Kon pa Pidi Bon Konseho

1. Ki Beibel por yuda nos kuné? (Proverbionan 13:10; 15:22)

NOS tur ke tuma desishonnan sabí i pa nos plannan tin éksito. Beibel por yuda nos logra tur dos.—Lesa Proverbionan 13:10; 15:22.

2. Kiko Yehova ta primintí kada un di nos?

² Yehova ta e mihó Persona ku nos por pidi konseho i sabiduria. E ta primintí kada un di nos: “Mi bista lo ta riba bo pa kuida bo i duna bo konseho.” (Sal. 32:8) For di e palabranan akí nos ta mira ku Yehova no ta djis duna nos konseho pero e ta yuda nos tambe pa apliká e konseho.

3. Kiko nos lo trata den e artíkulo akí?

³ Si nos ke benefisiá di bon konseho, ta masha importante pa nos puntra nos mes: (1) Ki kualidatnan mi mester tin? (2) Ken por duna mi bon konseho? (3) Kon mi por mustra ku mi ta habrí pa konseho? (4) Dikon mi no mester pidi otro hende pa tuma desishon pa mi? Den e artíkulo akí nos lo wak kon Beibel ta yuda nos kontestá e preguntanan ei.

KI KUALIDATNAN MI MESTER TIN?

4. Ki kualidatnan sigur nos mester tin pa benefisiá di bon konseho?

⁴ Dos kualidat ku sigur nos mester tin ta humildat i modestia. Nan lo yuda nos aseptá ku nos no sa tur kos i ku nos mester di yudansa pa trata ku sierto situashon. Si nos no ta humilde ni modesto, Yehova lo no yuda nos. Pues, kualke konseho ku nos haña den Beibel lo drenta un orea, sali dje otro. (Mik. 6:8; 1 Ped. 5:5) Pero si nos ta humilde i modesto, mesora nos lo apliká e konseho ku nos a haña den Beibel.

5. Ki por a hasi David orguyoso?

⁵ David a logra hopi kos den su bida ku por a lag’é bira orguyoso. Hopi aña promé ku el a bira rei, e tabata konosí komo un bon músiko. Te asta rei a pidié pa bin toka p’e. (1 Sám. 16:​18, 19) For di ora ku Yehova a skohe David pa bira e siguiente rei, el a yuda David ku Su spiritu santu. (1 Sám. 16:​11-13) E israelitanan tabata gaba David pasobra el a mata hopi di nan enemigunan, inkluso Góliat. (1 Sám. 17:​37, 50; 18:7) Si David tabata orguyoso, lo e por a pensa ku mirando tur loke el a logra, e no mester di konseho di niun hende. Pero e tabata humilde.

6. Kon nos sa ku David tabata habrí pa konseho? (Wak e plachi.)

⁶ Despues ku David a bira rei, e tabatin amigunan ku por a dun’é konseho. (1 Kró. 27:​32-34) Anto ta di ferwagt, pasobra David semper tabata un hende ku a skucha na bon konseho di tantu hende hòmber komo hende muhé. Por ehèmpel, un biaha el a haña konseho for di Abigail. Abigail su kasá Nábal tabata un hòmber masha malagradesí, orguyoso i sin rèspèt. Pero David tabata humilde i a hasi kaso di Abigail su bon konseho. Asina ei David a evitá di hasi un fayo grave.—1 Sám. 25:​2, 3, 21-25, 32-34.

7. Kiko nos por siña for di David? (Eklesiástes 4:13) (Wak e plachi.)

⁷ Tin algun kos ku nos por siña for di David. Por ehèmpel, kisas meskos ku David nos por ta hopi bon den algu òf nos tin un grado di outoridat. Si esei te kaso, nunka nos no mester pensa ku nos no tin mester di konseho. Anto, meskos ku David, nos mester ta habrí pa tende bon konseho sin importá fo’i ken e bin. (Lesa Eklesiástes 4:13.) Si nos hasi esei, nos lo evitá di hasi fayo grandi ku por hasi tantu nos komo otro hende doló.

KEN POR DUNA MI BON KONSEHO?

8. Dikon Yónatan por a duna David bon konseho?

⁸ Kiko mas nos por siña for di David? Un otro lès ku nos por siña for di dje ta ku el a pidi konseho for di hende ku tabatin un bon amistat ku Yehova i tabata komprondé e situashon ku e tabata pasa aden. Por ehèmpel, ora e tabata kier a sera pas ku Rei Saul, el a pidi Yónatan konseho. Dikon Yónatan tabata esun ku por a dun’é bon konseho? Pasobra Yónatan tabatin un bon amistat ku Yehova i komo yu di Saul, e tabata konos’é bon. (1 Sám. 20:​9-13) Kiko esaki ta siña nos?

9. Ken nos mester pidi konseho? Splika. (Proverbionan 13:20)

⁹ Ora nos tin mester di konseho, nos tin ku pidié serka hende ku tin bon amistat ku Yehova i sa tokante di loke nos tin mester di yudansa kuné.a (Lesa Proverbionan 13:20.) Imaginá ku un ruman hòmber hóben ta buskando un kasá. Ken por dun’é bon konseho? Un amigu soltero di dje por dun’é bon konseho for di Beibel. Pero lo e haña mihó konseho si e puntra un pareha ku konos’é bon i ku tin un amistat fuerte ku Yehova. Nan por yud’é mira kon pa apliká konseho for di Beibel i loke nan a siña for di nan matrimonio.

10. Kiko nos lo bai analisá awor?

¹⁰ Te asina leu nos a wak dos kualidat ku nos mester tin i tambe ken por duna nos bon konseho. Awor ban wak kon nos por mustra ku nos ta habrí pa konseho i dikon nos no mester pidi otro hende pa tuma desishon pa nos.

KON MI POR MUSTRA KU MI TA HABRÍ PA KONSEHO?

11-12. (a) Kiko nos por hasi tin biaha? (b) Kiko Rehóboam a hasi ora e mester a tuma un desishon importante?

¹¹ Tin biaha, pa rèspèt un hende ta pidi konseho. Pero kisas ya e tin su desishon den su kabes kaba. Bon mirá, e ta buska loke e ke tende i no ta habrí pa konseho. Un hende asina por siña hopi for di loke a pasa ku Rei Rehóboam.

¹² Rehóboam a bira rei, despues ku su tata Sálomon a muri. Ten ku Rehóboam a bira rei e nashon tabata riku, pero e pueblo tabata sinti ku Sálomon a laga nan traha muchu duru. P’esei nan a bai papia ku Rehóboam pa pidié aliviá e trabounan pisá ku nan tabatin. Rehóboam a pidi nan pa dun’é tempu p’e pensa. Promé, el a pidi konseho serka e hòmbernan di edat ku tabata sirbi su tata Sálomon. (1 Rei. 12:​2-7) Pero el a rechasá nan konseho. Dikon el a hasi esei? Kisas el a spera ku nan lo a bis’é loke ya e tabatin na mente. Pues el a sintié bon ora el a pidi e hóbennan ku el a lanta kuné konseho i nan a bis’é loke e kier a tende. (1 Rei. 12:​8-14) El a bisa e pueblo presis loke e hóbennan a bis’é. Debí na e konseho ei, e nashon a parti na dos i djei padilanti Rehóboam no tabatin pas mas.—1 Rei. 12:​16-19.

13. Kon nos por sa si nos ta habrí pa konseho?

¹³ Kiko nos por siña for di Rehóboam? Ora nos ta pidi pa konseho, nos no mester a tuma un desishon kaba. Dikon? Pasobra esei lo stroba nos di skucha konseho ku nos ta haña. P’esei, pa bo por sa si bo ta habrí pa konseho, puntra bo mes: ‘Mi ta rechasá e konseho ku mi ta pidi djis pasobra e no ta loke mi ke tende?’ Wak kon esei por pasa.

14. Ki nos tin ku kòrda ora nos haña konseho? Duna un ehèmpel. (Wak e plachi.)

¹⁴ Imaginá ku un hende a ofresé un ruman hòmber un bon trabou. Promé ku e aseptá e trabou, e ta pidi un ansiano konseho. E ta bisa e ansiano ku e trabou lo pone ku pa tempu largu lo e ta leu fo’i su famia. E ansiano ta usa Beibel pa kòrd’é ku su responsabilidat prinsipal ta spiritualidat di su famia. (Efe. 6:4; 1 Tim. 5:8) Laga nos bisa ku e ruman no a gusta e konseho ku el a haña. Pues e ta sigui puntra otro ruman te ora e haña un hende ku ta bis’é loke e ke tende. Bo ta kere ku e ruman hòmber ei di bèrdat ta buska konseho òf ya e tin su desishon kaba i ta djis buska un hende ku ta di akuerdo kuné? No lubidá, nos kurason ta traishonero. (Yer. 17:9) Tin biaha, nèt e konseho ku nos no ke tende, ta nèt loke nos tin mester.

OTRO HENDE TIN KU TUMA DESISHON PA MI?

15. Kiko nos mester evitá di hasi, i dikon?

¹⁵ Kada un di nos tin ku tuma nos propio desishonnan. Esei ta nos responsabilidat. (Gal. 6:​4, 5) Manera nos a siña kaba, promé ku nos tuma un desishon, ta importante pa nos buska konseho for di Beibel i for di rumannan ku tin hopi tempu ta sirbi Yehova fielmente. Pero, loke nos mester tene kuidou kuné ta pa nos no pidi otro ruman bisa nos kiko pa hasi. Algun ta hasi esaki, puntrando un ruman ku nan ta konfia: “Bo sa, tal i tal kos ta pasando, kiko mi tin ku hasi?” Otro, sin pensa ni buska nan mes ta djis wak ki desishon un ruman a tuma i ta pensa: ‘Mi tambe ta bai hasi meskos.’

16. Ki desishon kada ruman den e kongregashon na Korinto mester a tuma tokante karni ku a ser ofresé na dios falsu? (1 Korintionan 8:7; 10:​25, 26)

¹⁶ Den promé siglo, e rumannan na Korinto tabatin ku tuma un desishon tokante karni ku a ser ofresé na dios falsu. Pablo a bisa nan: “Nos sa ku dios falsu no ta apsolutamente nada i ku ta ún Dios so tin.” (1 Kor. 8:4) Ku esei na mente, algun ruman den e kongregashon no tabatin problema pa kome e karni ku tabata bende na marshe, aunke ku, mas promé a ofresé e karni ei na dios falsu. Pero tabatin algun ruman ku a disidí ku nan lo no kome e karni ei pasobra esei lo a molestiá nan konsenshi. (Lesa 1 Korintionan 8:7; 10:​25, 26.) E asuntu di kome e karni òf nò tabata un desishon personal. Pablo no a bisa ku un por a tuma desishon pa otro ni ku un por a wak kiko e otro a hasi i djis hasi meskos. Ku otro palabra, kada un di nan mester a “duna kuenta i rason na Dios pa [su] akshonnan.”—Rom. 14:​10-12.

17. Kiko lo pasa si nos djis hasi meskos ku otro ruman? Duna un ehèmpel. (Wak e plachi.)

¹⁷ Loke a pasa na Korinto por pasa awe tambe? Sí, por ehèmpel ku e asuntu di frakshon di sanger. Ora ta trata di frakshon di sanger, kada kristian mester tuma su mes desishon basá riba su konsenshi ku ta bíblikamente entrená.b Ta bèrdat ku e tópiko akí no ta un tópiko fásil. Pero, tipo di desishonnan asina ta parti di bo karga ku abo tin ku karga. (Rom. 14:4) Si nos djis hasi meskos ku otro ruman, nos lo suak nos konsenshi i nunka madurá. Pero, si nos usa Beibel pa yuda nos tuma nos mes desishonnan, nos lo entrená nos konsenshi i bira madurá. (Heb. 5:14) Pero kiko si nos a hasi nos esfuerso pa komprondé pero ainda nos no ta sali afó? Wèl, ta e ora ei numa nos por pidi yudansa for di rumannan ku tin hopi tempu ta sirbi Yehova fielmente.

SIGUI PIDI KONSEHO

18. Kiko Yehova a hasi pa nos?

¹⁸ Yehova tin masha konfiansa den nos i p’esei e ta permití nos tuma nos mes desishon. El a pèrkurá pa nos tin Beibel i amigunan ku ta sirbié fielmente ku por yuda nos komprondé kon pa usa e prinsipionan ku tin den Beibel. Pues, komo Tata, Yehova a kumpli ku su responsabilidat. (Pro. 3:​21-23) Awor, kon nos por mustra ku nos ta gradisidu pa su yudansa?

19. Kon nos por hasi Yehova kontentu?

¹⁹ Tur mayor ke mira nan yu krese, madurá i sirbi Yehova fielmente. Asina tambe, komo nos Tata den shelu, Yehova ta keda masha kontentu di mira nos krese spiritualmente i sigui pidi bon konseho pa asina nos por tuma desishon sabí den bida.