atras. Kisas ta miedu? Òf, bo ta sinti insigur di bo mes? Si ta asina, no sinti bo malu, bo no ta e úniko.

² Tin dos hende den Beibel ku tambe tabatin e sintimentunan ei; Marko i Timoteo. Pero nan no a laga miedu ni nan falta di eksperensia stroba nan di hasi mas pa Yehova. Por ehèmpel, probablemente Marko ainda tabata biba na kas ku su mama ora ku el a haña invitashon pa biaha huntu ku Apòstel Pablo i Bárnabas riba nan promé biahe komo misionero. (Echo. 12:​12, 13, 25) Asina mes, e tabata dispuesto pa laga kas, mama i otro kos ku e tabata stima pa asina e por a hasi mas pa Yehova. E promé lugá ku el a muda bai tabata Antiokia. Djei, el a biaha ku Pablo i Bárnabas i a bai otro lugánan leu. (Echo. 13:​1-5) Meskos ku Marko, ora Timoteo a haña su invitashon pa djòin Pablo den e trabou di prediká, muy probablemente e tabata biba ku su mayornan ainda. E tabata yòn i tur esaki tabata nobo p’e. Pero akaso el a laga esei strob’é di hasi mas pa Yehova i e kongregashon? Nò. (Kompará ku 1 Korintionan 16:10 i 11 i 1 Timoteo 4:12.) El a djòin Pablo i komo resultado el a haña hopi bendishon.—Echo. 16:​3-5.

3. (a) Kon nos sa ku Pablo a balorá Marko i Timoteo asina tantu? (2 Timoteo 4:​6, 9, 11) (Wak e plachinan.) (b) Kua preguntanan nos lo trata den e artíkulo akí?

³ Den nan hubentut, Marko i Timoteo a haña hopi eksperensia i a siña kon pa karga diferente responsabilidat. Nan tabata asina balioso pa Pablo ku ora el a realisá ku pronto e ta bai muri, e tabata ke pa nan ta huntu kuné. (Lesa 2 Timoteo 4:​6, 9, 11.) Kiko a pone ku Pablo a balorá Marko i Timoteo asina tantu? Komo un ruman hòmber hóben, kon abo por imitá Marko i Timoteo, i kon loke Pablo a konsehá nan por yuda abo?

IMITÁ MARKO, SEA DISPUESTO PA SIRBI BO RUMANNAN

4-5. Kon nos sa ku Marko tabata dispuesto pa sirbi su rumannan?

⁴ Sirbi bo rumannan ta enserá traha duru pa yuda nan asta ora esei ta hopi difísil pa bo. Marko ta un bon ehèmpel den esei. Por ehèmpel, ora ku Pablo no tabata ke pa Marko bai huntu kuné durante su di dos biahe komo misionero, esei sigur lo a dal Marko hopi duru. (Echo. 15:​37, 38) Pero e no a laga esei desanim’é, el a sigui sirbi su rumannan.

⁵ Marko a aseptá un otro asignashon huntu ku su primu, Bárnabas. Anto 11 aña despues, Marko tabata un di e rumannan ku a bai yuda Pablo e promé biaha ku e tabata den prizòn na Roma. (Flm. 23, 24) Pablo a apresiá Marko su yudansa asina tantu ku el a bisa ku Marko tabata “un fuente di gran konsuelo.”—Kol. 4:​10, 11.

6. Kon Marko su amistat ku rumannan fiel a yud’é? (Wak e nota.)

⁶ Algu ku a yuda Marko hopi tabata di pasa tempu ku rumannan ku tabata fiel. Por ehèmpel, despues ku el a pasa tempu ku Pablo na Roma, el a bai Babilonia i a sirbi huntu ku Pedro einan. Nan amistat a krese asina hopi ku Pedro tabata yam’é “Marko, mi yu.” (1 Ped. 5:13) Komo ku nan a pasa hopi tempu trahando huntu, Pedro sigur lo a konta su amigu Marko hopi kos interesante tokante Hesus su bida i sirbishi. Muy probablemente e informashon ei a yuda Marko hopi ora el a skirbi su Evangelio.a

7. Kon Seung-Woo a imitá Marko? (Wak e plachi.)

⁷ Pues ta bisto ku Marko a sigui usa su tempu pa Yehova i a bira amigu di rumannan hòmber ku tin un amistat fuerte ku Yehova. Kon abo por imitá Marko? Wèl, kisas bo ta wardando pa haña un sierto privilegio, pero te ainda nada. No laga esei desanimá bo. Mas bien, tene pasenshi i sigui buska otro kos ku bo por hasi pa Yehova i e kongregashon. Ta esei ta loke a pasa ku Seung-Woo, kende awor ta ansiano. Na yòn e tabata kompará su mes ku e otro hóbennan. El a ripará ku nan tabata haña privilegio promé kuné. Seung-Woo a sinti manera ta lubidá nan a lubidá riba dje. Ku tempu el a konta e ansianonan kon e tabata sinti. Un di nan a sugerié pa hasi tur loke e por den kongregashon, asta si niun hende no ta ripará esei. E sugerensia ei a pone ku Seung-Woo a hasi mas pa yuda e rumannan di edat den su kongregashon i tambe esnan ku tabatin mester di yudansa ku transpòrt pa bin reunion. Awor e ta bisa: “M’a bin komprondé kiko sirbi bo rumannan realmente ta enserá. M’a haña asina hopi goso djis yudando mi rumannan.”

IMITÁ TIMOTEO, STIMA HENDE

8. Dikon Pablo a skohe Timoteo pa bai kuné? (Filipensenan 2:​19-22)

⁸ Pablo tabatin mester di rumannan ku tabatin kurashi pa bai huntu kuné, foral na e statnan kaminda el a yega di hañ’é ku oposishon. El a kuminsá na skohe Sílas, kende tabatin hopi aña kaba ta sirbi Yehova. (Echo. 15:​22, 40) Despues, Pablo a skohe Timoteo pa bai kuné. Kiko Pablo a mira den Timoteo? Un kos ta ku e rumannan tabata papia bon di Timoteo. (Echo. 16:​1, 2) Ademas, Timoteo tabata stima e rumannan di kurason.—Lesa Filipensenan 2:​19-22.

9. Kon nos sa ku Timoteo tabata preokupá pa su rumannan?

⁹ Fo’i e momento ku Pablo a kuminsá traha ku Timoteo, e por a mira ku Timoteo tabata preokupá pa hende mas ku e tabata preokupá pa su mes. P’esei, Pablo tabata kómodo pa laga Timoteo i Sílas na Berea. E tabata sa ku Timoteo lo a sigui animá e rumannan resien batisá einan. (Echo. 17:​13, 14) Sin duda Timoteo lo a siña hopi for di Sílas. Anto mas despues, Pablo a manda Timoteo su so bai Tesalónika pa fortalesé e rumannan einan. (1 Tes. 3:2) Pa e siguiente 15 añanan, e amor ku Timoteo tabatin pa su rumannan a bira mas fuerte. El a stima nan asina tantu ku tin biaha e tabata “yora ku esnan ku ta yora.” (Rom. 12:15; 2 Tim. 1:4) Awor, kon abo por imitá Timoteo?

10. Kon Ruman Woo Jae a siña mustra interes den su rumannan?

¹⁰ Un ruman ku yama Woo Jae a siña kon pa mustra interes den su rumannan. Tempu ku e tabata yòn, tabata difísil pa e hiba un kòmbersashon ku rumannan di edat. P’esei na Salòn e tabata djis kumindá nan anto sigui. Un ansiano a konsehá Woo Jae pa bisa un ruman algu ku e ta apresiá den dje i asina kuminsá un kòmbersashon. Tambe e ansiano a bis’é pa pensa riba kiko asina e ruman lo ta interesá den dje. Woo Jae a hasi loke e ansiano a konseh’é. Awor Woo Jae ta un ansiano, anto e ta bisa: “Awor ta mas fásil pa mi kòmbersá ku hende di tur edat. Esaki ta hopi bon pasobra awor mi por haña sa loke ta preokupá nan. I esei ta di gran yudansa pa mi por yuda mi rumannan mas mihó.”

11. Kon abo por mustra interes den e rumannan di bo kongregashon? (Wak e plachi.)

¹¹ Abo, meskos Woo Jae, por siña kon pa mustra interes den otro ruman. Na reunion, papia ku ruman di diferente edat i background. Puntra nan kon ta bai i para skucha. Ku tempu lo bo ripará kon bo por yuda nan. Kisas bo ta haña sa ku tin un pareha di edat ku mester di yudansa ku nan JW Library^® app. Òf bo ta haña sa ku nan no tin niun hende pa sali kuné den sirbishi. Awor ku bo a ripará loke nan mester, lo bo tuma e inisiativa pa yuda nan? Si bo hasi esei lo bo pone un bon ehèmpel pa tur hende.

PABLO SU KONSEHO POR YUDA BO

12. Kon bo por benefisiá di e konsehonan ku Pablo a duna Timoteo?

¹² Pablo a skirbi Timoteo dos karta. Den nan el a dun’é konseho práktiko ku lo yud’é tin un bida mas felis i sirbi Yehova di henter kurason. (1 Tim. 1:18; 2 Tim. 4:5) E konsehonan ei ta disponibel pa bo tambe. P’esei, ora bo ta lesa e dos kartanan ei, hasi manera ta pa abo Pablo a skirbi nan i wak kua di e konsehonan bo por usa den bo bida. Laga nos wak kon bo por hasi esei.

13. Splika kiko deboshon na Dios ta enserá.

¹³ “Entrená bo mes ku e meta di kultivá deboshon na Dios.” (1 Tim. 4:7b) Kon un persona ta demostrá ku e tin “deboshon na Dios”? Wèl, e ta demostrá esei ora e ta leal na Dios i hasi e kosnan ku ta agrad’é. Pero esei no ta un kualidat ku nos ta nase kuné, e ta algu ku nos mester kultivá. Kon nos ta kultiv’é? E palabra griego tradusí komo “entrená bo mes” ku Pablo a usa, ta duna e idea di e esfuerso ku un atleta ta hasi pa prepará pa un kompetensia. Un atleta asina lo mester disipliná su mes pa logra su meta. Meskos ku e atleta ei, nos tambe mester disipliná nos mes pa nos sigui hasi e kosnan ku ta yuda nos hala mas serka di Yehova.

14. Kiko mester ta nos meta ora di lesa Beibel? Usa un ehèmpel.

¹⁴ Un di e kosnan importante ku lo bo ke hasi ta lesa bo Beibel tur dia. Anto segun ku bo ta hasi esei, hasié ku e meta di hala mas serka di Yehova. Por ehèmpel, ban bisa bo ta lesando e relato tokante e hòmber riku ku a aserká Hesus. (Mar. 10:​17-22) E tabata sa ku Hesus ta e Mesías, pero e tabata falta fe. Asina mes, Hesus “a sinti un amor p’e.” Bo a ripará kon Hesus a papia kuné? Ta bisto ku Hesus ègt tabata ke pa e hòmber tuma e mihó desishon di su bida. E amor ku Hesus a sinti pa e hòmber tabata loke su Tata tambe tabata sinti. (Huan 14:9) Segun ku bo ta meditá riba e relato ei, puntra bo mes: ‘Den mi sirkunstansia, kiko ami mester hasi pa hala mas serka Yehova i hasi mas pa mi rumannan?’

15. Dikon ta importante pa bo ta un bon ehèmpel pa bo rumannan? Ilustrá esei. (1 Timoteo 4:​12, 13)

¹⁵ “Bira un bon ehèmpel pa esnan fiel.” (Lesa 1 Timoteo 4:​12, 13.) Pablo no a bisa Timoteo pa traha riba abilidatnan so, manera lesa i siña otro hende. El a bis’é tambe pa desaroyá kualidatnan, manera amor, fe i puresa. Dikon? Pasobra hende ta siña mas for di loke bo ta hasi ku for di loke bo ta bisa. Pues, ban bisa bo tin ku duna un diskurso tokante hasi mas den e trabou di prediká. Lo bo por duna e diskurso ei muchu mas mihó si abo mes ta hasiendo bo bèst den sirbishi. Anto e rumannan lo tuma bo mas na serio pasobra bo mes ta hasi e kos ku bo ta animá nan pa hasi.—1 Tim. 3:13.

16. (a) Segun 1 Timoteo 4:​12, den ki sinku manera bo por ta un bon ehèmpel? (b) Kon bo por ta un bon ehèmpel den bo “manera di papia”?

¹⁶ Na 1 Timoteo 4:​12, Pablo a menshoná sinku manera ku bo por ta un bon ehèmpel. Kisas durante bo estudio personal bo por focus riba nan un pa un. Ban bisa bo ke ta un bon ehèmpel den bo “manera di papia.” Kiko lo yuda bo hasi esei? Wèl, kuminsá pensa riba e maneranan ku bo por usa bo palabranan pa animá otro. Por ehèmpel, si ainda bo ta biba na kas di bo mayornan, bisa nan mas frekuente ku bo ta apresiá loke nan ta hasi pa bo. Anto despues di reunion, bai serka un ruman i bis’é kiko bo a gusta di su parti. I bo por asta duna komentario durante reunion den bo mes palabra. Hasiendo tur esei, lo bo ta un bon ehèmpel i tur hende lo por mira bon kla ku bo ta progresando.—1 Tim. 4:15.

17. Kiko lo yuda abo komo hóben logra bo metanan spiritual? (2 Timoteo 2:22)

¹⁷ “Hui for di e deseonan di hubentut, ma hasi esfuerso pa kultivá hustisia.” (Lesa 2 Timoteo 2:22.) Ei, Pablo tabata roga Timoteo pa e bringa kontra kualke kos ku por strob’é di logra su metanan spiritual òf asta daña su amistat ku Yehova. Kisas den bo kaso, tin sierto kos den bo bida ku no ta ègt malu, pero nan ta kita tempu for di bo ku bo por a usa pa hasi mas pa Yehova. Por ehèmpel, konta kuantu tempu bo ta dediká na deporte, Internet i hungando wega. Pakiko no usa parti di e tempu ei pa hasi kosnan pa Yehova? Kisas bo por yuda den mantenshon di bo Salòn di Reino òf traha ku garoshi. Ora bo hasi kosnan asina lo bo sera ku mas ruman ku lo yuda bo pone metanan spiritual i logra nan.

TA DUSHI PA YUDA BO RUMANNAN

18. Kon nos sa ku Marko i Timoteo tabatin un bida dushi i felis?

¹⁸ Ta bèrdat ku Marko i Timoteo a hasi hopi sakrifisio pa yuda nan rumannan. Pero nos sa tambe ku nan tabatin un bida dushi i felis. (Echo. 20:35) Por ehèmpel, Marko a biaha bai diferente pais pa yuda su rumannan. Tambe e tabatin e privilegio di skirbi un bunita Evangelio tokante e bida di Hesus. Anto Timoteo a yuda Pablo forma diferente kongregashon i fortalesé e rumannan. Sin duda, Yehova a mira tur e sakrifisionan ku nan a hasi i el a keda masha kontentu ku esei.

19. Dikon abo lo ke sigui e konseho ku Pablo a duna Timoteo, i kiko lo pasa si bo hasi esei?

¹⁹ Ora bo lesa e kartanan ku Pablo a skirbi pa Timoteo, ta bisto kuantu e tabata stima su amigu. Ademas, e kartanan ei ta yuda bo mira kuantu Yehova ta stima abo. E ke bo bon. E ke pa bo tin éksito den bida. Pues, hasi bo bèst pa sigui e konseho di Pablo i hasi mas pa yuda bo rumannan. Si bo hasi esei, lo bo tin un bida dushi aworakí i den futuro lo bo “haña un gara firme riba loke realmente ta bida.”—1 Tim. 6:​18, 19.