Mi Timides No A Stroba Mi Bira Misionero

M’a nase na 1951 na Vienna, Austria, den un famia katóliko. Aunke mi tabatin miedu di aserka hende, mi tabata kere den Dios i tabata papia hopi kuné. Ora mi tabatin nuebe aña, mi tata a kuminsá studia ku Testigunan di Yehova; despues mi mama a djòin e.

Nos a kuminsá bai Kongregashon Döbling na Vienna. Komo famia nos tabata hasi hopi kos huntu. Nos tabata lesa i studia Beibel, bai reunion i traha komo boluntario na asamblea. Durante e añanan ei, mi tata a yuda mi stima Yehova masha hopi. Semper e tabata resa pa ami ku mi ruman muhé bira pionero. Pero e tempu ei, ami no tabata ke hasi esei.

SIRBISHI DI TEMPU KOMPLETO

Na 1965, m’a batisá ku 14 aña. Pero den sirbishi tabata difísil pa mi papia ku hende ku mi no tabata konosé. Mi tabatin kompleho i p’esei mi tabata hasi hopi kos pa otro hóben aseptá mi. Poko despues ku m’a batisá, m’a sera amistat ku algun hóben ku no tabata sirbi Yehova. Mi tabata gusta anda ku nan pero mi konsenshi tabata molestiá mi pasobra mi tabata sa ku mi no mester a pasa asina tantu tempu ku nan. Ma mi no tabatin e forsa pa stòp di anda ku nan. Pero m’a haña yudansa.

Na e tempu ei, un mucha muhé di 16 aña ku yama Dorothée a kuminsá bin nos kongregashon. Mi por a mira kuantu e tabata gusta prediká di kas pa kas. Mi tabata un tiki mas grandi kuné, pero tòg mi no tabata sali den sirbishi mashá. M’a pensa den mi mes: ‘Mi mayornan ta Testigu, pero Dorothée no tin e tipo di sosten ei. E ta biba huntu ku su mama ku ta malu, anto tòg semper e ta den sirbishi.’ Su ehèmpel a animá mi pa hasi mas pa Yehova. Djis despues, ami kuné a kuminsá traha pionero ousiliar, anto despues pionero regular. Su entusiasmo a animá mi asina tantu ku mi tambe a kuminsá gusta e trabou di prediká. El a yuda mi kuminsá ku mi promé estudio di Beibel. Ku tempu, mi tabata sinti mi un tiki mas kómodo pa papia ku hende den sirbishi, riba kaya òf otro kaminda.

Durante e promé aña ku m’a traha komo pionero regular, Heinz, un ruman di Austria, a ser asigná na nos kongregashon komo pionero spesial. El a haña e bèrdat na Canada ora e tabata bishitando su ruman ku ta Testigu di Yehova. M’a gusta Heinz for di ora m’a mir’é. E tabata ke bira misionero pero ami sí nò. P’esei na promé instante mi no a lag’é mira ku mi gust’é. Pero mas despues, ami ku Heinz a kuminsá namorá otro, nos a kasa i a kuminsá traha pionero huntu na Austria.

MISIONERO A BIRA MI META

Hopi biaha Heinz sa papia ku mi tokante su deseo di bira misionero. Maske e no tabata pone preshon, e tabata hasi mi pregunta manera: “Ya ku nos no tin yu, bo ta kere ku nos por hasi mas pa Yehova?” Debí ku mi tabata tímido, mi tabatin miedu di bira misionero. Apesar ku m’a logra bira pionero, e idea di bira misionero sí tabata duna mi miedu. Pero Heinz, na un manera masha trankil, tabata papia di e meta di bira misionero. El a animá mi pa no focus riba mi miedu pero focus riba e hendenan ku mi por yuda. Su konseho a yuda mi hopi.

Tiki-tiki, m’a kuminsá haña gana di bira misionero, pues nos a yena e formulario pa Skol di Gálad. Pero, e sirbidó di sukursal a sugerí pa mi mehorá mi ingles promé. Despues di tres aña ta lucha pa mehorá mi ingles, pa nos sorpresa nos a haña un asignashon pa un kongregashon yugoslavo ku tabata keda na Salzburg, Austria. Nos a traha den e teritorio ei pa shete aña, entre nan ún aña den e trabou di sirkuito. Aunke e idioma serbio-kroata tabata difísil, nos tabatin hopi estudio.

Na 1979 sukursal a manda nos Bulgaria ku “fakansi.” Nos trabou einan tabata prohibí. Pues nos no a prediká durante nos “fakansi.” Pero den skondí nos a bai ku publikashonnan di tamaño hopi chikitu pa e sinku ruman muhénan ku tabata biba na Sofia, kapital di Bulgaria. Mi tabatin hopi miedu, pero Yehova a yuda mi. Mi por a mira ku e sinku ruman muhénan ei tabatin hopi kurashi i tabata hopi kontentu aunke un ora pa otro polis por hinka nan den prizòn. Nan ehèmpel a yuda mi haña e kurashi pa hasi loke sea Yehova su organisashon pidi mi hasi.

Despues di un par di tempu nos a bolbe yena formulario pa Gálad, anto e biaha akí sí nos a wòrdu aseptá. Nos a pensa ku nos lo bai e skol na ingles na Merka. Pero na novèmber 1981 a kuminsá ku e Ekstenshon di e Skol di Gálad, na Wiesbaden, Alemania. Pues nos por a bai e skol na e idioma aleman, ku tabata mas fásil pa mi komprondé. Na final di e skol, kiko lo tabata nos siguiente asignashon?

SIRBIENDO DEN UN PAIS DI GUERA

Wèl, nos asignashon a bira Kenia! Anto e ora ei, sukursal di Kenia a puntra nos si nos ke sirbi na e pais bisiña ku ta Uganda. Mas ku dies aña promé, militarnan bou di mando di General Idi Amin a tumba e gobièrnu di Uganda. E añanan ku e general ei tabata na mando, el a laga mata míles di hende i miónes di hende tabata sufri. Na 1979 e gobièrnu di Idi Amin a kai. Ta di komprondé dikon mi tabatin hopi miedu pa bai un pais ku tabatin asina tantu guera. Pero Skol di Gálad a siña nos pa konfia den Yehova. Pues nos a bisa sí.

Bida na Uganda tabata hopi insigur. Gobièrnu no por a pèrkurá awa, koriente i otro kosnan básiko. Telefonnan no tabata traha. Hende tabata tira otro mata i hòrta nan kosnan, foral durante anochi. Ora solo baha tur hende tabata keda paden i tabata spera i asta hasi orashon pa niun hende no bin hòrta algu i tira nan mata. Apesar di tur e situashonnan difísil ei, e rumannan na Uganda tabata sirbi Yehova ku goso!

Na 1982, ami ku Heinz a yega Kampala, kapital di Uganda. E promé sinku lunanan nos a keda na kas di Sam ku Christina Waiswa huntu ku nan sinku yunan plùs kuater hende ku tabata nan famia. Rumannan Waiswa i nan famia hopi biaha tabata kome ún kuminda pa dia. Pero semper nan tabata dispuesto pa kompartí e tiki ku nan tabatin ku nos. E tempu ku nos a keda serka Famia Waiswa, nos a siña hopi lès práktiko ku a yuda nos den nos asignashon komo misionero. Por ehèmpel, nos a siña kon pa baña ku masha tiki awa i usa e mesun awa ei pa flùsh w.c. Na 1983, ami ku Heinz a haña nos mes kas den un área basta safe na Kampala.

Nos a ègt gusta nos sirbishi einan. Mi ta kòrda ku den un luna nos a laga mas ku 4.000 revista! Pero loke nos a gusta mas ta e manera ku e hendenan tabata reakshoná. Nan tabatin rèspèt pa Dios i kier a papia di Beibel. Tantu ami komo Heinz tabatin 10 pa 15 estudio di Beibel. Nos a siña hopi for di nos studiantenan. Por ehèmpel, maske nan mester a kana pa bai Salòn tur siman, nunka nan tabata keha i semper nan tabata smail.

Na 1985 i 1986, tabatin dos guera mas na Uganda. Hopi biaha nos tabata mira muchanan ku tabata sòldá armá ku rifel i nan tabata para na puntonan di kontrol. Ora nos tabata prediká durante e dos añanan ei, nos tabata pidi Yehova pa yuda nos ta sabí, pa keda kalmu i evitá peliger. Anto Yehova a kontestá nos orashonnan. Hopi biaha, asina ku nos haña un hende ku tabata interesá, nos tabata lubidá tur e miedu ku nos tabatin.

Tambe nos a gusta prediká na hende ku no tabata di Uganda. Por ehèmpel, nos a studia ku Murat ku Dilbar Ibatullin, un pareha kasá ku tabata di Tatarstan (Rusia Sentral). Murat tabata dòkter. Nan a batisá i te ainda nan ta sirbi Yehova. Despues m’a konosé Tatjana Vileyska, ku tabata di Ukrania. E tempu ei e tabata asina deprimí ku e kier a kita su bida. Despues ku Tatjana a batisá, el a bai Ukrania bèk i ku tempu el a bira un traduktor di nos publikashonnan.a

PAIS NOBO, RETO NOBO

Na 1991 ami ku Heinz a bai fakansi na Austria. E sukursal einan a tuma kontakto ku nos i a informá nos ku nos a haña un asignashon nobo: Bulgaria. Despues ku komunismo a kai na Ost Europa, nos trabou di prediká a bira legal na Bulgaria. Manera m’a konta kaba, ami ku Heinz a hiba publikashon na skondí einan tempu nos trabou tabata prohibí. Pero awor, nan a manda nos pa bai prediká.

E rumannan a bisa nos pa bai dirèkt Bulgaria i pa no bolbe Uganda. Pues nos a bai Bètel na Alemania, kue un outo i bai Bulgaria. Nos no a bai bèk nos kas na Uganda pa piki nos kosnan ni yama nos amigunan ayó. Nos a wòrdu asigná na un grupo di mas o ménos 20 publikadó na Sofia.

Nos a haña nos ku otro retonan na Bulgaria. Pa kuminsá, nos no tabata sa e idioma. Anto e úniko bukinan disponibel na e idioma tabata E berdad cu ta hiba na bida eterna i Mi Buki di Relato Bíbliko. Tambe nos a haña ku tabata difísil pa kuminsá estudio di Beibel. Apesar di tur e retonan ei, nos grupito tabata prediká ku entusiasmo. Pero e problemanan a kuminsá mes mes, ora iglesia òrtodòks a realisá ku nos tabata prediká.

Na 1994 Testigunan no tabata un religion ofisial na Bulgaria mas i a wòrdu tratá komo un sekta peligroso. Nan a arestá algun ruman hòmber. Korant i televishon a plama masha hopi mentira tokante nos, bisando ku Testigunan no solamente ta mata mucha pero ta konvensé otro Testigunan pa mata nan kurpa. Ami ku Heinz a haña ku a bira masha difísil pa prediká. Hopi biaha den sirbishi hende tabata grita nos, yama polis pa nos i asta tira nos ku kos. No tabata posibel pa literatura drenta e pais, i tabata hopi difísil pa hür un lugá pa nos reuní. Un biaha polis a asta para un kongreso. Ami ku Heinz no a kustumbrá ku asina tantu odio. Tur esaki tabata kompletamente kontrali na loke nos a kustumbrá kuné na Uganda! Kiko a yuda ami ku Heinz keda ku nos goso?

Loke ku a yuda nos ta di pasa tempu ku nos rumannan. Nan tabata felis di a haña e bèrdat i tabata masha gradisidu ku nos tabata huntu ku nan. Nos tur tabata yuda otro i kuida otro. Tur esaki a siña nos ku nos por ta felis den kualke asignashon basta nos sigui stima hende.

Ku tempu, kosnan a mehorá. Nos organisashon a bira legal atrobe na 1998 i a tradusí hopi publikashon mas na búlgaro. Anto na 2004 a dediká un sukursal nobo. Awe tin 57 kongregashon na Bulgaria ku 2.953 publikadó. Anto na 2024, e asistensia na Memorial tabata 6.475. Un tempu tabatin sinku ruman muhé só na Sofia, awor nos tin nuebe kongregashon! Di bèrdat nos a mira “e kantidat chikitu . . . bira mil.”—Isa. 60:22.

NOS A HAÑA NOS KU PRUEBA

Durante mi bida m’a haña mi ku vários problema di salú. Vários biaha dòkternan a deskubrí ku mi tabatin tumor. Anto un biaha mi tabatin tumor den mi kabes. M’a haña bestraling i m’a bai India pa un operashon ku a dura 12 ora largu ku a kita gran parti di e tumor den mi kabes. Despues di e operashon nos a keda un tempu na e sukursal di India pa mi rekuperá i despues nos a bolbe nos asignashon na Bulgaria.

Den e mesun temporada ei, Heinz a kuminsá sufri di un malesa hereditario ku yama Huntington. E tabatin problema pa kana, papia i pa kontrolá su múskulonan. Segun ku e malesa tabata avansá, Heinz a kuminsá dependé mas i mas riba mi. Tin biaha mi tabata asina kansá i tabata preokupá ku mi no por a sigui kuid’é. Pero tabatin un ruman ku yama Bobi ku regularmente tabata bai ku Heinz den sirbishi. Bobi no tabatin bèrgwensa di Heinz su malesa. Ora mi no por a yuda Heinz, mi por a konta ku Bobi su yudansa. Maske ami ku Heinz a disidí di no haña yu den e mundu akí, nos a sinti ku Yehova a regalá nos Bobi komo yu!—Mar. 10:​29, 30.

Heinz tabatin kanser tambe. Lamentablemente, mi kasá stimá a fayesé na 2015. Mi ta sinti su falta masha hopi mes. Semper e tabata yuda mi pa mi no preokupá mashá. Ta hopi duru ku mi Heinz no t’ei mas. Pero mi ta pensa hopi riba dje, i ta komo si fuera pa mi ainda e ta bibu! (Lúk. 20:38) Durante dia, hopi biaha mi ta kòrda e palabranan amabel ku e tabata bisa mi i e bon konsehonan ku e tabata duna mi. Mi ta masha gradisidu ku nos por a sirbi Yehova huntu durante tur e añanan.

GRADISIDU PA YEHOVA SU YUDANSA

No tin duda, Yehova semper a yuda mi durante tur mi pruebanan. El a asta yuda mi bira un misionero ku stima hende aunke mi ta tímido. (2 Tim. 1:7) Danki na Yehova, ami i mi ruman muhé tur dos ta den sirbishi di tempu kompleto. E ku su kasá ta den trabou di sirkuito pa e idioma serbio na Europa. Yehova a kontestá e orashonnan ku mi tata tabata hasi ora nos tabata mucha!

Kada biaha ku mi ta studia Beibel, e ta yuda mi haña e pas ku ta bini di Yehova. Ora mi ta pasa den situashonnan difísil, m’a siña pa hasi orashon ku “mas fervor ainda,” meskos ku Hesus a hasi. (Lúk. 22:44) Un manera ku Yehova ta kontestá mi orashonnan ta pa medio di e amor i bondat di e rumannan den mi kongregashon na Nadezhda, Sofia. Nan ta invitá mi pa pasa tempu ku nan i hopi biaha nan ta bisa mi kuantu nan ta stima mi. I tur eseinan ta hasi mi masha kontentu mes.

Hopi biaha mi ta pensa riba resurekshon. Mi sa imaginá mi mayornan dilanti di nos kas, yòn yòn manera tempu nan a kasa. I mi ta mira mi ruman ta prepará un dushi kuminda. Anto ora mi bira wak pariba di kas, mi ta mira Heinz pará banda di su kabai. Ora mi imaginá e kosnan ei, mi no ta sobra tempu pa pensa riba kosnan negativo i mi ta sinti mi masha gradisidu na Yehova.

Ora mi pensa riba tur e bon kosnan ku Yehova a i lo duna mi, mi ta sinti meskos ku David ora el a bisa na Salmo 27:13 i 14: “Kiko lo a para di mi si mi no tabatin fe ku lo mi mira Yehova su bondat tanten ku mi ta na bida? Warda ku konfiansa riba Yehova. Tene kurashi i sea fuerte. Sí, warda ku konfiansa riba Yehova.”